ZOMITE LEH MEDIA
Mangpau tawm thei zek leh a lu leh a khuak gol lua pah ding kisa in media pen zuau bulomtang hi ci ngam lanlan pah a, a kilule sak phet leh Trump bangin media vik khempeuh a gal bawl nuam, mediate gal a pulak khum leh Fake news ci lanlan teng leitung ka thuthu a ci nuam teng hi bek hi. Mihing hi napi sial a bang mihing a honpi khat mah om a, sial in siksik leh nek a thuah bangin media pen bulom hi ci napi news group teng a kihel sial mihing kitam dep hi. Media fake media, hoax, humor, cover-up story ci napi media mah ahi Twitter ah hawk den leh thu thak khat om in, na khat sem leh journalist teng kiang mah a ko masa den Trump' ettehtak huai lohna pen bek etteh loin a hoihna dangte na etteh zaw un.
Zomi sungah zong sial mihing a hun khop mah om hi. Amau bel pil a kisa dep nuam teng na hi thong hi. Media ten a suahte uh pen a gamtatna uh ko gamtatna leh mawhpuakna (accountability leh responsibility) nei uh a, thuman lo suaksak le uh defamation case tuak in, sum liau in, gilbeem tung thei uh hi.
Media saite pen mihing mah ahih manin media a kisuaksak khempeuh 100% man den lo mah ding hi cih theih ding kisam hi. Tua i theih kei leh a hai zong hilo in a mawl kihi lai hi cihna hi. Media pen mipite phattuamna ding thukizaksakna platform ahih manin mediate na gal bawl leh mipite na gal suak ding hi cihna hi. A diakin ei Zomi media vikte pen meetna leh kha sum sang ki-om lo a, Zomite itna leh veina tawh sep theih sunsun ci-a tha leh zong, sum leh paai leh hun tampi suplawh lianga na kisem hi bek a, ihmut kham lopi a dek gui leh nung sip velval a kipang hi bek hi. Media zuau bulomtang hi i cih leh news group khempeuh ah kihel se loh a, Admin teng va phinphin se pen mawlna mah hi. Zuau bulom hi i cih leh news khawng sim sese ngei kei leng i hihna bangin ki-om milmel thei veve a, awlmawh ding leh patauhna ding tawm zaw hi.
Group sung khawng ah news kipost a zakdah lam pian teng peuh Fake news ci lanlan ngamte bel block ding leh paihkhiat pahpah siangtho zaw hi. News um lo, phuahtawm, bawltawm (fake, hoax, cover-up) ci napi news sim nuam lai veve cih bel ek uih hi ci napi lawng in, nap leh nek thuahthuah napi pil a kisa mahmah dep teng hi bek hi. Media pen zuau hi ci napi news uk mahmah dep laite sial leh ek nete tawh kilamdang vet lo hi.
🖋️Thang Khan Lian
