MUIBUN IN NA HIAM SEMSEM NUAM HIAM? AHIH KEI LEH NA TAWT/MAWL SEMSEM NUAM ZAWSOP HIAM?
Bawllung kisuihna ah a player siam mahmahte leh team hat mahmahte nangawn a kimawl dan a thei vet lote nangawn leh a ente in na hawmthawh den uh a, goal khum zo lo ahih kei leh results hoih ngah zo loin gualzawhna ngah zo kei le-uh title/trophy bangmah ngah zo lo uh ahih manin gensiatna nasia takin thuak/tuak uh hi. A pahtak diak uh player siamte leh a team deihte uh nangawn uh a gumte in hawmthawh den zaw pian uh a, a gensiat leh mawhsak hun uh tam mahmah hi. A hawmthawh leh gensiat manun a lehdo leh langpang (a galbawl) uh cihna hi pah tuan sam lo hi.
Tua mah bangin biakna leh gam ki-ukna vai-ah makaite zong makai za leh thuneihna bek deihin, sazuk in kimanna ding a nei lo a ki a puak ngaungau kawikawi bangin a makaite in a thuneihna leh makai hihna za bek uh a mot puak ngaungau kawikawi uh a, mipite noptuampih ding leh hamphatpih ding, leh biakna pawlpi leh Pasian' gam zaina ding, gam leh minam adingin a sepkhiatna uh muh theih ding a om kei leh hawmthawh leh gensiatna a tuah uh a lamdang hilo hi. A hi ding mah hi a, a ngeina hi.
Footballer khat in goal a khum zawhna dingin a langte kaih, sawn leh kalh tuk theih ding munte panin a kipelh zalzal theih a, a nawksuak zawh masak kisam hi. Free kick Sui khat in goal a khum zawhna dingin a kidalna defence wall peelin a suih lut kisam hi. Corner suih ciangin goal a khum nuamte in a langte defender leh defence wall teng a nawksuak zawh loh kiphamawh masa hi. Tua khit teh a kungpangpa peelin a bawllung kung sungah a goal net a den' lut zawh kisam hi.
Football team khat in gualzawhna a ngahna dingin a langte in deih takin a gualzawhna lampi uh a dalnate uh, a lampi a khaktansakna teng khempeuh uh a nawksuak zawh bek ciangun gualzawhna ngah zo pan bek uh hi. Gualzawhna kici vantung panin manna hong kikhiat suk bangin a khawnkhong in ngah ziauziau theih hilo hi. Thalawh loh a kiphamawh ahi hi.
Tua mah bangin biakna leh gam ki-ukna vai-ah makaite in a langpang tampi nawkna leh lehdona banah a lampi ding uh a khaktansaknate uh a nawk suak zawh den uh kisam hi. Na khatpeuh muibun takin sep zawhna ding leh khawl loin mainawtpih zawhna dingin lungkia loin na pang teta kisam hi. Na ziat na vei panin hong paupaute, na thanemna, ginatlohna, citlahna leh lawhsapnate thuman simsanin hong gen ngam khempeuh na gal leh sa hi khin pah lo hi.
Makai na hihna man bek genbaang loin a hoih bukim leh cingtaak (blameless and perfect) kisa kha pah kha kei in. Leivui panin a kipiangsak mihing kuamah a genbaang lo leh a hoih bukim kuamah om lo ahih manin na citlahna leh lawhsapna hong hawmthawh, kankuat leh kawkmuh mite hong langpang hi den sam lo uh a, na gal na sa hi khin pah lo uh hi. A sia thei khamte leh ngunte zong a hoih taktak mah ahi hiam, ci-in a kitheih theihna dingin mite in mei tawh sinin sittel masa uh a, mei sungah kize-et masa hi. Hong kisittel ding na lauh leh makai dinga cingtaak lo na hi zaw hi. Hong kisittel ciangin na makai hihna leh manphatna (leadership and value) lahna ding, kitathiamna dingin na zat theih ciang bekin makai muanhuai na suak zo pan bek ding hi.
Mipite genbaang loh ding deihin a kilamen den manin hong kisittel khak ding na zakdah pah a, hong kilangpan'na leh galbawlna bangin na ngaihsut pah leh a meidawi na hih manin makai dingin a cinh lo na hi khin zo hi. Mite genbaang loh ding deihin a kilamen den, a kisittel khak ding zakdah pahin a kilangpan'na leh galbawlna bangin a ngaihsut pah kipawlna pen thumanna tawh a kalsuan lo, sepkhiatna kician a nei lo a belh tak lo kipawlna hi zaw hamtang den hi.
"Na khialhna leh mawhna siksanin mite in a hong thukimpih lohna hong kigenna (criticism, Zokam in gensiatna ahih kei leh langpan'na ahih kei leh muhdahna bangin i ngaihsut khialh niloh) panin na kipelh nop (peng) leh bangmah gen ke'n la, bangmah sem ke'n la, bangmah hi sese dah zaw lel in," ci-in American writer, publisher, artist, leh philosopher Elbert Green Hubbard in a gen ciamteh tham leh kidophuai mah zaw hi.
Na khialhna leh mawhna siksanin mite in a hong thukimpih lohna hong kigenna na zakdah lai teng leh hong kilangbawlna leh galbawlna bangin na ngaihsut pahpah lai teng na mainawt ngei kei ding a, na khangto, kilamdang, hoih deuhdeuh (improve) ngei kei ding a, na hiam semsem ngei kei ding hi. Muibun in hiam nak na tawt/mawl (blunt) semsem zawsop ding hi. Na ginatlohna leh citlahna teng mah ah na kidiah den ding hi. Mawhna a nei lo Pasian' tapa neihsun Topa Jesuh nangawnin in Satan' ze-etna, Judah makaite leh siampi liante mawhsakna na thuak hi, cih mangngilh kei in.
✍️ Thang Khan Lian #ZUNs reports
