GOLCONDA FORT HAWHNA REPORT TOM KIM
May 12, 2016 in mihing thahatna tawh kilam in a kiciang zo dinga uphuai lo liang Golconda Fort kici ka hawhna tawm hong hawn sawn nuam ing. Golkonda (Golconda zong a kici) pen kammal nih "Gol konda" kici panin kila hi a, "Round shaped hill" ahih kei leh Golla konda (Shepherd's Hill) a cihna hi a, c 1512–1687 AD kikal in Southern India lam-a medieval sultanate kumpi Qutb Shahi dynasty kici ten a khuapi (capital) dingin a zat uh khuapi tunga om leh a ki-umcip kulh muanhuai (citadel and fort) ahi hi. Telangana state capital Hyderabad nitumna lam 11 km (6.8 mi) Hyderabad district tehsil sunga om ahi hi. Golkonda Fort ah leitung adingin suangmanpha etlawm leh manpha penpente lak-a kiciamteh kha Koh-i-Noor, Hope Diamond, Nassak Diamond leh Noor-ul-Ain Diamond cihte a kibawlkhiatna mun ahi hi.
1600s kiim a kiciang khin, fort nam tuamtuam li leh 10 km (6.2 mi) a sau a pualam kulhbaang (outer wall) 87 semicircular bastions nei-in 11 km (6.8 mi) a sau kulh ki-umcip muanhuai Golkonda Fort pen a masa penna dingin Kakatiyas dynasty ten western defenses a zat dingin Kondapalli Fort kicihna mun na ciang masa uh hi. A khuapi leh granite suang zangin kulhbaang tawh ki-umcip muanhuai (fortress) a sangna lam 120 meters (390 ft) hi. Kumpinu Rani Rudrama Devi leh ama zalaih (successor) Prataparudra in hih kulh na bawlpha in na thakhauhsak semsem uh hi. Tua khit nungin Warangal sim in a la Tughlaqi army-te a zo Musunuri Nayaks kicite' khut nuai-ah hih kulh om in, thuneihna na len uh hi. 1364 treaty hangin Musunuri Kapaya Bhupathi in Bahmani Sultanate-te' tungah piakhia (ceded) hi.
Hih kulh muanhuai Bahmani Sultanate-te' khut sungah a kipiakkhiat khit nungin damdam in Golkonda hong minthang hi. Telangana ah governor dinga kisawl Muslim kumpi (Sultan) Quli Qutb-ul-Mulk (r. 1487–1543) in 1501 in Golkonda ah ama government tutna (seat) hong phuankhia hi. Hih hun in southern India a kumpi hat mahmah Bahmani' ukna leh thuneihna (rule) damdam in thanem in zawngkhal semsem ahih manin 1538 kum in Sultan Quli in suahtakna (independence) hong ngah a, Golkonda pansan in Qutb Shahi dynasty hong phuankhia hi.
Kum 62 sung buannawi a kibawl kulh ki-um (mud fort) Qutb Shahi sultans thum ten hong keek gol beh uh a, a kulh 5 km (3.1 miles in circumference) a sau in hong keek gol beh uh hi. 1590 dong Qutb Shahi dynasty ten Golconda amau khuapi dingin zang uh uh a, 1590 kum bei kuanin a khuapi dingin Hyderabad zangin a laih phei mateng khuapi dingin zang uh hi. Qutb Shahis ten hih kulh ki-um muanhuai 7 km (4.3 mile outer wall enclosed the city) in keel gol beh uh hi.
Mughal kumpi (emperor) Aurangzeb in kha giat sung piikpeek Golconda Fort a umcih (siege) khit nungin 1687 kum in la zo ngawngaw a, a suksiat zawh teng uh a galkap ten suksiatsak uh hi. Golkonda Fort pen leitunga diamonds minthang pente lak-a kigente kihel kha Koh-i-Noor diamond, Hope diamond, Daria-i-Noor diamond, Noor-ul-Ain, Prince diamond, Regent diamond, Wittelsbach-Graff diamond cihte kibawlkhiatna leh kiseelna munpi hi.
Golkonda khuapi panin diamonds kimuh theihna munte pen Kollur kianga Kulluyr Mine, Guntur district, Paritala leh Atkur, Krishna district cihte pan hi a, kumpi Kakatiya' uk hun lai-in Golconda khuapi-ah deih ciacia leh a etlawm thei dingin kiseek (cut) hi. Golkonda khuapi-a suangmanpha tawhkhiatna khukpite (mines) panin diamonds tampi kitokhia ahih manin Golkonda khuapi pen diamonds "market city" suak hi. Golkonda khuapi-a diomonds mines panin diamonds kitokhia minthang diakte:
1. Daria-i-Noor - Persian pau hi a, "Sea of Light" a cihna hi. Leitunga diamond kiseek (cut) lak panin a golpente lak-a khat hi a, tu-in Iranian Crown Jewels, Center Bank ah om hi. A gihna 185 carats (37.0 g) hi a, Iran kumpi' diamond neihte lak panin a golpen leh a lianpen hi.
2. Noor-ul-Ain - Leitunga diamond ausan (pink diamond) lak-a golpente lak-a khat hi.
3. Koh-i-Noor - 106.6 carat a dik i.e. 21.12g diamond hi a, British ten guksakin tu dong keem uh hi. British Kumpinu Queen Elizabeth II in tu dong keem lai hi.
4. Hope Diamond - kum zalom 4 a upa hi a, leitunga diamond manpha pente lak-a khat 45.52 carat a gik diamond hi.
5. Prince Diamond -a beisa kum 300 hun in kimukhia a, a gihna 34.65 carat hi. Leitunga pink diamond lak panin a golpen thumna hi.
6. Regent Diamond - 141 carat (28.2g) a gik hi a, tu-in French ten keem uh hi. 2015 in Regent Diamond a sumtang in 48,000,000 pounds man pha dingin kituat a, leitunga diamond etlawm pen leh siangtho pen (most beautiful and purest) hi kici hi.
7. Wittelsbach-Graff Diamond: 31.06 carat (6.212g) a gik diamond hi a, 2008 in Laurance Graff in hih diamond 16.4 million tawh lei hi.
3. Koh-i-Noor - 106.6 carat a dik i.e. 21.12g diamond hi a, British ten guksakin tu dong keem uh hi. British Kumpinu Queen Elizabeth II in tu dong keem lai hi.
4. Hope Diamond - kum zalom 4 a upa hi a, leitunga diamond manpha pente lak-a khat 45.52 carat a gik diamond hi.
5. Prince Diamond -a beisa kum 300 hun in kimukhia a, a gihna 34.65 carat hi. Leitunga pink diamond lak panin a golpen thumna hi.
6. Regent Diamond - 141 carat (28.2g) a gik hi a, tu-in French ten keem uh hi. 2015 in Regent Diamond a sumtang in 48,000,000 pounds man pha dingin kituat a, leitunga diamond etlawm pen leh siangtho pen (most beautiful and purest) hi kici hi.
7. Wittelsbach-Graff Diamond: 31.06 carat (6.212g) a gik diamond hi a, 2008 in Laurance Graff in hih diamond 16.4 million tawh lei hi.
Hyderabad khuapi pha leh sik kha khempeuh in Golconda Fort va en leng kisik kik huai het lo a, medieval hun lai-in kumpite' thupit zia leh mihingte' thahatna zia, a sal matte uh a zat zia uh tampi tak kitel beh hi. Ka maan kizaihna mun pen top citadel Baradari citadel kici a zuattohna mun a suang gol mahmah omna mun leh Baradari citadel tung hi.
No comments:
Post a Comment