SUDAN MILITARY LEH CIVILIAN IN TRANSITION DEAL KICI KILAIHNA DING THUKIMNA SUAIKAI TA

SUDAN MILITARY LEH CIVILIAN IN TRANSITION DEAL KICI KILAIHNA DING THUKIMNA SUAIKAI TA

Aug. 19, 2019; Pizing: Sudan gam-ah 1989 in galkap thahatna tawh thuneihna la (coup) in, Sudan gam kum 30 sung a uk leh Darfur buaina ah milom kithahna (genocide) piangsak hi ci-in ngawhna a tuak manin International Criminal Court in WANTED in a ciamteh President Omar al-Bashir a tutna panin a kilotkhiat khit nungin Sudan’ Transitional Military Council (TMC) kici Sudan galkapte in kum nih sung gam vaihawm dingin thuneihna hong len uh hi.

Ruling TCM ten galkap ki-ukna tawh thuneihna a let uh Sudan gam-a nautang ki-ukna (civilian rule) deih in nung kum panin lungphona neite in deih lo uh, gamvai ah kikheelna leh kilaihna tawh ki-ukna transitional government kici nuai-ah nautangte thuneihna tawh ki-ukna "civilian rule" kici a omna dingin nawhna bawl in, lungphona neih khawlsan lo uh hi.

Nung Kiginni in Sudan state capital sunga Nile Lui kianga om Friendship Hall sungah ruling TMC deputy chief Mohammad Hamdan Daglo leh lungphona neite kipawlkhawmna leh opposition groups kipawlkhawmna Alliance for Freedom of Change protest kicite palai Ahmed al-Rabie in Sudan gam in civilian rule lam a manawh theihna dingin kha 39 sung transition deal kici gam kilaih hun a ki-ukna ding vai thukimna suaikai uh hi.

Transitional deal suaikaihna hun ah gam tuamtuam panin Prime Ministers (PMs) leh kumpi uliante kihel uh a, tuate lakah Ethiopian PM Abiy Ahmed leh Egypt Premier Mustafa Madbuli zong kihel a, transitional deal suaikaihna pawi uap dingin Sudan gam mun tuamtuam panin mipite a tul a then in meileeng leh mawtaw tawh kuan in, a gam lan (flag) uh laam in, lungdam in awng ngeingai uh hi. Transitional Prime Minister dingin UN official leh veteran economist Abdalla Hamdok kiguang a, 2011 in Sudan panin lengkhia namgimtui hau Sudan gam leitaw lam ah economy a kip kikna dingin panla dingin ki-ummawh hi.

SUDAN GAM-A MOH, SISAN NAISAN KISUAHNA LEH REVOLUTION THU A TOM KIM A ET PAKNA:

• Dec. 19, 2018: Sudan gam kum 30 val vaihawmna len President Omar al-Bashid' government ukna nuai-ah moh man (bread prices) a leh thum in khang a, namgimtui man a nak khan' manin haksatna lianpi a kibehlapsak manin President al-Bashid kitawp ding nawhna in nipi kal sim a lungphona (protests or demonstrations) hong piak kik hi.
• April 6, 2019: Lungphona nei mi tul tampite in Khartoum khuapi sunga Army headquarters pua-ah kikaikhawm in sit-in protest camps bawl uh hi.
• April 11: Sudan galkap thuneite (military authorities) ten galkap thahatna tawh President Bashir kipaikhia ta hi ci-in tangko uh a, kiteelna a kineih ma sung kum 2 galkap uliante makaihna tawh transitional military council (TMC) in gam uk ding hi ci-in pulak uh hi.
• June 3: Galkap puan silh thau tawite in Khartoum khuapi-a protest camps a sit-it protests bawlte behdaihna dingin military operations pan uh a, ni tam lo sungin lungphona nei mi 127 kaplum uh hi.
• June 9: Lungphona neite in gam bup ah tangpi tangtate in thuneite thupiak man' lohna dingin civil disobedience kici campaign hong pankhia uh hi.
• July 5: Ni nih sung thukimna a pian theihna dingin kihona (negotiations) TMC makaite leh Alliance for Freedom of Change protest makaite in a neih khit nungun gam kilaihna dinga thukimna (transitional accord) adingin a thubullet (principle) ding thukimna nei thei uh hi.
• Aug. 4: TMC makaite leh Alliance for Freedom of Change protest makaite civilian rule om mateng zat pak dingin upadi "constitutional declaration" kici bawl dingin thukimna suaikai uh hi.
• Aug. 15: Maban a transitional government Prime Minister za len dingin veteran economist Abdalla Hamdok min kiguang (nominated) a, Aug. 16 in PM dingin kithukim hi.

SUDAN GAM KILAIHNA DINGA PARTIES KIGOLHTE:

1. Transitional Military Council: TMC makai sungah top military figures - general tuamtuamte kihel uh a, President Bashir a kipaihkhiat khit nung panin thuneihna len uh hi.
2. Forces for Freedom and Change (FFC): FFC kicite lungphona neite kipawlkhawmna (coalition) hi a, siavuante, sitnite leh cidamna lamsanga nasemte (doctors, lawyers & health workers) in makaih uh hi.

TMC LEH FFC THUKIMNA POIMAWH DIAKTE:

• 39: Civilian-military alliance government in general elections neih kik ma kha 39 sung gam uk khawmin, thuneihna kitang (power-sharing) ding uh hi. TMC sunga Armed Forces sunga head of General in kha 21 sung thuneihna lenin makaih ding a, kha 18 sung civilian opposition FFC ten len ding uh hi.
• Center a thuneihna (powers) bodies thum in thuneihna mawhpua ding uh hi.

1. Sovereign Council: Members 11 om ding a, tuate lakah Opposition groups FFC lam panin civilian members nga, military lam panin members nga leh a tamzaw thukimna (consensus) tawh a kiteelcing civilian member khat hi ding hi.
2. Cabinet: Opposition ten a nominated uh Prime Minister in Cabinet makaih ding hi.
3. Legislative body: Sovereign council in Legislative bawlna makaih in encik ding a, independent body members 300 pha ding hi. Tuate lakah numeite adingin tutna kikhamkholhsak (reserved seats) a tawm pen 40% hi ding a, FFC in 67% members ding guang ding uh hi.

• Sudanese military TMC ten Defense leh Interior Ministers ding guang ding uh a, ministers posts dangte opposition FFC ten guang ding uh hi.

Sources: Dabanga and Agence France-Presse

@ Thang Khan Lian #ZUNs

E.U. IN TU-IN PALESTINE STATE A CIAMTEH KEI LEH CIK TEH CIAMTEH DING HIAM?

E.U. IN TU-IN PALESTINE STATE A CIAMTEH KEI LEH CIK HUN TEH CIAMTEH DING HIAM?

European Union (EU) gam ten Palestine state ciamtehna (recognition) bawlna dingin a kalsuanna uh tuihual lianpi kinawk ta hi cih reports om hi. 2014 in Sweden in Palestine state na ciamteh a, EU member lak panin a nihna dingin Slovenia in ciamteh sawm hi cih reports om hi. Ahih hangin Slovenian President a ciamtehna dingin hun min (ripe) nai lo deuh hi ci-in February 2019 in na ci hi. January kha-in French President Emmanuel Macron in France in tu lianin Palestine ciamtehna kibawl nai lo ding hi cih ahih manin reports a om hangin Palestine ciamna dingin maiban ah tuihual kinawk napi gol lua nai lo hi cih kimu thei hi.

Cyprus leh Malta in EU member a suah ma-un Palestine ciamtehna na bawl khinzo uh a, Soviet Union gam-ah a om lai un central European member states hun khopin Palestine ciamtehna na bawl khinzo uh hi. Central European member state li "Visegrad four" kicite lakah adiakin Czech Republic gam pen Israel adingin a pawl hoihpen hi. Iceland, Albania, Serbia, Montenegro, Ukraine leh Vatican in zong Palestine state ciamteh khinzo uh hi. Ahih hangin amaute EU member hi nai lo a, EU member ngen ahi leh Russia vauna leh kihtakna (threat) dalna dingin EU in a member a keekgol beh sawmna ah member thak ding ngak lai pen Iceland, Albania, Serbia, Montenegro, Ukraine gamte hi.

2014 in Sweden in Palestine a ciamteh hi. Israel in EU members dang ten zong Sweden nungzuih ding hi ci-in na patau mahmah a, ahih hangin tua banga lamet zahin Israel in Palestine leitang a ukkhumna (Israel occupied territories) tungah gawtna piakkhopna ding lunghimawhna hangin Palestine ciamteh zom pahna ding uh hong piang pah lo hi. Sweden in ciamtehna bawl khitin EU a UK, France, Ireland, Spain, Portugal, Belgium leh Italy parliamentarians ten Palestine statehood ciamtehna dingin a gupna lahna in resolution bawl uh a, a governments-te un Palestine state a ciamtehna dingin nawh uh hi.

Israel in Sweden' ciamtehna hangin thangpaihna leh vauna tawh 1970s hun lai-a Israel Foreign Minister Abba Eban' kampau "three standard replies" tawh dawng a, Sweden gamtatna pen a hun man lo a, Israel in Palestine leitang ukkhum hi ci-a gensiatna pen lehnan'na "counterproductive" hi a, European gam ten amau deih bangin vaihawmna (dictating) tawh peace process zuih leh zat theih ding a deih leh kilemna (peace) omna dingin amau ut bangbangin gamtang kei hen ci-in dawng hi.

Israel government in tua bangin ngimna (strategy) tawh vauna kamkhauh a zat pen Sweden nungzuih in EU gam ten ciamtehna a bawl khak ding uh a kihtakna hi a, a ngimna leh deihna bangin lawhcing lai hi. Ahih hangin EU gam ten member khat bek gamtat ding ngak loin, Israel in gam khat bek ngawh tuamin a mawhsak theih lohna dingin kithutuakin Palestine a ciamteh le-uh Israel vauna pen a mawkna suak ding hi.

Sweden in ciamtehna a bawl khitin thukician kithei zo lo tawh Israel in Sweden' Foreign Minister Margot Wallstrom' kampau a valin ngaihsun hi. Nov. 2015 in Paris terror attack in Wallstrom in hih terror attack pian' theihna Israel-Palestine buaina hangin mi tampi thakhat thu-a kilaihna ding deih lungsim nei-a ngongtat (radicalised) mi tampi piangsak ahih manin hih bang terror attacks piangpiang hi ci hi. Dec. 2015 mahin Israel in Palestine mite court thupiakna om lopi-in thukham palsal leh a khengval in a thahna "extra-judicial killings" beina dingin nawh kik ahih manin Israel in ama tungah Israel gam a luttheih lohna ding (persona non grata) pulak khum hi.

European gam ten Sweden sinna panin theihna (experience) panin a sintheih ding uh pen EU in Palestine a ciamtehna ngak loin a member khempeuh kipumkhatin amau gam ciatin ciamtehna pulak le-uh Israel in counter-attacks a bawl theihna dingin Israel in gam khat bek kampauna ding kuamah min lo tuamin gen thei lo ding hi. Wallsstrom' kampau sanga khauhzaw 2015 in Russian Deputy Foreign Minister Mikhail Bogdanov in kampau na zang a, Hamas leh Hezbollah pen terrorist groups hilo a, Israel-Palestine buaina hangin Middle East ah thukham tawh kituak tangpi tangta-gamvai "legitimate sociopolitical" force hi a cih hangin Israel kamkhat beek na pau ngam lo hi.

Wallstrom' kampau bangin EU in second intifada (Palestine mite kiphinna nih veina) lai-in Israel-Palestine buaina ah Israel in radical power khangsak a, Israel in extrajudicial killings zangin Palestine mite na thatthat hi a cih manin Wallstrom mimal in counter-attack leh action a lak bangin Israel in EU tungah gamtang ngam lo hi. Anti-Semitic pian' khiatna a hat sem theihna dingin- gentehna dingin modern history adingin Israel' judicial scandal golpen 1984 in "Bus 300 affair" kici na piang a, international observers ten hih case pen extrajudicial killings hi ci hi.

Tua loin Israel ngongtatna thanghuai pholakhia golpen (largest whistle-blowing scandal) 2008 in Anat Kamm hi a, Israel' Supreme Court phalna om lopi-in Israel galkap ten Palestine mite thatthat hi thusim pholakkhia hi. Nung kum in Israel galkap Elor Azaria in Hebron khuami Abdel-Fattah al-Sharif kici thau a kikapliam a tuk khinsa tang zo nawn lo hi napi a lutang thau tawh kisutuah "point-blank" in kapsak beh ahih manin Amnesty International in "extrajudicial killing" hi ci hi.

Wallstrom in Israel-Palestine buaina in Islamic terrorism radicalising power behlap sak hi a cih zuau thu hilo hi. 2015 Paris terror attacks suamna bawl makaipipa Abdelhamid Abaaoud in a martyr video a, "Allah' huhna tawh ko pen Palestine suakta sakte ka hi ding uh hi. Palestine suahtakna ding dotna (question) Osama bin Laden' thugenna leh ama zalaih pa Ayman al-Zawahiri' thugenna bulphuh in kum 20 val gen belin na nei ta uh hi," ci hi.

1990s leh 2010s in Palestinian Authority (PA) in statehood a ngahna dingin mainawt napi Europe in state a ciamtehna piak ding kithawi lo zaw semsem a, EU, UN, World Bank leh IMF in 2011 in PA in state a ngah theihna ding inn lutna sangka (threshold) pua ah gamtang hi ci-in state piak ding na din' khawl hi. European Commission ulian khatin University of Amsterdam a postdoctoral sim Dimitris Bouris kiangah 2010 in tu lian-a leitung a suahtakna ngah khinsa gam 70% sangin Palestine in state-building bawlna ding kilim man khin zaw ta hi ci.

1999 in EU in Berlin Declaration Palestinian State ciamtehna dam a ciamteh dingin kiman ta hi ci-in pulak hi. PA President Mahmoud Abbas in EU kiangah Brussels ah February 2019 in a zin in Palestinian state ciamtehna dingin nawhna a bawl lai-in EU in EU kipawlna bup in ciamtehna bawl ding hilo a, national governments in amau gam ciatin a ciamteh ding uh kisam hi ci-in EU diplomats ten press kiangah gen uh hi. EU diplomats pawl khat ten a thugen uh kitukalh in EU recognition pen peace settlement om ciangin piang thei pan ding ci zel uh hi.

Trump administration in Europe in Palestine recognition ding vai a din'na kitelcian lo hi. Israel' kidalna lum pen leitunga superpower US bek hi a, Trump in Palestine state ciamtehna dingin din'na khauh ah a din' leh Sweden nungzui-in EU in recognition a bawl ding hamsa sak tuam ding hi. Ahih hangin Trump in EU ciamtehna dalna dingin khauh takin a vau leh Sweden' nungzui kha baih zaw uh hi. Palestinian state-building project a lawhsap beh lai a, 2013 in a lawhsap manin Palestinian Prime Minister Salam Fayyad a kitawp (resigned) mah bangin buaina ven'sakna dingin "two-state solution paradigm" zuih ding panin buaina thak kipan ding a, genkholh theih loh maban piangsak ding hi.

Tu dinmun adingin a lunghimawhhuai leh lauhuai pen mainstream European policymakers, academics, intellectuals ten Palestinian state piang pah lo ding a, piang ngei lo kha ding hi ci uh hi. Sweden Foreign Minister Wallstrom in Sweden in Palestine recognition a bawl khitin, "Gam pawl khat ten hih thukhensatna baih lua hi ci uh hi. Ahih hangin hih thukhensatna zekai lua a, kibawl hak lua zaw hi cih ka lunghimawh zaw hi. Middle East process adingin Sweden in ciamtehna a bawl pen zatui sutna hoih hi ding a, gamdang ten hong zui ding uh hi," ci-in gen a, Judahte paunak ah, "Tu-in ahih kei leh cik ciangin?" cih tawh a thugen khum hi.

Hih bang thu a om lai takin Israel PM Bejamin Netanya in Trump in Palestine mite leitang Israel' sovereign terrority hi ci-in a ciamteh sakna dingin ngen leuleu hi.

By: Anders Persson (Anders Persson is a post-doctorate researcher at the Centre for European Politics at the University of Copenhagen).

Source: Al Jazera

@Thang Khan Lian #ZUNs

Photo: Israel-Palestine leitang kituhna leh Israel in 1946 - 2000 kikal sungin a gamkeekna (colonialism)