𝐊𝐈𝐃𝐀𝐖𝐌 𝐈𝐍 𝐋𝐀, 𝐊𝐔𝐀𝐌𝐀𝐇 𝐊𝐇𝐄𝐌𝐒𝐀-𝐈𝐍 𝐆𝐀𝐌𝐓𝐀 𝐊𝐄𝐈 𝐈𝐍!
Tu hun ciangin Lai Siangtho' thugennate tangtun khin zo hi. Topa Jesuh' in, "Kamsang kineihkhem mi tampi hong piang ding a, mi tampi tak umkhialsak ding uh hi," (Matt. 24:11) ci-in a genna bangin Khristian min zangin kamsang kineihkhem tampite in thu um takpi tak unkhialsak uh hi. A diakin US ah Donald Trump in President hong let khit nungin tRumpist prophets tampi hong kibehlap sawnsawn a, ei sung nangawn-ah om hi. Tu dong mah a tRump bangin mi tampi tak umkhialsak leh lampialsak khin zo uh hi.
"Mite lakah kamsang man lo a om ngei mah bangin note lakah sia man lo hong om ding hi. Siatna a piangsak thei thuhilhna a man lo hong lutpih simin, amaute mahmah a tankhia Topa nangawn nial ding uh hi. Tua ahih manin thakhat thu-in siatna thuaklawh ding uh hi. Tua bang hi napi-in mi tampi takin amau’ gamtat hoih lohna zui ding uh a, tua bangin amau gamtatna hangin mite in thuman lampi gensia ding uh hi," ci-in Peter laikhak ah a gen bangin thuman lampi gensia-in siatna leh kimuhdahna a piangsak nuamte gamtatna leh thuhilhna suih ding a teel zaw tam khin zo hi.
"Hih sia man lote in a huaiham manun note kiang panin sum a ngah theihna dingun PHUAHTAWM THU hong gen ding uh hi. Ahi zongin sawt pek a kipanin amaute’ thu a Khen dingpa a KIGINGSA-IN om niloh a, amaute a Susia dingpa in EN GIGE hi. Thuman lampi nusia-in gammang uh a, a man loin gamtatna tawh sum a ngah nuam Beor’ tapa Balaam’ gamtat bangin gamta uh hi. Amaute KIPHASAKIN HAIPAU uh a, a khial gamtat mite sung panin a suakta khin liailiai zo mite, leitung pumpi deih bangin a gamtatna dingun a ZOL ZO uh hi. (ref. 2 Peter 2:1-3, 15, 18)
A huaiham Boer' tapa Balaam bangin sum ngahna ding, min leh zaa ngahna ding leh thuman sangin thuman man lo lampi a teel zaw mite zaknop phuahtawm thu genin thuman lampi nusiatsanin, thuman lo lampi - Agape itna panin minam dangte muhdahna ding leh kikhenna ding thu bekbek a hong mop sia man lote a susia dingpa in kiphasakin a hai paupau niloh uh en gige hi.
Biakna hita leh gamvai hita 𝐙𝐔𝐀𝐔 𝐥𝐞𝐡 𝐔𝐏𝐌𝐀𝐖𝐇 𝐥𝐞𝐡 𝐏𝐇𝐔𝐀𝐇𝐓𝐀𝐖𝐌 𝐓𝐇𝐔 a kam zol leh muk zol uh tawh phit zialzialin, a khial gamtat mite sung panin a suakta khin liailiai zo mite nangawn leitung pumpi deihna bangin a ngongtat ding, a hai paupau ding, amau mah bangin upmawh leh phuahtawm thu leh tatsat loin hangsan takin zuau a gen ngamna dingun hangsanna guan uh a, thu upna leh gamvai ah umkhialsak leh lampialsak khin mang uh hi.
Sia/pastor pawl khatte, a diakin fundamentalist conservatives or right-wing ideologies a neite in Khris in a sisan tawh a tatkhiat leh a leisa biakna pawlpi pen leitung politik tawh makaih uh hi. Pasian' deihna banga nasep ding sangin pawlpi mite lungkimna dingin gamta zaw leh thu gen zaw uh a, pulpit tung a sik leh a din'na teng uh political platform suaksak uh hi.
Pasian' thu leh LST thugil leh thuman sangin minam vai leh gamvai - politics thu gen le-uh mipite in zaknop sa zaw leh ne thei zaw uh hi. Tua bang siate in cikmah hunin a sin ngei loh uh POLITICS thu leh Zomi thu hong tam gen luat uh ciangin amau sinna leh amau theihna lam uh gen kha loin phuahtawm leh thu deihkaih leh kawikaih vive in zuau gengen uh hi. Politics leh gamvai a gen nuam zongun a sin leh lim takin a kantel ngei lohpi uh gen uh ahih manin upmawh, phuahtawm leh zuau bulomtang vive mah a gen loh uh kiphamawh hi.
Tua bang upmawh, phuahtawm leh zuau bulomtang vive genin mipi sungah sia leh pha, thuman leh zuauthu a khentel thei lo teng hong bum hai gawp uh ciangin i PAWLPI sung leh i MINAM sungah a kisam het lo kitot kiseelna ding, kimuhdahna ding, kigalneihna ding, kikhenna ding, phu kilak nopna lungsim khaici hoih hong tuhte un gah hoih lo piangsak hi. A khaici hoih lo tuhte uh aituam hamphatna ding bek zongin minam leh gam it leh vei a kici kipawlna tuamtuamte ah a makai pawl khatte in na phungvuhin, tui hong buah uh ciangin hong khangcingin gah hong suang hi. A gah hoih lo a ne kha teng bum tuam mah hong bang ngeingai uh hi. Gah hoih lo a ne khate in social media hong phengzat uh ciangin nawngkaihuai mahmahin Khristian leh minam daisak hi.
"Mite in thuman a ngaih nop loh hun, amaute’ deihna bek a zuih nop hun, amaute’ zaknop thute bek a gen ding sia a cial thuahthuah hun hong tung ding hi. Amaute in thuman thutak ngai nuam nawn loin tangthu phuahtawm peuh ngaihsutpi-in nei ding uh hi," ci-in 2 Timoti 4:3-4 sungah in Paul a genna i society sungah a dahhuai thuman thutak ngaih nuam nawn lohna amaute’ zaknop thute bek a gen ding sia a cial thuahthuahte un hong piangsak uh hi. Satan in phungvuh zaw lai ahih manin lawhcing mahmah uh a, thuman gen a sasa leh minam leh gam it takpi a sasa leh Pasian' nasem bangin a mumu zaw lai bum tuak tam mahmah khin zo hi.
Tua ahih manin Topa Jesuh in a nungzuite kiangah, "𝓚𝓲𝓭𝓪𝔀𝓶 𝓾𝓷 𝓵𝓪, 𝓶𝓲𝓽𝓮’ 𝓴𝓱𝓮𝓶𝓼𝓪-𝓲𝓷 𝓽𝓪 𝓴𝓮𝓲 𝓾𝓷," (Matt. 24:4) a cih bangin tuu vun a silh ngiate in hong khemzawh lohna ding leh hong balzaan gawp lohna dingin kidawm tek ni. Bang hang hiam cih leh British writer leh Anglican lay theologian Clive Staples Lewis (CS Lewis ci-in a kithei zaw 29 November 1898 – 22 November 1963) in, "Mi pha lo/mi sia khempeuh sung panin biakna mite siahuai pen hi," ci-in gen bangin kidop ding hi bek hi.
Thungetna hahkat zawh tawh ngia tuu vun a silh sia man lo a bei ding hilo a, dal zawh ding hilo hi. Na dal sawm leh Lai Siangtho' genkholhna tawh khau kisut mah na bang lel ding hi. Lai Siangtho' genkholhna a tangtunna hi bek hi. Jesuh in a nungzuite kiangah, "Kidawm un la, mite’ khemsa-in ta kei un," hong cih bangin kidawm in.
✍️ 𝔗𝔥𝔞𝔫𝔤 𝔎𝔥𝔞𝔫 𝔏𝔦𝔞𝔫
