MAKAI HOIH I CIHTE PEN .....

MAKAI HOIH I CIHTE PEN ..... 

"Makai peuhmah a makaih mipite lungsim leh ngaihsutna a zo mite hi," ci-in Anderson na ci hi. Norrish in, "Makai pen a mai-ah, a lai-ah, a nungah pai hi," na ci hi. US President a 33na leh Truman Doctrine pankhiapa Harry S. Truman in, "Makai peuhmah in mite hih peih loh leh sep nop loh teng nangawn lawp takin sem hi," na ci hi. George R. Terry in, "Makai pen mailam geelna lawcing sak dingin mipi lungkim tak-a kaihkhop siam mi hi," na ci hi. Dr. Jonh R. Mott in, "Makai khatin a lampi ding thei masa phot a, amah mahin zui masa pah hi," na ci hi.

Makai hi buang, makai om napi a makaih mipite a kituah kei a, mipite lampi tuam ciat in tuu bangin a vakzau in lampi tuam ah a kalsuan uh leh amaute makaih pa'n a kalsuanpih zia leh a makaih zia kician lo hi kha ding hi. A makaih mipite' lungsim leh ngaihsutna a zawh (influenced) zo kei leh makai kician zo hi ding hi.

Makai hi napi a nungzuite tawh kipawl thei lo, kituak thei loin, a tonkhawm theih kei leh makai gina zo lo hi cihna hi. A thanemte, a thahatte leh a zawngkhalte tawh kituak takin a tonkhawm thei mipa pen makai hoih ahi hi.

Makai hoih leh muanhuai ten a nungzuite hih nuam loh, hih ngap loh leh a piang zo lo ding zah in a ngaihsutte uh nangawn nawk ngap a, makai ahihna lahkhia in lungkia loin lawp takin a zawh madong sem ahih gualzo in matun zo veve hi. Tua hangin makai ahihna kam tawh gen sese loh in lahkhia ahih manin a nungzui ten muantak, zuihtak leh belhtak sa-in a nungzui ding tama ngei lo hi. "Makai ka hih manin ka nung hong zui un," ci-in awngawng se lo a, a zuih tham ding lampi man ah makaih in gualzawhpih in, matutpih zo ahih manin a nungzui ten a totna khekhap mah sik in zui ngam uh hi.

Makai hoih i cihte in saupi geelna leh muhkholhna (vision) kician nei uh a, a nungzuite zak ding leh zawh zona dingin a vision genkhia in lawpsakin thapia masa phot hi. A vision hoihte mailam ah a geelnate lawcing sak theihna dingin mipi lungkim takin kaihkhop siam a, a nungzuite tawh mapang khawm ahih manin a vision neihte mit tawh muh theih dingin semkhia hi. A vision neihte a thu bekin genna tawh khawl loin taksuah sak thei ahih manin a nungzui ten a muanna uh khang semsem a, mipite a tungah lungkim semsem sak zo ahih manin aana (force) zang sese loin mipite kaikhawm zo in kipumkhatna khauhsak semsem zaw hi.

Makai kician khatin min deihna bek tawh a sep ding bawl dingte mot gengen lo a, sep ding bawl dingin ngimna leh geelna a neihte a lampi tot ding zia leh a sepkhiat ding zia thei masa phot ahih manin amah mah in tua lampi zui masa hi. A lampi sial sa tawn masa in makaih ahih manin mipi ten nungthuap in zui uh hi. A totna lampi zuite guaksuak sak loin, lamkal ah gammang sak loin a tunna dingin a kisehna mun (destiny) dong makaih in tunpih hi.

✍️ Thang Khan Lian #ZUNs