𝐌𝐀𝐍 𝐍𝐄𝐈 𝐋𝐎 𝐍𝐔𝐍𝐓𝐀𝐊𝐍𝐀 𝐓𝐀𝐖𝐇 𝐁𝐀𝐍𝐆 𝐓𝐀𝐍 𝐕𝐄𝐈 𝐍𝐔𝐍𝐆𝐓𝐀 𝐃𝐈𝐍𝐆?

Mihing khat bangin piangkhia-in a nungta i hih buang leh i ngah dinga kilawm hamphatnate (rights), i hihna a manphatna (values and dignity), i pu i pate'n si leh nai luangkhiatsakin a sat sa, a phuh sa uh leh a lamkhiat sa uh i gam leh i innte i hut leh i kepbit kisam hi. Mihing khat i hihna tawh i mawhpuakna tavuan lian pen hi.

Suahtakna (freedom) leh rights banah values/dignity a neihte i hut i kepbit ngam kei a, suahtakna leh man nei lo mihing i hih leh ganhing tawh a kilamdan'na cinvom cia zong om lo hi. A ut peuhin hong nengniamin, hong tuancil suk, hong bawlsia gawp, i neih i lam sate hong suhsakin, uino vokno bangin go ziau lel ding hi. Bang hang hiam cih leh hih leitung pen "SURVIVAL OF THE FITTEST" a kilim zatna mun hi a, a cinh pen, a hat pente bek mah suakta zo hi. A hat pente mahin a dang teng a nuai-ah a koih nopna mun hi.

Mihing i hih buang a, ngaihsutna pongman nei-in sia leh pha khentel theihna lungsim (conscience and rational thinking) nei i hih buang leh eimau thatang hatna tawh i rights, values/dignity, suahtakna leh i neih i lamsa - inn leh lote, leh i leitang i hu i kem zo kei ta zongin phun lo puam loin i om hithiat lai teng gawh dinga kikai tuuno a ham lo, a mul kimeet a ham vet lo tuuno tawh i kilamdan'na om lo hi. Tuuno bangin i mul hong kimeetmeet sak ding a, nek ding tuuno bangin hong kigogo lel ding hi.

Mihing hihna tawh i neih dinga kilawm i rights, suahtakna, manpohatna leh i leitang hong kisuhsak ciangin nolh ngam lo, kitom ngam lo, phun lo pau ngam lo, lehdo ngam loin i daih dide lai teng hong nengniamte tha a piapia, hong balzan gawp nuamte hatang a taat hiamsak behbeh i hi hi.

South India ah Kingdom of Mysore kumpipa "The Tiger of Mysore" a kici Tipu Sultan in, "Ka nuntak sung tawntung tuu bangin ka hin' sangin ni khat bek humpinelkai bangin ka nungta zaw ding hi. Mi dangte tungah kinga-in (mi khut tawh gul manin) a lungkhamhuai nuntakna zat sangin galkap bangin sih hoih zaw hi," na ci hi.

Thu Hilhkikna 19:14 sungah, “ᴛᴏᴘᴀ ɴᴀ ᴘᴀꜱɪᴀɴ ᴜɴ ɴᴀ ɴᴇɪʜ ᴅɪɴɢᴜɴ ʜᴏɴɢ ᴘɪᴀᴋ ʟᴇɪᴛᴀɴɢ ᴛᴜɴɢᴀʜ ɴᴏᴛᴇ’ ᴋᴇᴘ ᴅɪɴɢ ɴᴀ ɢᴀᴍʜʟᴜᴀʜɴᴀ ꜱᴜɴɢ ᴜʜ-ᴀʜ ᴋʜᴀɴɢʟᴜɪ ᴍɪᴛᴇ ɪɴ ᴀ ᴘʜᴜʜꜱᴀ ɴᴀ ᴠᴇɴɢᴛᴇ’ ɢɪꜱᴜᴀɴɢ ɴᴀ ᴋʜɪɴ ᴋᴇɪ ᴅɪɴɢ ᴜʜ ʜɪ," na ci hi. Khanglui mite, i pu i pate' phuhsa gisuang a khinte leh a kikhinna dingin lampi a sialte Pasian in dawm lo ding hi.

I pu i pate' gisuang khinin minam dang khut sungah a zuakte pen tu hun leh khangsawnte hunah gam leh minam zuakin a lehpeite (traitor) ci-in kiciamteh den ding hi. I pu i pate phuhsa gisuang khinin namdangte khut sungah a kizuak hunin gam leh minam hu leh kembit dingin lutang phum ngamin a kipiate hi ung, cici napi-in phun lo puam loin a en hithiatte cikmah hunin mipite in kimuang ngei nawn lo ding hi. A gen khempeuh uh ki-um nawn lo ding hi.

Tu hunin i rights, i manphatna, i gam i leitang hu leh kembit dingin i muan i suan i teelcing i gam makaite, hong hu hong kem dingin kamciamna a nei minam min zangin kipawlnate in i gam i leitang leh i rights hong kisuhsak hun, i cihmawh beidon' hunin hong buksak mang khin, hong taisan mang khin uh hi. A gam bek hi loin a mipi teng zong hong zuak tum khit ding uh lauhuai semsem hi.

I muan i suan ding om lo ahih manin mihing bangin hong piangsak Pasian muanna tawh i neih dinga kilawm i rights, i manphatna leh i gam i lei i hut i kep kisam hi. Do a kisap hunin i do kei leh ei adingin kuama'n hong do sak ngei lo ding hi. Suahtakna na neih kei leh na khempeuh a mawknapi hi, ci-in Scootish freedom fighter William Wallace in na ci hi. Suahtakna nei nai mah hiam? Man nei lo nuntakna tawh bang tan vei nuntak sawm na hi hiam? Na suahtakna dingin na do ngam diam? Na kam beek na keek ngam hiam?

❝ 𝐈𝐭'𝐬 𝐚𝐥𝐥 𝐟𝐨𝐫 𝐧𝐨𝐭𝐡𝐢𝐧𝐠 𝐢𝐟 𝐲𝐨𝐮 𝐝𝐨𝐧'𝐭 𝐡𝐚𝐯𝐞 𝐅𝐑𝐄𝐄𝐃𝐎𝐌.❞ - 𝐖𝐢𝐥𝐥𝐢𝐚𝐦 𝐖𝐚𝐥𝐥𝐚𝐜𝐞

#We_have_nothing_to_lose_but_our_chain