UI' MAKAIH GALKAP LEH HUMPINELKAI' MAKAIH GALKAP

UI' MAKAIH GALKAP LEH HUMPINELKAI' MAKAIH GALKAP

"Humpinelkai vive galkap 100 bawlkhia in a makai dingun ui khat na zat leh gal kidona khatpeuh ah a humpinelkai teng ui bangin si khin ding uh hi. Ahih hangin ui vive galkap 100 bawlkhia in a makai dingun humpinelkai na zat leh a ui khempeuh in humpinelkai bangin galdo ding uh hi."

- French galkapmang Nepolean Banoparte

Galkap makaih ding leh minam makaih dingin ui bangin ham bek a sik leh kutkut bek a si thei i zat lai teng gal kidona khatpeuh leh i mainawtna khatpeuh ah ui bangin kisi den ngitnget ding a, galkap leh minam makaih dingin humpinelkai bang i zat ciang bekin humpinelkai bangin kisi ding hi.

Ngaihsutna ding khuak nei tengin ngaihsun pha in, lungngaih dide hun ta hi. Kam bek tawh hamham a kutkut tawh i kimakaih lai teng bel leitung bei dong minam dangte suulnung bek kizuizui ngitnget den in, midang nuaineh in ki-om den ding a, i tuat ngil khitsa lampi bek mah tuan in kisiksik ngaungau den ding hi. Galkap hon zakhat makaih dingin ui galkapmang bang i zat lai teng ei minampih teng peuh, midangte leh minam dang teng peuh hong totpih baba thapai den lel ding uh a, i tun nopna mun hong tunpih zo ngei lo ngei lo ding uh a, i zawh nop gal dona bangmah kizo zo ngei lo ding hi.

Humpinelkai bang kimakaihsak ding i cih ciangin humpinelkai in ganhing a nopneh teng balzaan in a nek bangin minam dangte leh midangte balzaan gawp ding cihna leh thauvui leh thautang tawh nawk henhan ding cihns hi loin i deih leh i hamphatna i ngah dinga kilawmte i ngah theihna dingin hangsan takin hong makaih ngamte kimakaihsak ni cihna hi zaw hi. Elections politics ciang bek leh contractors ciang bek buaipih leh haipih in buai thapai den loin, sum leh za bek kituhna tawh political vision nei nawn kei ni. Humpinelkai in amah bek hi loin a tanote a khual banga hong khual ngap dingte bek kimakaih sak ta ni.

✍️ Thang Khan Lian