ZOMITE' KIGAWMNA DINGIN...
1. British kumpi in gam tuamtuam in hong khenna banah Khristian i hih zawh ciangin biakna tuamtuam hong lutte in hong khento lailai in (a tel lo ten bel pakta mahmah lai), denomination tuamtuam Baptist, Presbyterian, Salvation Army, Seventh Day Adventist, Methodist, Roman Catholic, Pentecostal, Church of God leh pawlpi a tuamtuam in hong khen uh hi. Jesuh Khrist ah pumkhat ding kim lai pen sai sa bangin hong khen uh hi. Biakna hanga kikhenna i pibawl lai teng i kituak ngei kei ding a, bangci leh dawi mangpa gam do thei ding i hiam cih ngaihsun pha a, biakna kilang neih leh thusanzia i mangngilh bawl mateng kipawlna leh kipumkhatna piang ngei lo ding hi. Khristian mission tuamtuam i gamah hong lut hanga kikhenna pen i khialna lianpi hi. Denomination tuamtuam leh doctrine tuamtuam i neih hangin ki-itna, kilemna nei a, pum khat i suah a, kipawl khopna neih i sawm ding ahi hi. Pasian thu hanga kikhen pen Pasian thu tawh kituak lo hi cih makai ten a genkhiat ngam ding kul ta hi.
2. I pau bulphuh a kibang hi a, neu khakha a kibang lo hi bek hi. I vekpi in Zo pau hi ci-in khat leh khat kisimmawh sak loin kisin ciat ding hi zaw hi. Comparative Word Book leh Dictionary khawng bawl in, kitheituah sawm ding thupi zaw hi. Tua bangin tangkam (common language) neih sawm a, tua pen Eight Shedule ah i ngah zawh ding sawm ding hi zaw hi.
3. Gam leh nam adingin phattuamna kipawlna (philanthropic organisations) - Youth leh Students organisation lam tuamtuam i neihte zong i min neute leh kampau minte damdam in kiamsak in, min kitang Zo cih tawh kipawlna i bawl ding i ngaihsut hun ta hi.
4. Zo suante nam khat leh nam dang khat kitengte ko bawl zaw loin a kitengsa tampite zong gensia loin pahtawi zawk ding kisam hi.
5.Thu kizakna tuamtuam gelh, Public leader kicite in zong Zo minamte pen pau kithei, puansilh nik ten kibang, pupa ngeina kibang, inn bawl, lo bawl dan a kibang minamte hi hang cih i tangkopih zawk a, a kibang lote sangin i kibatna tampite uang gen zawk ding kisam hi.
6. Zogam a pastor, biakna makaite in zong ki-itna ding, kingaih ding leh kipumkhatna ding gen pen Pasian leh Lai Siangtho deihna hi a, kikhenna ding, kitotna ding thu gen pen Satan deihna hi zaw hi cih theih ding kisam ta hi.
7. Tua mah bangin sum leh paai a neizaw, a citheizaw mite in in zong kipumkhatna ding, kilemna ding leh kizop khawmna ding lam ultung sak in, huhna sum zong a piak ngam ding uh kisam hi.
🖋️Thang Khan Lian
No comments:
Post a Comment