TUT MUN PAN LUNGGEEL

TUT MUN PAN LUNGGEEL

Zomi cih i minam minpi dingin zangin ciamtehna i ngah mateng i nomenclature tek uh kembit cinten ni. Minpi khat a kiciamtehna i ngah mateng bel nomenclature ah i kiciamtehna phiat leng gamdangmi hong kici ziau pah kha mah thei hi. Khat leh khat kimawhsak lo zaw in, tha kipia zaw ni.

Rev. Khup Za Go in LEIVUI PANIN cih a laibu bawlna laimai 294 ah... "Khatvei sangnaupangte khoppina khatah Siapi B. Kam Za Mung, Bethany Christian College, in Zomite pumkhat i suah ding a deihna thu tawh kizom in mipil khat kampau hih bangin hong gen sawn ngei hi:

Mi khempeuh mi khat suakin,
Mi khempeuh singkung khat suakin,
Gun khempeuh gunpi khat suakin,
Tua mipa in tua heipi tawh tua singkung pen
Gunpi sungah phuk suk dam ta zen leh,
A tui sat ging ngaih zen sin teh..

a cih lungaihhuai mahmah hi.

Pil lua, lungsim zang lua napi eima angsung ding bek khual lua tentan mipil lua leh khuak tam zang lua i tam luat manin unau si khat laigui kizom Laizom teng unau beel kang kituh a kibang hi cih ka muhna leh theihna panin sinna (experience) hi. Evan Do Khup in a la phuahna a,

"Sin lungmawl tuanna pupa ten maw
sianmang sum banga biak lai..
Zogam sung bup sinthu khatin luang khawm
Pawl kikhen cih om se lo.
Siamsil sin vabang i pil ciang maw
Sam gibang kikhen sese..

Siamsil sin lungpil Zo vontawi ten
Na degree na buai lakte
Zo vontawi tubang a gawm na hiam?
Phil tangbang a thehzak hiam?
Zo lei-ah mimbang nong piang zenzen
Zo tawi teng a nuam ding hiam?

Singlamteh tuibang i gawm na'ng hi
Ciimnuai piang Zo vontawite
Zomi ah tuibang kigawm kei leng
Sen gual ten nuihciam leel ding.

a cih ngaungau lungngaihhuai sa mahmah ta ing

I Zogam kil bang khang gual tung tuangin
Sim leh mal tui bang kigawm
Pumkhat suakin ma suan khawm ve ni.
Lia leh taang lung kituak, pilna siamna sit loin,
Gam leh nam adingin sem ciat ve ni.