SIATNA KHEMPEUH MANGPA US LEH LEITUNGA KUMPI GILO A GUPTE THU

SIATNA KHEMPEUH MANGPA US LEH LEITUNGA KUMPI GILO A GUPTE THU

May 9, 2017: USte hihna bangbang history thuman ka theih bangin ka gen ngam giapgiap manin "anti-America, Muslimte hi, ISte makai hi, a laigelh deih kaih lua hi, phuahtawn teng gen hi, kam khat suah hi, mize hi, mihai hi, kipilsak hi.....blah blah blah .." cih leh min dang tampi ngah khin ta ka hih manin luaksuahhuai, cimtakhuai leh nuihzakhuai sa lua khin zo ka hih manin na zak ngei loh leh na zak nuam loh teng uh hih thu tawm hong kaikhawm pk ka hihi. US pen a langpang leh a gensia ka hi kei a, ahihna man uh, "Siatna khempeuh Mangpa", "Mother of terrorism" ahihna a gen bek ka hi lel a, USte mimal in muhdah tuam ka nei kei hi. Tangthu/tuanthu (history) na kan loh man, sin loh man, sim loh manin leh theih kilkel loh manin a gensia leh a langpang hong ci ngam bek na hi hi. US gam kiphuankhiatna dingin Mikangte leh Europe (UK, Spain, Portugal, France) ten leitung adingin mi lomthahna nasia pen lai tualsuak mite "Natives Americans" 100 millions a lom thahna (genocides) thu uh leh, Native Americans (Red Indians) ten a tangthu uh, a leitang uh, a pupa ngeina uh a suplawhna thu uh leh 1492 pek panin gamkeek Terrorism dona in Homeland Security a pat khiatna thu pek pan in sut daudau loin kum zalom 20 a kipan in i sutsuk ding hi. US Founding Father leh US President thumna leh Declaration of Independence gelh Thomas Jefferson (April 13, 1743 – July 4, 1826) in, "Kumpi hoih in thukham tawh kituak a nasep ding masa pen leh a nasep ding om sun pen mihingte nuntakna suksiat ding hilo in, humbit ding hi zaw hi," a cih ngaungau America President dang ten a palsatna thu sut ding hi hang.

Leitung bup ah a beisa kum zalom, na pu na pa khang a kipanin US kumpi in sum tawh huhna (financial assistance), pilna siamna sinna (education), galvan (arms), galkap tintan (military training) leh galvan bawl ding dan huhna thukham khauhtak-a zuih ding deih, amau deihna bek tawh gam uk kumpite (authoritarian, dictatorship regimes) na pia den uh a, tu dong mah piapia lai-in, kumpi kilaihna pian’sakna dingin tua bang mah in lungphona nei ding mite, kumpi lehdo (rebels) leh dipkuatna, patauhna piangsak ngongtatte (terrorists) huhna na pia khin zo a, tu dong mah piapia lai hi. Hih banga US ten Russian Revolution kipat ma pekin authoritarian kumpite huhna pia-in a gamtatna pen paulap ding tuamtuam a neih den hangin United States Constitution sunga "democratic ideals" ci-a thu tuang tawh kilehbulh den hi. US in hih bangin authoritarian kumpi a gupna pen economic leh political masa sakna hang hi ci-in paulapna ding zong den a, Truman Doctrine leh Kirkpatrick Doctrine in zong na siamtan den hi. 1980s khit a kipan (Iran Revolution khit) in US kumpi in Middle East ah Islamist movements hangin US hamphatna ding lauhuaina piangsak thei hi ci-in amau thuzawh lah leh kipolhpih zawh loh authoritation kumpi teng tuam koih ding, laih ding, kithuahpih loh ding ci-in a policy laih hi. A beisa kum tam lo a kipanin policy analysts leh commentators tampi ten US policy a gupna thukimpih hong tam mahmah uh a, US in War on Terror policy a zat leh US Constitution tawh a kilehbulh hangin mun tuamtuam ah “regional stability” kici bitna ding pen democracy sangin poimawh hi cih haipih uh a, hih thu hangin terrorism dona ah gualzawhna piang zo loin, tualgal hangin leitung bup ah galtai kizeel khin ta hi. US in tu dong authoritarian kumpite (regimes) tu dong gup in, huh den ngitnget lai a, tua bang kumpite ukna gam, adiakin Middle East leh Africa sung pen terrorist pian’na phualpi hong suak hi.

Global Research in April 1, 2017 in a suaksakna ah hih bangin USte Galpi Nihna khit nungin gam 37 ah a kigolh man un mi 20-30 millions val in sihna tuak ta hi ci-in ciamteh hi. Korean War leh Vietnam War ah kumpi gilo a gup man uh leh Iraq nih vei a simna hangun mi 10-15 million kikal si a, Korean War ah zong Chinate 900,000 si a, Vietnam War ah Cambodia leh Laos gam mite tampi si kha hi ci hi. Afghanistan, Angola, Democratic Republic of the Congo, East Timor, Guatemala, Indonesia, Pakistan leh Sudan zong USte kigolhna hang leh kumpi gilote a gup manin 14 millions val in sihna tuak hi ci-in kiciamteh hi. Your News Wire in a genna ah Galpi Nihna khit US in gamdang kum 50 bang na laih in (tu dong a zuih ngekngek uh regime changes kici), tua gamte ah kitualvatna (riots) leh tualgal (civil war) tampi piang hi ci hi. Tu dong Libya, Afghanistan, Iraq leh Syria ah muh theih lai hi. US in 9/11 (Sept. 11, 2001) in a gam uh a suamsak Obama bin Laden paulam in Afghanistan gam 2001 in na sim hi. US in a kigolna hangin leitung gam tuamtuam ah 9/11 kici 10,000 vei piangsak hi cihna. Galpi Nihna in Nazi ten Judahte 6 million na that uh a, tu dong history ah Nazite dawi gilo bangin mi tengin gencim mawh lai hi.

*Afghanistan: Afghanistan gam uk Communist ten mujahideen kici kumpi lehdote do dingin Soviet galkapte huhna na ngen uh a, Soviet in 1979 in galkap sawl hi. US in Soviet in Afghanistan sim hi ci-in muhahideente huhna na pia a, kidona hangin mi 1-1.8 million in sihna tuak a, tua zong USte hang hi ci-in Global Research in ciamteh hi. Soviet galkapte sisan luanna ding leh Afghan nautang mawh nei lote sisan luanna ding leh thahna dingin CIA ten 5-6 billion dollars na beisak uh a, kum sawm gal sungin US market panin 60% Afghan galkap ten zakang (heroine) na matsak uh hi. September 11, 2001 in US in Afghanistan a simna hangin April 1, 2017 mi 12,000 sihna ah US a langtang in mawhpuakna (directly responsible) nei hi.

* Angola: Portugal-te ukna deih loin Angola mi ten 1961 in thau tawh kiphinna nei uh a, 1977 in UN in Angolan government a ciamteh hangin US in thukimpih lo hi. 1986 in US (Uncle Sam) in galvan tawh kumpi lawnthal dingin UNITA ngongtatte thau leh sum leh training na pia hi. Angolo kumpi huh dingin Cuba in galkap 50,000 a sawl manin US mipi ten US kigolhna gum uh hi. CIA ten Zaire gam panin a sim tham in (covert invasion) sum tawh UNITA huh a, hih kidona hangin mi 300,000 - 750,000 kikal in sih lawh hi. *South America gam ah zong US in Argentina ah dictator gum in Operation Condor na zang a, Bangladesh leh Pakistan ah zong dictatorte huhna na pia hi.

*Bolivia: Bolivia gam-a dictator Hugo Banzer in 1970s panin ngongtatna tawh a gam na uk a, Indians minamte leitang leh tin (sik nam khat) tohkhiatna khukte na suhsak hi. US Air Force radio system in galkap thahatna tawh thuneihna a lakna (coup) dingin na huh a, Banzer in dictatorship a let kum khat sungin US in huhna nih vei na pia a, tua khit tam veipi na piak beh hi. Banzer in tin nasemte a lom thahna hangin Catholic Church in a mawhpaih hangin CIA ten Banzer huh in leftist siampite (priests)leh sisterte (nuns) tampi kithat a, hih bangin a thahna pen Banzer anti-clergy strategy kici a, CIAte huh hi. Banzer Plan pen 1977 in Latin American dictatorships 9 in Banzer Plan na zui in, siampite leh sisterte tampi kithat hi. Banzer uk sungin Bolivia bek ah siampi leh sister 400 val kithat hi.

*Cambodia: Vietnam War deih loin Cambodia gamah lungphona neite US President Johnson hun panin a sim in bomb kikhia a, a langtangin President Nixon hun a kipanin bomb kikhia hi. USte bomb khiatna hangin khua tampi kisia in, galtai tampi hong piang manin hih thu hangin Khmer Rouge political party neu khat Pol Pot makaihna tawh hong piang hi. US in Pol Pot dictator a suahna ding leh coup tawh thuneihna a lakna dingin huhna pia a, Pol Pt uk hun sungin Kher Rouge ten mi 2.5 million val that uh hi. Vietnam in Kher Rouge partyte gamtatna deih loin 1979 in Cambodia va sim uh a, tua hun in CIA ten Khmer Rouge-te huh lai hi.

*Chad: CIA ten sum leh galvan tawh a huhna hangin June 1982 in Chad gamah Hissen Habre in dictatorship tawh kum 8 sung uk zo a, a uk sungin a kumpi in mi 40,000 kiim that hi. Human Rights Watch in mi tul tampi kithahna ah tu-in Senegal gam-a galtai Habre kigolh hi ci-in 2001 in Chad ah 'war crimes' thukhenna tuaksak ding hi ci hi. Human rights in zong Belgium ah thusitna neih ding hi a cih hangin June 2003 in US in Belgium kiangah NATO headquarter na zindona (hosts) uh khahsuah thei hi uh teh ci-in vau ahih manin Belgium in legal proceeding pan ngam lo hi. Ahih hangin kha nih zawh in Habre thusitna dingin special provision bawl ding hi cih law kipass veve hi. US lawhsapna khat mah hi.

*Chile: Chile gam-a kiteelna ah 1958 leh 1964 in CIA kigolh hi. 1970 in zong socialist candidate Salvador Allende president dingin a kiteelcing hangin CIA ten a president honna ni-in "military coup" bawl dingin vau napi Chilean army’s chief of staff General Rene Schneider in CIAte thumang nuam lo hi. CIA in galkap leh mipi pawl khat tawh coup (aana tawh kumpi laih ding) leh Schneider thah ding a sawm hangin lawhsam hi. President Nixon in CIAte kiangah, “Kumpi laih theihna in 'coup climate' piangsak un la, a economy uh kap in, thum sak un,” ci-in thupia hi. Nixon leh CIA ten a geelna bangin galkap tawm khat kipawl a galdona (guerilla warfare), inn kihalna (arson), bomb puahsakna leh dipkhuatna in Chile gam hong nuai pah hi. ITT leh US corporations in lungphona leh kiphinna nei ding mipite sum tawh guai uh hi. September 11, 1973 in Allende hong si takpi hi (amah leh amah kithat hi a kicih hangin mi that hi kici hi). Tua hun in US Secretary of State Henry Kissinger in Chile kumpi in a gam mite thudon lo a, Chile pen Communist gam a suahna dingin ding mawkmawk a i om ding ka en thei kei hi ci hi. Allende’ zalaih dictator General Augusto Pinochet in kum 17 a uk sungin Chile mi 3,000 kithat a, mi tampi kibawlsia in, mi tampi mah mang hi.

*Colombia: Colombia in 1960s in US in Colombian state terrorism a gup manin mi 67,000 in sihlawh uh hi. 1994 in Amnesty International report in 1986 khit nung politics hangin mi 20,000 sihna tuak lawh hi ci hi. Amnesty in Columbia galkap ten “counter-insurgency” kici paulap in guihtheih zuakte do a kineihna ah US in galvan tawh galkapte huhna pia hi ci hi. 2002 in ciamtehna khatin a genna ah US in sum tawh tualgal pian’na dingin a huh manin kum sim in mi 3,500 si den hi. 1996 in Human Rights Watch in a report na-ah CIA Agent ten “Assassination Squads in Colombia” kici mi that dinga galkapte 1991 in huhna pia a, mi tampi in sihlawh hi ci hi. Nung kum lam diak in US government in Plan Colombia tawh huhna a piakte Colombian government in khaici suksiatna ding leh paramilitary group kicite huhna dingin a sumte zang hi cih ngawhna om hi.

*Cuba: CIA Agent leh amau tawh kipawl rebels ten April 18, 1961 in Cuba na sim uh a, ni thum sung kidona piang hi. Hih pen "Bay of Pigs invasion of Cuba" kici a, Cuba simte 114 kithat a, 1, 189 kiman a, a simte ngak a om USte teembaw ah tuang in, tam lo suakta uh hi. A kimante thusitna kineih pah a, USte thusim imcip teng kithat pah a, a phollakkhia ngam teng Cuba suam leh lehpei (treason) in kingawh a, kum 30 thongkia dingin dan kipia hi. US ten a uino teng uh kha 20 in an leh zatui $53 million man ding huhna Cuba kumpi Fidel Castro oia in, tua tawh tankhia uh hi. Cuba gam-a US in huhna a piak kumpi lehdo thautawite 2,000-4,000 kiim kithat a, Cuba galkap 1,800 open highway ah napalm kici sih theihna gu a kizang gam halna tawh si uh hi. Cuba galkapte US ten tua bangin napalm tawh open highway ah a thah bangin 1991 in US in Iraq a sim lai-in "Highway of Death in Iraq" kici ah zong mi tampi that hi. Chemical tawh mi that a ngawh a, a khut tawh mi kawk US pen a tatsia pen hi lai hi.

*Democratic Republic of Congo/DRC (ni dangin Zaire a kici) ah Belguim kumpi King Leopold in 1879 in kitualvatna na piangsak masa a, kum sawm nih sungin “Leopold’s Genocide” kici hangin mi 10 million in sihna na tuak hi. DRC ah a beisa kum tam loin US hangin 3 million val in sihna tuak beh kik hi. 1960 in DRC suahtakna ngah a, Prime Minister dingin Patrice Lumumba a cin' hangin CIAte geelna tawh kithat hi. Pawl khat in bel Belgium ngawh hi. A bangbang ahi zong CIA ten na thah sawm den a, a that dingin scientists Dr. Sidney Gottlieb kici a thahna dingin“lethal biological material” van pua lutsak hi. US leh DRC gam kiimte geelna tawh DRC ah tualgal piang den hi. April 1977 in Newsday report in CIA ten gamdang panin sum tawh a kiguai galkapte (mercenaries) mi za tampi US, UK leh Zaire panin guai uh hi. 1977 in in US in Angola panin Zaire kumpi langpang thau tawite dona dingin Zaire President Mobutu $13 million tawh huhna pia hi. May 1979 in US in million tampi tawh Mobutu a guaih hangin a thuzawh zawh nawn loh ciangin kha thum khit in US State Department in human rights palsat in Mobutu ngawh leuleu hi. Cold War hun lai-in US in Zaire gamah 300 million dollars man galvan pia a, Mobutu' galkapte training na dingin $100 million pia hi. 2001 in U.S. congressional committee in American companies leh US President George Bush Sr., lui in zong Congo panin sum tampi ngah hi ci hi. Zaire gamah leisung sumpiang kituhna hangin international battle kici kidona ah company 125 kigolh a, a leisung sumpiang kituhte lak ua khat pen cell phone bawlna ding coltan kici kituhna hi a, mimal in zong mi tampi kigolh hi.

*Dominican Republic: Dominican Republic ah 1962 in Juan Bosch in president len a, land reform leh public works programs cihte nakpi takin nasep kipan pah hi. Hih thu hangin US in a nasep hoihte zadah in kiho thei lo pah uh a, kha 7 bek president a let in CIAte kigolh in paikhia uh hi. Juan Bosch gum ten 1965 in president a let kiksak sawm hangun US President Johnson in, "Hih pa hoih lo hi," ci a, Assistant Secretary of State Thomas Mann in, "President aw, kumpi thak ding i muh kei leh Bosch dang khat i guang ding hi," ci hi. A cih khit ni nih in US in Dominican Republic sim dingin galkap (Army) leh marines 22,000 sawl a, kidona ah mi 3,000 si hi. US in gamdang mite humbit ding cih paulam a galkap a sawl hi a, guallel in kidok kik hi. Hih bangin paulap man lo tawh tu dong gam a simsim den USte bek hi lai hi.

*East Timor: December 1975 in Indonesia in East Timor sim hi. East Timor a zin US President Gerald Ford leh Secretary of State Henry Kissinger in a nusiat khit a zing in Indonesia in sim hi. US in Indonesia President Suharto in American galvante a zatna dingin phalna pia hi (* US law ah gamdang simna dingin US galvante midang zat ding kiphal lo hi). UN-a US Ambassador Daniel Moynihan in, "A gamtat bangun piang hi," ci hi. A result pen East Timor gam bup milip 700,000 lak panin 200,000 in sihna tuak hi. US galvante guallelhna mah hi kik hi. Kum 16 khit nung November 12, 1991 in East Timor gammi 20,017 in Dilli khua ah "memorial service" ah lungphona nei uh a, US in training a piak commanders Prabowo Subianto (General Suharto' makpa) leh Kiki Syahnakri makaih “Indonesian Kopassus shock troops” kici ten thau tawh lungphona neite lom thah uh a, a luangte uh truck tampi in kipua a, tuipi ah kipai hi. USte training piakte gamtatna leh siamna hih bang hi.

*El Salvador: El Salvador tualgal pen US in a pian’na dingin $6 billion tawh huhna na pia a, 1981 - 1992 dong tualgal hangin 8 million in sih lawh hi. Tualgal hun sungin US military advisers ten El Salvador galkap ten khangno thong a kikhumte a bawlsiat zia ding uh sinsak uh hi ci-in Salvadoran National Guard panin a taikhia khat New York Times ten a interview na suaksak uh hi. Hih Salvadoran National Guard galkappa in US military advisers ten Panama gamah mi bawlsiat ding dan hong sinsak uh hi ci hi. 1981 in El Mozote khua-ah mi 900 kithat a, a that mi 12 lak panin 10te US galkapte training piak kumpi galkap hi a, galkap ten mi bawlsiatna dingin US in a hon ‘School of the Americas’ kici panin graduate ngahte ahi uh hi. School of the Americas kici panin graduate ngah galkap ten tualgal sungin mi 75,000 that uh hi. 1993 in United Nations’ Truth Commission report in Salvador galkap tawh kipawl Salvadoran army or the paramilitary deaths squads ten tualgat sungin a gamtatna uh-ah 96% val human rights palsat uh hi ci hi (hih tualgal thu movies in zong et theih ding tam mahmah hi). UN commissions in School of the Americas guaduates ten mi tampi that in, mi neihsa suhsak in, numei tampi buan uh hi ci hi. USte training piakte gamtatna leh huhna sumte kizatna hih bang hi.

*Grenada: CIA ten 1979 panin Maurice Bishop in president hong let a kipanin Cuba langpang dingin "quarantine of Cuba" ah kihel dingin a cial zawh loh manin a kumpi zaa panin laih ding na hanciam pah hi. CIA in a lot khiat ding ngimna tawh October 25, 1983 in Grenada na sim a, mi 277 in sihlawh in, President Bishop laih zo hi. US in Grenada a om medical studentte nuntakna lauhuai a, Grenada in airport a bawl pen US simna dingin kizang thei ding hi ci-a a sim ahi hi. Paulap man lo zanga mi gam sim US hi.

*Guatemala: Guatemala president dingin 1951 in Jacobo Arbenz kiteelcing a, United Fruit Company in a leitang zat lohte sum tawh huhna a piak kik dingin liausak hi. A company in Arbenz nasepna pen "international conspiracy" hi ci-in ngawh in, a ukna laihna dingin mercenaries 300 guai a, tua ten datsi supply leh meileeng taina nawngkaisak uh hi. 1954 in CIA in Arbenz aana tawh laihna dingin a sawm manin Arbenz in a gam taisan hi. Tua khit kum 40 sung CIA in gam uk dinga a koih kumpi ten mi tul tampi that uh hi. 1999 in Washington Post news in Historical Clarification Commission panin a muhna ah tualgal sungin mi 200,000 kithat a, mi 42,000 tungah human rights kipalsat (mi 29,000 tungah sih theihna ding dong) a, galkap ten human rights 92% palsat hi ci-in suaksak hi. A commission in a gen behna ah government leh CIA ten Guatemalan government in guerilla movement mulkimhuai takin a betdaihna dingin nawh den hi ci hi. Commission in a genna ah 1981 panin 1983 in galkap ten Mayan mite khua 400 a suksiatna ding leh mi a hon thahna dingin US kumpi in sum tawh huhna pia a, US State Department official 966 memo panin a kimuhna ah "safe house" kici kumpi huang sungah a kibawlna dingin US ten huh a, Guatemalan security agents ten leftist kiphinna nei thau tawite leh amau a gumte thahna dingin Guatemalan “dirty war” kici gal bawlna ding US in sum tawh huh hi cih kimu hi ci hi.

*Haiti: 1957 - 1986 kikal Papa Doc Duvalier in uk a, tua khit a tapa in uk kik hi. A pata un a uk sungun private terrorist force ten mi 30,000 panin 100,000 kikal that uh a, amau uk sungin CIA ten million dollars tampi tawh popular movements betdaihna dingin huh a, a sumte Israel panin covert channel tung tawn in lut hi ci-in William Blum in ci ci hi. Duvalier 2nd term in US in CIA zangin mi tam kithat mahmah hi. US in a uk lah pian ciangin mivomte siampi (black Catholic priest) Jean Bertrand Aristide president dingin tawsawn uh a, 1990s kiteelna ah 67% takin a cin’ hangin Haiti gam-a mikang sum nei diak pawl ten mivomte ahih manin leh zawn'na leh nekgukna beisakna dingin social programs a bawl manin deih lo uh a, paai zo uh hi. Tawl khat khit in president cing kik napi US in a nasep hoihte deih loin tawp dingin nawh den a, sawt len zo tawp in, tu-in South Africa ah peem hi. Na hoih sem kumpite a lehdo den mangpa US hi.

*Honduras: 1980s in CIA ten Battalion 316 galkapte gum uh a, hih galkap ten mi bawlsiat, mi pimang nak ciin’ mahmah in, mi za tampi that uh hi. Mi bawlsiatna leh a bawlsiat ding dan (Torture equipment and manuals) CIA ten amau adingin nasem dingin a sum tawh a guaih uh Argentina galkap ten training pia uh hi. Mi 400 val kithat hi. Hih bang bawlsiatna leitungah a pian’na dingin US in sum tawh mi a guaih hi zen hi. Battalion 316 ten mi bawlsiatna dingin "shock and suffocation devices" zangin 1980s in mi thusitna nei uh a, thongkiate US in tu nai diakin Cuba gam-a Guantanamo Bay leh Iraq gam-a Abu Ghraib thongkiate a bawlsiat bangin bawlsia uh hi. Thusit dingin kimanna nei nawn kei a cih uh ciangin that uh hi.

Honduras buaina pen 1980s in Contras ten Nicaragua ah socialist Sandinista government laih ding a hanciam a kipanin buai kipan hi. Honduras ah buaina pian’sakna dingin US Deputy Secretary of State John D. Negroponte in kum sim in Honduras adingin military aid kici huhna $4 million panin $77.4 million kikal pia den hi. Negroponte in Honduras kumpi ngongtatna leh mithahna thu thei kha lo hi'ng a kicih hangin a zalaih Jack R. Binns in 1981 in report a piakna ah US in mi thahna dingin sum tampi US a piak den lamdang a sakna thu gen khia hi. US ulian khempeuh zong a thuman lo na hi sam lo hi.

*Hungary: Hungary gam pen 1965 in Soviet satellite nation hi napi suahtakna deih in, kiphinna hong nei hi. Hih bang kiphinna a om lai takin US Radio Free Europe in in Nitumna gam ten Hungary huh ding ci-in thapia uh a, rebels ten radio broadcast um in Soviet do dingin tha ngah mahmah uh hi. Ahih hangin hih radio broadcast in a thapiakna pen a lamente adingin liim vompi suak a, Hungarian rebels leh Soviet galkapte kidona hangin mi 3,000 in sih lawh a, Soviet in kiphinna beng dai hi. US pen huih bungpi ahihna leh muan ngam loh ding ahihna a mediate tung panin kitel a, tu dong a mediate uh a huih um tam mahmah lai dep hi.

*Indonesia: 1965 in US in a gup General Sukarno ukna galkap thahatna tawh General Suharto in thuneihna hong la (coup de’tat) hi. Hih galkap thahatna kumpi kilaihna (coup) pen US in a tawsawn na hi thong hi. Hih thu pen Indonesia gam-a US embassy a sem ulian lui Robert Martens in US diplomats leh CIA in kumpi aana tawh laihna dingin 1965 in Indonesian Army death squads galkap 5000 min pia a, tuate min ki-encik in, pawl khat kimanin pawl khat kithat hi ci hi. Martens in, “Hihte sihna ah ka khut ah sisan tampi bang a, ahih hangin a si khempeuhte sisan bel bang lo hi,” ci hi. Hih kumpi kilaihna a pian’ theihna dingin mi 500,000 panin 3 million kikal si dingin ki-ummawh hi. 1993 – 1997 kikal US in Indonesia kumpi $400 million a piak banah galvan million 10 tampi zuak hi. Indonesia elite force galkapte pen US Green Berets ten training pia a, Indonesia elite force galkapte pen East Timor ah mi tampi ngong thah leh numei buante ahi uh hi. US in a gupte gum den loin khem zel a, a training piakte gamtatna hih bang hi lel tak hi.

*Iran: 1980 – 1988 kikal in Iran leh Iraq kido a, tua hunin US in Iraq huh hi. July 3, 1988 in US Navy teembaw Vincennes kici Iran tuipite ah va lut in, Iraq galkapte va huh hi. Irante galdona teembawte US Navy teembaw Vincennes in missile nih tawh a kap hangin kha lo a, Iranian Airbus vanleng va kha in, a sunga tuang khempeuh, mi 290 in sih lawh hi. USte galdo siamna kilatna khat hi. Iraq-Iran War pen 1980 - 1988 kikal hi a, US tawh kipawl Iraq mite mi 105, 000 in sihlawh hi ci-in Washington Post in gen hi. US National Security Council-a ulian lui Howard Teicher in, “Hih kum giat gal sungin US in billions dollar tampi tawh Iraq gam uk Saddam huh a, chemical galvan a kiciamteh biological agents zong pia hi. US in hih bangin Iraq ah pen Iraq gam-a Basra khuapi a kidona ah Iran in zo ding hi cih a kitel manin biological agent nangawn tawh huhna kipia hi,” ci hi. Tua hun lai-in Iraq dictator pen Saddam hi a, a chemical zatte pen US in a piak cih kitel hi.

*Iraq: US in Iraq a huh hangin Saddam a uk zawh loh ciangin a sim banah 1990 – 2003 kikal khalna (sanctions) koih khum zaw lai hi. Iraq in Aug. 2, 1990 in Kuwait va sim a, US in Iraq galkapte nung kik dingin a kunh hangin Saddam in mang lo hi. Bang hang hiam cih leh US Ambassador April Glaspie in Saddam kiangah Kuwait tawh na kibuaina uh-ah US in kigolhna nei lo hi a cih manin Iraq in Kuwait a sim pen US in hong awi lah ken teh ci-in US in Saddam a kihtak manin a ngian ahih lam pawk pha lo hi. Saddam in a mang nuam loh ciangin Aug. 4 in US in khalna bawl hi. US in Iraq a sim theihna dingin in US gam mite “public relations strategy” ding geelna leh mipi ten Iraq sim ding a gupna dingin US gam-a Kuwait ambassar (Kuwait pen Iraq tanu kici hi) in US Congress ah a zuau bulom teng va gen a, “Iraq zato innte ah naupangte khualum leh khuavot thuaklah lohna dinga kizang ‘incubators’ kilak khiatsak hi,” a va cih ciangin US President H.W. Bush leh US Congressmen teng va khem dipdep zo hi. US in January 17, 1991 in Iraq tung lam panin kap hong kipan a, ni 42 sung bomb khiat ngetnget den hi. February 23 in President H.W. Bush in US galkap ten lei lam panin galdona tawh a nawkna dingun thupia a, US leh a pawl ten a kisam lopi-in bomb a khiat khit dipdip khit nungin lei lam panin a nawk manin Iraqte mi 200,000 kiim si a, US galkap 150 bek si hi. A tung lam-a i gensa “Highway of Death” ah US in hehpihna bei-in chemical zangin Iraq mite tampi lom thah hi. US in hehpihna bei-in a mithahna bek hilo in chemical lak panin a hat pen leh nuclear bomb a kibawlna uranium kisiasa (depleted) ton 400 tu dong US in Iraq ah nusiat hi. Hih uranium kisiasate US in a nusiatna hangin liamna leh sihna nautang tampi a khua nungin tuak beh lai a, USte khalna hangin mi tampi a puksih banah khantohna dinga kisam nate (infrastructures) tampi kisia hi. 1995 in UN Food and Agriculture Organization in Iraq gamah UN in khalna (sanctions) a bawlna hangin 1990 panin 1995 kikal in naupang 560,000 sihna pen US mawhna hi ci hi. TV Program 60 Minutes a sem Leslie Stahl in 1996 in UN ah USte Ambassador Madeleine Albright kiangah, “Iraq na simna hangun naupang million lang val in sihlawh a, Hiroshima ah atom bomb na khiatna sangun naupang tam tam si zaw hi. Naupang milloin langte nuntakna manphatna na tel ding hong um ing,” cih khum hi.

1999 in UNICEF in Iraq gal hangin US in khalna a bawl manin kha sim in naupang bek 50,000 si den hi ci-in a report ah gen hi. Richard Garfield in tua khit in 1990 – 1998 kikal in naupang kum nga nuai a beisa kum 10 sangin tam si zaw a, naupang 227,000 si hi a cih hangin report dang khat in 2000 tan in naupang 350, 000 US sanction hangin si hi ci hi. US sanction kum thum om lai a, tua hun a sih behte kisim lo hi lai hi. US in naupang leh nautang tampi si ding hi cih thei napi in Iraq nih vei tak sim a, Saddam’ ukna laihna dingin nautang tampi gawl mek ngam ngiau hi. Iraq gam a sim masak hun sa nai loin 2003 in Saddam in milom thahna ding galvan (WoD) nei hi ci-in a khemzawh gam a pawl teng cial in, sim kik leuleu a, a simna dingin a paulap WoD tu dong kum kum 14 sungin khat beek mu zo nai lo lai uh hi. Researcher Johns Hopkins in US in Iraq a simna hangin mi 654,000 si a, mi 600,000 pen bangmah khual lo-a ngongtatna (violence) hanga si hi ci hi. Hih banga mawhna nei lote sihna pen i gam makai ten mawhpuakna a lak ding uh kisam hi ci hi. US in Iraq nih vei tak a sim hangin a bei thei lo ding bang liang galdodo lai a, tu dong gualzawhna mel ngah loin, nautang tu tampi sihna leh puksihna piangsak hi. USte thukhualna leh hehpihna a thupit zia hih bang hi a, IS piangkhiasak in, huhna a piak beh lai Siatna khempeuh Mangpa hi takpi hi.

*Israeli-Palestinian War: US in Israel mawhna leh thuman lohna nangawn ah gum hi. Israel leh Palestinete kidona hangin mi 100,000 - 200,000 kikal si a, a tamzaw pen Palestine mite hi. US in billions dollar tampi tawh Israel huh a, offial ciamtehna ah Israel in nuclear galvan nei hi ci-in a kiciamteh nai loh hangin US in Israel ten nuclear weapons a neihna dingin gum mahmah hi.

*Korea, North and South: Korean War pen 1950 in kipan hi ci-in Truman administration in ci hi. North Korea in June 25 in South Korea sim hi. North ten a simna hong pian’khiatna pen gam nih ten gamgi ah galkapte a lutsak tuah manun hong piang hi zaw hi a ci zong om a, North ten South a sim man hilo hi ci uh hi. South Korea ten gamgi panin 1948 pan North Koreate kap na kipan masa ngekngek ta uh hi. North Korea government in 1949 in South Korean galkapte 2,617 vei hong lut uh hi ci hi. US in UN resolution in hih gam nihte buaina gamdangte a kigolhna dingin phalna a piak ma-in mun tenga kitaklah den leh gualzawhna ngah ngei mel lo US in North Korea kap na kipan a, chemical galvan a kiciamteh ‘napalm’ zat na pan pah hi. Hih Korean War ah a lom sih pen South Koreante, North Koreante and Chinese-te hi. Sources tuamtuam li in a genna ah Korean War hangin a si 1.8 - 4.5 million kikal hi ci a, source dang khat in bel 4 million si hi ci hi. US Army pension leh Chair of the Korea Committee of Veterans for Peace len John H. Kim in, “Korean War kipatna US Army, Air Force leh Navy-te a langtangin hong kigolh man leh 3 million nautang Koreate sihna sisan bang uh hi,” ci hi. US in North Korea ah bombs 650,000 tons leh napalm bombs tons 43,000 tak khia ta zen hi. Source dang khat in a genna ah Korean galkap bek 500,000 hih gal ah si hi ci hi. North Koreate US tungah a lungkim theih loh pen a lamdang hilo hi cih kimu thei hi. Chemical galkap zat US in mawhsak ding a zon pen a nuihzakhuai pen thu hi lai hi.

*Laos: 1965 – 1973 kikal in Vietnam War ah US in Loas gam bek ah bombs tons 2 million tak khia hi. Hih pen Galpi Nihna hun lai-a bomb kikhiate sangin tamzaw hi. Loas gam mite gam bup milip seh li suah seh khat galtai uh hi. Hih pen “secret war” kici a, ahih hangin media ten US gamtatna ahih manin thuman leh thu tam suaksak lo uh hi. Branfman kici pa bekin mi sih ding tuatna nei a, mi tul za tampi si hi ci a, mi 2,000 kiim si dingin kituat hi. US galkapte Laos gamah a kigolh uh pen Vietnam gal ma pek hi zaw a, 1950s in tualgal a om lai pekin US in leftist political party Pathet Lao langpang dingin Loas gam mite galkap ding mi 40,000 na guai hi. Leftist political party Pathet Lao langpang dingin mi 40,000 a guaih banah bomb tons 2 million a khiat hangin US in su beuh cia gamah na guallel dikdek a, Laos ah a kigolhna hangin mi 200,000 in sihna tuak lawh hi. USte galdo siamna leh thusiamna hih bang hi.

*Nepal: 1996 in Nepal ah tualgal hangin Nepalite mi 8,000 – 12, 000 in na sihlawh hi ci-in Foreign Policy in Focus in ciamteh hi. US in American M-16 submachine gun (950 rpm) 8,400 a zuak man leh US military adivers-te tung khit nungin sihna tuak nasia takin khang ci-in kiciamteh hi. Nepal gam pen 85 percent khuapi pualam/khamtung (rural) gam ahih manin “land reform” kisam mahmah hi. 42% pen a zawngte lakah a zawng diak (below the poverty level i.e. BPL) in kiciamteh hi. 2002 in tualgal dang khat hong piang leuleu kik a, US President George W. Bush in Congress ah bill pua lut a, $20 million galvan tawh huhna ding Nepal kumpi piak ding thupia hi. US pen cimawhte a huh hi zaw loin cimawhte liamna ah ci a nuhsak ngekngek den hi kawikawi zaw hi.

*Nicaragua: 1981 in Sandinistas in Somoza government lawnkhia a, 1990 dong Sandista government leh Conta rebels-te kidona hangin mi 25,000 in sihlawh hi. Contra rebels kicite pen Somoza’ national government om laite (remnants) kipawlkhawmna ahi hi. Contras rebels ten gamvai sai makaite a thahna (assassination) uh 1984 in kitheikhia pan hi. US in pawl nihte kidona ah a gualzo zaw pen kumpi a gup hangin a sim tham in galvan tawh huhna communist deih lo Contras (anti-communist guerillas)-te huhna November, 1981 panin piak kipan hi. US Congress in CIA ten Nicaragua kumpi dona ah Contra rebels-te Congress phalna lo tawh a piak lam a theih khiat ciangin 1983 in Congress in Boland Amendment passed a, CIA, Defense Department leh US government agency dang ten a sim tham in galvan a piak ding dal hi. Ahih hangin Boland Amendment dalna palsatna om veve a, Boland Amendment law nuai-a kihel kha lo National Security Council in private fund leh foreign fund kaikhawm veve in, Contras rebels-te huhna sim piak den hi. Tua loin tu-in US in gal lianpen in a ciamteh Iran tung nangawn ah galvan zuak a, tua a galvan zuakte Sandinista government lehdo Contra rebels-te khut sung leh tung kik hi. 1990 kiteelna ah Sandinistas government kia a, US in Contra rebels-te tungah galvan a piak manin Nicaragua gam mite tungah haksakna leh lungkhamna tampi thulguah bangin zu suk hi. CIA, FBI, State Department leh National Security Council pen tu dong hih bangin Congress in a uk zawh loh den hi lai hi (a diakin Obama’ hun in).

*Pakistan: 1971 in West Pakistan (tu-in Pakistan i cih) ah US in a gup upadi leh zuih dinga kibawlte zuih teitei ding deih ‘authoritarian state’ (US in a uk zawh lawh North Korea, Syria, Iran, Russia etc cihte pen authoritarian state ci suk pahpah a, a kumpite pen authoritarian ruler ci pahpah hi) in East Pakistan (tu-in Bangladesh) sim hi. (Tua hunin gam khat ahi uh hi). Hih kidona pen India hong kigolh manin hong bei thei a, gal hangin East Pakistan (Bangladesh) gammi 10 million refugees suak a, US in galvan tawh a West Pakistani forces galkapte guallel dipdep hi. Hih thu hangin tu dong Pakistan India tungah lungkim thei nai lo a, Bangladesh pen India’ pian’khiatsak hi ci lai hi. Gal hangin mulkimna bei-in millions tampi in sihna leh puksihna tuak a, mi pawl khatin West Pakistan in mi a lom thahna (genocide) hi ci uh hi. West Pakistan pen US in gal kipat ma pekin galvan hoih nono tawh a huh det hi a, US in West Pakistan galkap (armed forces) pian’khiat theihna 80% military budget huhna a piak banah gal om lai-in $15 million galvan tawh a huh hangin India in US leh West Pakistan galkapte khut sung panin East Pakistan hunkhia in, Bangladesh gam hong piang hi. Sources thum in a ciamtehna ah hih gal ah 3 million si hi ci a, sources khat in bel 1.5 million si hi ci-in ciamteh hi. US kigolhna mun pen guallehna, galtai pian’na leh mawhna nei lo nautangte sihna leh puksihna gam hi den ngitnget hi. US in leitunga galtai khempeuh a zintun dinga kilawm hi zaw hi.

*Panama: Dec., 1989 in US galkap ten Panama president Manuel Noriega matna ding paulapna tawh Panama gam va sim uh hi. Hih pen leitunga to (master) khat in a ut peuh mat theihna ding thuneihna nei hi cih a lahna leh a utna gam peuh sim theih hi cih a lahna gentehna hi. Manuel Noriega pen ni dangin kum tampi CIAte ading a nasem hi a, Nicaragua gam-a Sandinistas a langpang nuam loh manin CIAte hehpihna a a khahsuak mipa ahi hi. US in Nicaragua a simna hangin mi 500 – 4,000 kikal si hi ci-in kituat hi. US in galmat (PoW) in man a, a president hihna panin tawpsak hi. Manuel Noriega pen CIA ten intelligence source dingin a van manpha mahmah hi a, Central leh South America ah thau tawi a kiphinna neite dona (counter-insurgency) dingin galvan zuakpa in a zat uh ahi hi. US in khamtheih zuak in Miami Florida ah 1998 in ngawh in, man pong a, khamteih zuak, zu dawn a gualnopna bawl leh sum tampi thelthangsak ci-in eight counts tawh April 1992 in ngawhna tuak leuleu hi. September 16, 1992 in kum 40 thong kia dingin dan kipia a, kum 30 in kikhiamsak hi. US pum muan khak leh gupkhial khak pen ei leh ei sihna thang kikamna hi

*Philippines: Philippines pen US in kum 100 val uk khum hi. A beisa kum 50 -60 sungin US in Philippines kumpi in mipite phattuamna ding (welfare) a nasem social activist groups tuamtuamte a betdaihna dingin thupia den hi. 1969 in Symington Committee in US Congress ah US kumpi in galvante Philippines ah sawl in galvan tawi-a kiphinna “counter-insurgency campaign” betdaihna dingin a kizatna thu leh US thukhun a kipalsatna thu pholak hi. Philippines ah galdona “combat operations” a kihel dingin Special Forces leh US Marines tam kigolh mahmah a, President Fernando Marcos in a uk sungin mi a mithahsak leh mimang 100,000 val hi. US galkap muan pente tu dong om lai uh a, Abu Sayyaf leh Islamic gamnuaimi ten gamdang khualzin mite a suamna mun leh pimangna gam hi lai hi. Hih thu hangin tu-in president len Duterte in US galkap khempeuh sawl khiat ding otpih den lai a, Obama bang “Uipi tapa,” na cih khum ngau bak hi.

South America: Operation Condor – Hih operation pen US in South American governments kumpi gilo leh ama deih banga gam uk (despotic) gam 6 - Argentina, Bolivia, Brazil, Chile, Paraguay leh Uruguay ah joint-operation a bawlna leh US polictics langpangte thusim a kanna genna hi. Operation Condor plan hangin hangin mi 13,000 in sihlawh hi. Operation Condor pen November 25, 1975 in Chile gamah ‘act of the Interamerican Reunion on Military Intelligence’ kici tawh kipankhia hi. US embassy political officer, John Tipton in a genna ah, “CIA leh Chilean Secret Police kipawl hi,” ci-in a gen hangin CIAte Chile gam leitang ah a langtangin kigolh lo uh a, 1983 in Operation Condor bei hi ci-in kireport hi. March 6, 2001 in New York Times in State Department document declassified panin US in Operation Condor thukizaktuahna ding piangsak hi ci-in suaksak hi. CIAte pen a sim tham in gamtat siam a kisak mahmah hangun a gamtatna sul nung teng uh US mediate mah in a khuanung in hong pholakhia veve hamtang den hi.

*Sudan: 1955 in Sudan in suahtakna ngah hi. Sudan pen tang kum a kipanin tu dong tualgal tawh kilawi man ngei lo hi. Tualgal hangin mi 2 million kiim 2003 in si khin zo hi ci-in kituat hi. Darfur tualgal nasia mahmah a sit eng kisim kha hiam cih kitel lo hi. Human right groups tuamtuam ten US policies in Khartuom khuapi pansan central government paihkhiatna a huh manin Sudan tualgal sawtsakna ding leh kidiahna ding nakpi takin huh hi ci hi. 1999 in U.S. Secretary of State Madeleine Albright in Sudan People’s Liberation Army (SPLA) makaipipa kimuhpih a, tualgal beina dingin Egypt leh Libya panlakna tawh “peace plan” na nolh leh nek leh dawn supply hong pia ding hi ung ci-in kamciamna bawl hi. 1978 in Sudan gam-a datsi tohkhiat nai loh (oil reservers) kimukhia a, US pen mun tenga datsi duh ahihna tawh 1980 in Sudan gam pen US in galvan tawh huhna a piak gamte lak panin a tam ngah pen a gukna hong hi pah hi. US in tua bangin huhna a piak pen huhna a piakte tung panin datsi ngen leh a nolh theih loh ding ngimna tawh thangsiahna hi kawikawi hi. British group “Christian Aid” ten kici ten “foreign oil companies” ten khua tate panin mi a tawm theihna ding vaihawm in ngian zang uh a, tualgal piangsak den uh hi ci hi. Hih companies ten – American company hilo- kumpi humbitna ngah uh a, kumpi in vanleng phual leh lampi a bawlna dingin phalna pia uh hi. August 1998 in US in Sudante khuapi Khartoum cruise missile 75 tawh kap uh uh hi. Sudan kumpi in bel US in huhna a piak manin US gamtatna sialgup in, Obama bin Laden’ chemical weapons factory kapsak uh hi ci pong uh hi. Ahih hangin a man takin tua chemical weapons factory pen Osama bin Laden aa hilo a, gam zawngte adingin zatui bawlna (pharmaceutical plant) supplies kibawl munpi na hi zawsop hi. US in cruise missile 75 tawh tua mun a kapsiat manin mi tul sawm tampi in malaria, TB leh natna tuamtuam dalna zatui supply ngah nawn loin sih lawh uh hi. A factory nei ten US kum hek in (lawsuit filed) US kumpi tampi tak liau lawh hi. USte galdo siamna leh dam lo tul tampi a gawl mekna gentehna hoih khat suak den lai hi.

*Vietnam: North leh South Vietnam in kipum khatna ding thukimna (unified agreement) thukimna kum 10 bang zah hiam (several decades) a kaih khit nung un US in hih thu nial a, South Vietnam a Diem government hong gum hi. August, 1964 in CIA leh midang pawl khatte huhna tawh USte Vietnam ah a kigolh theihna dingin Gulf of Tonkim ah North Vietnam ten US teembaw hong suamsak uh hi cih phuahtawm/bawltawm (fabricate phony Vietnamese attack) hong bawl uh hi. US in gam makaite thahna Vietnam War ah American assassination operation “Operation Phoenix” kici pankhia uh a, hih bangin gam makaite a thahna hangun South Vietnam gam mite dipkua leh patausak (terrorised) mahmah hi. Vietnam War sungin America galkap ten 1968 in My Lai khua ta ah mi va lom thah (mass massacred) uh hi. Vietnamese government statement in 1995 in a genna ah Vietnam War ah galkap leh nautang 5.1 million in sihna tuak hi ci hi. Tua loin Vietnam War sungin USte Cambodia leh Laos ah a kigolhna hangin mi 2.7 million sihlawh ahih manin Vietnam War a si khempeuh gawm in 7.8 million in sihna tuak hi. The Virtual Truth Commission in Vietnam War ah mi 5 million si hi ci hi. US Secretary Fefense lui Robert McNamara in bel mi 3.4 million si hi ci hi ci-in New York Times Magazine in suaksak hi. US in Vietnam War ah sih theihna gu leh singteh pulhna ding leh thoza "chemical defoliants or herbicides" ton tampi leh chemical nam khat napalm 388,000 tons Vietnam ah 1963 -1973 in khia uh a, a khuanung gu hangin cancer, nu leh pate tung panin kilawhsawn theih natna, piangsual/mibang lo tampi piang hi. US in tu dong a muan mahmah B-52 heavy bombers, F-4 Phantom, Bell UH-1 helicopter, Armored personnel carriers M-113 vanlengte zangin, yard 2,000 khak theihna thautang 550 kithuah M-60 machine gun, M-16 automatic thau, yard za bang zah hiam kha zo minnute khat in thautang 700-900 kapkhia thei .223-caliber bullets cihte tawh Viet Kongte Chinese version Ak-47 zang, vanleng kapkhiatna portable, shoulder-fired SA-7 Grail missile, yard 435 kap ban 7.62mm bullets automatically or semi-automatically, SKS carbine or “Chicom, DP 7.62mm light machine gun (U.S.-made M-60 tawh kibang, Soviet design, Soviet leh China a kibawl) zangte uh hi. US in Vietnam War ah 1960s leh early 1970s US galkap million thum na zang a (a kuan sate kuan kik, ciah kik zel), a galkapte un "defoliants" kici chemical kigawmkhawm sihteh pulna ding ton tampi na zang uh a, mi tampi na sihlawh hi. 1961 panin 1971 kikal US galkap in hih zatuite khaici siatsakna ding, gamlak suksiangna dingin “Operation Ranch Hand” na nak zat mahmah a, Cuba gam ah a guallelh bangin Vietnam gam ah zong na guallel dipdep ah, a galkap siampen uh US Marines 58,315 si a, 303,644 liam hi. Galvan hoih neih leh zat man a gualzawhna ngah ding hilo hi cih US in gentehna a lahna hi.

*Yugoslavia: Yugoslavia gam pen republic gam tuamtuam lak panin socialist federation gam ahi hi. Cold War hun a kipanin Soviet tawh a kipolh nuam nawn loh manin USte huhna hong ngah hi. Ahih hangin 1991 in Soviet gam hong kiphelkhap in, Russia hong pian’khiat zawh a kipanin USte adingin Yugoslavia pen a manna hong tawm sa mahmah a, US leh Germany hong kipawl in Yugoslavia simna leh khenna tawh socialist economy panin capitalist economy suaksak hi. US ngian hangin minam kideidanna leh biakna hanga kilang neihna hangin tualgal lianpi hong piang a, a gam kiphiatna (dissolution) dong hong piang hi. 1990s bul in Yugoslavia gam tuamtuam in hong kikhen a, CIAte thusiamna tawh gam suahtakna ngah thakte sum muhna hong niam mahmah ahih manin capitalist gam tuamtuam kimawlna leh suahtakna gam thakte supna dinga kimawlna (pawn) suak khin uh hi. Yugoslavia gam kitapkhamna pen USte hang lieuliau hi masa (primarily) pen hi. US thusiamna hangin Yugoslavia gam sungah gal (internal wars) tampi leh tualgal tampi, numei kibuanna, Serb minam ten Muslimte a lom thahna leh numeite buanna leh bawlsiatna thu films zong true story based tam mahmah hi. Yugoslavia ah tualgal om khempeuh hangin mi 107,000 si hi. Tua loin Yugoslavia kitapkham khit nungin suahtakna ngah thak gamte ah tualgal hang a sihna tuak a nuai a bang ahi hi:

 *Bosnia and Krajina: 250,000; *Bosnia: 20,000 - 30,000; *Croatia: 15,000; *Kosovo: 500 - 5,000 sih beh lai hi. USte thusiamna leh mi huhna pen hih bang peuh hi kawikawi hi.

US in a huh leh a gupte sawt gum zo lo a, a uk lawh ciangin a thah zawh teng that , a mat zawh teng man, tua loin cihmawh beidong tawpna hukna dingin tualgal piangsak in, kumpi laih ding a hanciam kawikawi hangin dahpa lokho na bang den hi. US in a uklah gamte authoritarian kumpi ahih kei leh dictatorship kumpi cih min vawh pahpah hi. A nuai a gam bang bang zah ah US in kumpi gilo upadi leh zuih dinga kibawlte zuih teitei cih upna nei kumpi ukna (authoritarian regimes) bang zah gum hiam cih en lai ni.

US IN AUTHORITARIAN KUMPI A GUP LAITE (A KUM KI-AT A KIPAN TU DONG, A LIST PEN A KIM LO HI LAI HI)

1991–present Azerbaijan Heydar Aliyev; Ilham Aliyev

1992–present Kazakhstan Nursultan Nazarbayev

1959–present Singapore People's Action Party

1984–present Brunei Hassanal Bolkiah

2011–present Vietnam Trương Tấn Sang

2014–present Thailand Prayut Chan-o-cha

1994–present Tajikistan Emomali Rahmon

2006–present Turkmenistan Gurbanguly Berdimuhamedow

1945–present Saudi Arabia House of Saud

1999–present Bahrain Hamad bin Isa Al Khalifa

1972–present Qatar House of Thani

1970–present Oman Qaboos bin Said al Said

1954–present Jordan Hashemite Dynasty

1971–present United Arab Emirates United Arab Emirates

2014–present Egypt Abdel Fattah el-Sisi (Trump in Mr Fantastic Guy a cihpa)

 1777–present Morocco Alaouite kumpi ukna (dynasty)

1999–present Djibouti Ismaïl Omar Guelleh

1979–present Equatorial Guinea Teodoro Obiang Nguema Mbasogo

1982–present Cameroon Paul Biya

1990–present Chad Idriss Déby

1986–present Uganda Yoweri Museveni

2000–present Rwanda Paul Kagame

2011–present South Sudan Salva Kiir

US IN A BEISA HUNIN ATHORITARIAN KUMPI A GUPTE LEH A GUP HUN SUNG:

1876–1911 Mexico Porfirio Díaz (Porfiriato uk sungin US leh Mexico kitheihsiam lohna sang mahmah hi)

1929–2000 Mexico Institutional Revolutionary Party

1932–1944 El Salvador Maximiliano Hernández Martínez

1933–1949 Honduras Tiburcio Carías Andino

1953–1957 Colombia Rojas Pinilla

1948–1958 Venezuela Marcos Pérez Jiménez

1908–1935 Venezuela Juan Vicente Gómez

1898–1920 Guatemala Manuel Estrada Cabrera

1931–1944 Guatemala Jorge Ubico

1952–1959 Cuba Fulgencio Batista

1930–1961 Dominican Republic Rafael Trujillo[CIAte huhna tawh kipaaikhia hi)

1966–1985 Guyana Forbes Burnham

1954–1986 Guatemala Efraín Ríos Montt and other Juntas

1963–1982 Honduras Oswaldo López Arellano, Juan Alberto Melgar Castro &Policarpo Paz García

1961–1979 El Salvador National Coalition Party (El Salvador)

1979–1982 El Salvador Revolutionary Government Junta of El Salvador

1963–1967 Ecuador Junta del

 1964–1969 Bolivia Rene Barrientos

1971–1978 Bolivia Hugo Banzer

1973–1985 Uruguay Civic-military dictatorship of Uruguay

1966–1973 Argentina Argentine Revolution

1976–1983 Argentina National Reorganization Process

1964–1985 Brazil Brazilian military government

1936–1979 Nicaragua Somoza family

1957–1971 Haiti François Duvalier

1971–1986 Haiti Jean-Claude Duvalier

1968–1981 Panama Omar Torrijos

1983–1989 Panama Manuel Noriega [1989 in US in Operation Just Cause zangin lawn khia).

1954–1989 Paraguay Alfredo Stroessner

1973–1990 Chile Augusto Pinochet

1992–2000 Peru Alberto Fujimori

1948–1960 South Korea Syngman Rhee

1958–1969 Pakistan Ayub Khan (Cold War era hun a kipanin Pakistan pen tu dong US lawmhoih hi.)

1961–1979 South Korea Park Chung-hee

1979–1988 South Korea Chun Doo-hwan

1955–1963 South Vietnam Ngo Dinh Diem [US huhna tawh coup kiman in, in kithat)

1965–1975 South Vietnam Nguyen Van Thieu

1970–1975 Cambodia Khmer Republic Lon Nol

1969–1971 Pakistan Yahya Khan

1941–1979 Iran Mohammad Reza Pahlavi

1965–1986 Philippines Ferdinand Marcos

1978–1988 Pakistan Muhammad Zia-ul-Haq

1963–1967 Iraq Abdul Salam Arif, Abdul Rahman Arif

1982–1990 Iraq Saddam Hussein [a uk lah a kipanin Gulf War a kipan US gal lianpen suak a, Iran–Iraq war lai-in na huh in chemical galvan ngawn na pia).

1967–1998 Indonesia Suharto

1949–1953 Syria al-Za'im-Shishkali-al-Hinnawi Junta

1999–2008 Pakistan Pervez Musharraf

1990–2016 Uzbekistan Islam Karimov

1990–2005 Kyrgyzstan Askar Akayev

1978–2012 North Yemen

Yemen Ali Abdullah Saleh

1971–1985 Sudan Gaafar Nimeiry

1978–1991 Somalia Siad Barre

1930–1974 Ethiopia Haile Selassie

1980–1990 Liberia Samuel Doe

1991–2012 Ethiopia Meles Zenawi

1965–1997 Democratic Republic of the Congo Democratic Republic of the Congo

Zaire Mobutu Sese Seko

1982–1990 Chad Hissène Habré

1981–2011 Egypt Hosni Mubarak

2012–2013 Egypt Mohamed Morsi (US in ek nusiat in nusia, tu-a coup tawh President len Sisi in thong ah khum)

1948–1994 South Africa Apartheid

1987–2011 Tunisia Zine El Abidine Ben Ali

1953–1975 Spain Francisco Franco

1941–1974 Portugal António de Oliveira Salazar

1941–1945 Soviet Union Joseph Stalin [Cold War kipat a kipanin USte gal kihtak lianpen hong suak pah).

1948–1980 Yugoslavia Josip Broz Tito.

1967–1974 Greece Greek military junta

1980–1989 Turkey Turkish military junta

1969–1989 Romania Nicolae Ceaușescu

1941–1975 Republic of China Chiang Kai-shek

1948–1957 Thailand Plaek Phibunsongkhram

1963–1973 Thailand Thanom Kittikachorn

1958–1963 Thailand Sarit Thanarat

1987–1999 Fiji Sitiveni Rabuka

References: James A. Lucas (Global Research April 01, 2017, Popular Resistance 26 November 2015); American Cancer Society; Wikipedia, Your News Wire

Zolai tawh a kaikhawm: Thang Khan Lian

A kitel zaw in na sim nop leh a nuai-a link mek in la, a beina ah references a lompi a dim in om hi

http://www.globalresearch.ca/us-has-killed-more-tha…/5492051

+12