RUSSIA IN US COMMUNICATIONS LEH NAVIGATIONAL SATELLITES KHEMPEUH NGA VEI SITNA NEI TA HI CI

RUSSIA IN US COMMUNICATIONS LEH NAVIGATIONAL SATELLITES KHEMPEUH NGA VEI SITNA NEI TA HI CI

May 2, 2017: US Departmental of Defense ten US galkapte zat ding zan in Florida khuapi-a Cape Canaveral Air Force Station panin mission masa pen dingin SpaceX Falcon 9 rocket lawhcing takin lawnto (launched) uh hi. SpaceX Falcon 9 rocket pen US National Reconnaissance Office-te' NROL-76 satellite ahi hi. Galvan lamsang kiteitehna pen US leh Russia kikal ah na nasia mahmah a, US in 1950s pek in Space galvan ding Weapon System WS-199A bawl na kipan a, Soviet Union in cik in kipan hiam cih kitel loin, na imcip den uh hi.

Russia ten USte thukizaktuahna (communications) leh teembaw, vanleng leh spaceship paina ding lampi hilhna "navigation satellites" khempeuh kapkhiat theihna ding missile thak PL-19 Nudol a nga veina dingin Dec. 16, 2016 in sitna lawhcing takin nei uh hi ci-in Pentagon ulian ten gen uh hi ci-in December 21, 2015 (5:00 am) in The Washington Free Bacon News in suaksak hi. Russia in USte' communications leh navigational satellites khempeuh kapkhiat theihna ding leh galte missiles khatpeuh kapkhiat theihna dingin Nudol missile pen nga vei sitna a neihna uh hi ta a, thum vei lawhcing takin a sit theihna uh hi ta hi ci-in Pentagon ulian ten gen beh uh hi.

Dec. 16 in Russia in Nudol missile a sitna mun lian kithei lo a, tua ma-in a sit pen uh Moscow panin tai (miles) 500 gamla a om Plesetsk facility kiang panin a sit uh ahi hi. Pentagon in Russiate Nudol missile sitna nga vei a neih lam uh a theih hangin Nudol missile pen mun awng (space) ah sawl hiam ahih kei leh a leng kual kawikawi (sub-orbital trajectory) dingin a kapkhiat (test fired) uh hiam cih tel zo lo uh hi. Pentagon spokeswoman Lt. Col. Michelle Baldanza in Nudol missile thu kicing gen nuam lo a, "Gam dangte na hih theihna (capabilities) kigen nuam mengmeng lo hi," ci hi. Russia in May 24, 2015 leh Nov. 18, 2015 in zong Nudal missiles sitna a neih lam uh Washington Free Beacon news mah in na thei masa pen hi. Russia in hih bangin Nudal missile thak a sit mun pen galkapte zat dingin Nudal programme pi mawl mahmah in, a zat ding uh ngimna nei uh hi ding hi ci-in Washington Free Beacon news in gen beh hi.

Hih Nodal missile pen Russia galkap ten satellite ah missile kikoihte dalna ding leh kapsiatna (new anti-satellite missile) dingin galvan thak a bawl ahi hi. Pentagon in Nudal missile pen tang takin a kia satellite missile dalna ("direct ascent" anti-satellite missile) hi ci hi. Ahih hangin Russia in Nudal missile ah satellite missile dalna pen ballistic missile hong lengte kapkhiatna ding hi ci hi. Russia bek hilo in China in zong anti-satellite galvan a bawl hi ci-in Pentagon lungkham (worried) mahmah hi.

US Air Force Space Command commander lui leh nung kum in US Strategic Command makai dingin a kiguang Gen. John Hyten in, "Russia leh China in space galvan "space warfare systems" nak bawl mahmah uh a, a galvan bawlte uh hih theihna (capabilities) hangin hong lungkham sinkham sak hi," ci hi. Nung kum March kha-in zong Joint Functional Component Command for Space commander Air Force Lt. Gen. David J. Buck in House teci pan'na (testimony) a neihna ah, "Russia galkap ten space hih theihna dalna ding "counter-space capabilities" galvan bawl uh hi," ci-in na gen hi. "Russia in USte space ah a kingakna uh pen siat theihna dengdelna piangsak (exploitable vulnerability) ding hi cih ngaihsutna nei uh ahih manin counter-space capabilities adingin ngong takin nasepna hanciam in, galvan nakpi takin bawl uh hi," ci-in gen beh hi.

Pentagon strategic arms policymaker len lui Mark Schneider in, "Tu lian in US leh gam dangte anti-satellite hih theihna tuamtuam (asymmetry) pen nakpi takin poimawh hi ci hi. Hih bangin anti-satellite hih theihna tuamtuam gam dang ten a bawl manin US guallelhna lianpi piangsak thei a, i GPS network khempeuh i man'sak (lost) theih liang kei leh zong nakpi takin siasak in, long-range conventional strike cruise missiles pen a mawkna a suaksak banah ngimna lianlian kha thei ding galvan (precision guided weapons) i neihte a zatna bei suaksak thei ding hi," ci hi. Anti-satellite missiles pen communications satellites khempeuh suksiat theihna galvan ahih manin US in GPS tungah i kingakna i khiam ding kisam a, ahih hangin tua bangin GPS ah kingakna khiam suk ding pen piang vat zo pah lo ding hi ci-in gen beh hi.

Heritage Foundation a Defense analyst Michaela Dodge in Russia in missile thak a sitna hangin space galvan lauhuaina panin galvan thak panin vauna piangsak hi ci hi. Russia in hih bang galvan a sit manin ni dang bangin space ah US kilut mengmeng thei nawn lo dinga, space pen kituhna kiim leh kiang (environment) suaksak thei a, US galvan neihsa kicing nai lo hi cih leh US in space ah i van poimawhte (infrastructure) i humbit ding poimawh hi cih hong phawksak hi ci hi.

US intelligence agencies ten US military operations pen anti-satellite 12 bek in hong kisuam leh zong kicimawh pah zo ding hi ci uh hi. Satellites pen teembaw, vanleng leh space vanleng paina ding lianlian (precision navigation), a ngimna ding (targeting), kithuzaktuahna ding (communications) leh thusim kaihkhopna (intelligence gathering) dinga kizang ahi hi.
Pentagon in mun gamla galdona (long-range warfare operations), a diakin US lei galkapte pen satellites ah kinak ngak mahmah uh hi. Hih thu pen Russia leh China in USte galsimna pangsiamna ah a thanemna/dengdelna (strategic vulnerability) uh hi cih tel uh ahih manin anti-satellite missiles pen galvan dingin kisam pen hi ci-in a bawl hamciam mahmah uh hi.

Russia leh China in satellite khuamu lo (blinded) a omsakna ding leh buaisak theihna dingin lasers leh directed-energy weapons kici galvan a bawl banah space ah vak sim khialkhial (maneuvering) ding, satellites man ding leh susia ding satellites neu zong bawl uh hi. Russia galkapte generals ten a galkapte un anti-satellite galvan kisam ta hi ci-in mipi zak dingin pulak khin zo a, Russian Space Foreces commander lui Lt. Gen. Oleg Ostapenko in zong S-500 anti-missile system in leitung panin a gamla lo a om "low-orbit satellites" leh space galvante kapkhiatna in kizang thei hi ci-in pulak khin ngei hi. May 2016 in Academy of Military Sciences professor Vadim Kozyulin in space ah US tawh Russia kido dingin Russia kithawi ta hi ci-in "space kamikazes" tawh a kihona ah gen hi. TASS news agency in zong Russian IL-76 transport aircraft tawh kibang pianin a kibawl A-60 vanleng ah anti-satellite capability laser kithuah hi ci hi.

October 2016 in TASS in Nudol missile pen a min A-235 hi ci-in gen a, Russia in Muscow khuapi ah a koih nuclear missile defense system laihna dinga kibawl hi ci-in suaksak hi. Missile defense interceptors ah "space-faring satellite killers" kici space a satellite omte thahna ding tawh kithuah a, manlang mahmah in, a ngimna lianlian khakna ding (precision targeting) leh a cing (guidance) kithuah hi. United States in tu lianin anti-satellite weapons kici satellite kapsiatna ding leh buaisakna/khuamu lo a koih theihna ding galvan nei nai lo hi. Ahih hangin US Navyte SM-3 anti-missile interceptor pen de-orbiting intelligence satellite kap khiat theihna dingin 2008 in a bawlphat na kipan ta uh hi. A bawlphat zo le uh US missile defenses in gamdangte satellites ngimna (target) dingin zang thei ding hi. US Defense Intelligence Agency in Congress ah 2015 in Russia makai ten Russia galkap ten anti-satellite galvan nei khin zo uh a, anti-satellite research nakpi takin bawl uh hi ci-in tangkopih khia ta uh hi ci hi. China in nung kum December ka bul in a masa pen dingin anti-satellite missile sit a len'sakna (test flight) nei ta uh hi a, a sitna (test) dingin kithawi ta uh hi ci-in Free Beacon news in suaksak hi. Chinate anti-setellite masa pen a min DN-3 direct ascent missile kici a, Russiate Nudol anti-satellite missile tawh kibang pian a, missile-defense galvan dingin bawl sawm uh hi ci-in gen beh hi. Ahih hangin Chinise Defense Ministry in Free Beacon report in China in DN-3 sitna nei dingin kithawi uh hi a cih pen a zuau hi ci-in nial hi. China in a nialna a man takpi ahih leh Russia bek in satellite suksiatna ding galvan nei pan hi cihna suak hi. February 21, 2008 in Navy ten spy satellite USA-193 uh nasep thei lo (malfunctioned) ahih manin ship-fired RIM-161 Standard Missile 3 tawh na kapsia uh hi.

Source: INFO WARS, WASHINGTON FREE BACON, WASHINGTON TIMES, WIKIPEDIA
A tei: Thang Khan Lian