AMERICAN FIRST - TANGTHU HOIH LEH KAMMAL HOIH PAWL KHAT

🇺🇸#AMERICAN FIRST - TANGTHU HOIH LEH KAMMAL HOIH PAWL KHAT

Ni khat London khuapi sunga restaurant sungah American pasal khat hong lut vat hi. Tua restaurant sung a lut phet in a kiu khatah India mi khat a tu galmuh hi. Tua American pa in restaurant counter va zuan phei suak in, a sumbawm (wallet) sawk khia pah in, hih bangin hong awng khia baba hi:

"Waiter! Manlang takin hih restaurant sunga tute khempeuh an ka taih nuam hi. Ahih hangin tua a kiu a tu India pa lo siah adingin manlang takin an hong bawl in," ci-in thu pia buat hi. A waiter pa in zong a sum bei ding khempeuh bill bawl samsam a, a sum bei khempeuh a lak khit ciangin India pa cih loh tua restaurant sunga tu khempeuh adingin a suabuai tek uh-ah an hong lui sak hi.

Ahih hangin tua India pa dah se loin tua American pa en in, "Lungdam ei, American thusiam pa aw," ci-in a tutna kiu panin hong awngkhia hi. Tua bangin India pa hong ot ciangin American pa heh lua ahih manin a sumbawm sawkkhia kik leuleu in, hong awng baba kik a, "Waiter! Tu-in tua India pa cih lo siah hih restaurant sunga tu khempeuh adingin a khawnkhong in an leh zu ka taih kik ding hi. Manglang takin hong vaihawm in," ci hi.

Tua leh waiter pa'n zong a sum bei khempeuh a lak khit ciangin an leh zu a kicingin hong lui samsam kik biangbuang pah hi. Waiter pa'n India pa cih loh mi khempeuh adingin an leh zu hong lui dimdiam khit ciangin, a kiu a tu khinkhian India pa hong awng kik a, "Lungdam ei, American thusiampa aw," ci-in a tutna kiu panin nuihsan hieuhiau se hi.

Tua bangin a lungdam thu nih vei a koh khit ciangin American pa zong counter ah hong pai-in waiter pa kiangah hong kinga suk a, waiter pa kiangah, "Tua a kiu a India tu pa a bangci mawk ahi hiam? Amah sim loh hih restaurant sunga tu khempeuh an leh zu vak kham pikpek ing a, lungdamthu nih vei hong ko zaw lai-in, nui lai ta zen hi. A hai ahi hiam?" ci-in dong hi. A waiter pa'n tua American pa kiangah, "Sia aw, a tutna munah tu khinkhian in nang hong nuihsan hithiat mah hi. Amah pen hih restaurant neipa hi a, ka bosspa uh hi," ci-in nuih kawm in dawng hi.

"Na maizumna ding, na mualphona ding leh nang hong deidanna lahna dingin na hihna bangmah thei vet loin na galte a gamtat ciangin nang phattuamna ding leh meetna ding suak ta hen!". Tua American pa banga mi deidanna lungsim nei leh mi simmawh bawl nopna lungsim nei na lawmte kiangah hih tangthu na hawm sawn (share) in.

💬 Hehna panin kidawm in la, dai dide lel in. Na heh manin nang leh nang a kilunggimsak tawm na hi hi.

💬 Na dikna leh na thumanna ah hong kimawhsak khak ciangin dik in thuman na hih manin hehna ding om tuan lo hi.

💬 Na hihkhialhna leh na thuman lohna khat hong kigen in, hong kimawhsak ciangin na hih khialhna leh na thuman lohna mah ahih manin hehna ding om tuan lo hi.

💬 Na innkuanpihte tungah na lungduaina leh na thuakzawhna (patience) pen itna na lahkhiat theihna ahih manin hehna ding om lo hi.

💬 Mi dangte tungah thuakzawhna leh lungduaina na lahkhiatna pen mi dangte tungah zahtakna na lahkhiatna ahih manin hehna ding om lo hi.

💬 Nang leh nang tungah thuakzawhna leh lungduaina na neihna pen nang leh nang na kimuanngamna ahih manin lungkiatna leh hehna ding zon' kisam se lo hi. Pasian' tungah thuakzawhna leh lungduaina na neihna leh lahkhiatna pen Amah na muan' ngamna na lahkhiatna ahih manin lungneuna ding leh hehna ding om lo hi.

💬 A beisa hun-a na guallehna, kamsiatna leh lawhsapnate ngaihsun kikkik se kei in. Tua in na khitui leh naptui nulna ding bek hong pia den ding hi.

💬 Na mailam hun ding kihta in, awlmawh lua se kei in. Tua in na kihtakna ding leh lauthawngna ding bek piangsak den hi. Mailam hun ding lunghimawh lua kei leng theih loh kal in hong tung pahpah lel hi.

💬 Tu lian-a na nuntakna ah lungdamna leh nuihna tawh na hunte zang in. Tua pen nang adingin damna zatui tawh kibang a, hihna bangbang leh a piang bangbang tawh lungkim theihna sanga thupi leh manpha zaw om lo hi.

💬 Ni sim na nuntakna ah ze-etna, bawlsiatna leh sitna (temptations, trials, tests) na thuakte na thuakzawh leh mi hoihzaw leh mi thahat zaw na suak ding a, na thuakzawh kei leh lungkhamna leh lungneuna bek hong guan beh ding hi.

💬 Thu haksa leh buaina i tuahte pen ei hong thakhauhsak ding, hong balkek ding ahih kei leh hong su gawp ding zong hi thei a, hong thakhauhsak zaw semsem ding zong hi thei hi. Haksakna pen a om ding leh i tuah ngitnget ding hi zaw hi. Haksatna om theih mah bangin haksatna zawh theihna ding zong om veve hi.

💬 A thuak ding ahih kei leh tuahsiatna tuak (victims) ding leh a gualzo hih theihna ding pen eima khut sunga kinga a, ei deih teel theihna hi den hi.

💬 A kilawm leh etlawm nate (beautiful things) pen hoih den lo a, na hoihte (good things) pen a tawntungin etlawm in, sawtpi kilawm hamtang den hi.

💬 Pasian in bang hangin i khutzungte (fingers) kikal ah a awng/a vang kikal (gaps) bawl se hiam? Na khutzungte kikal ah a khut hong guang in, tua munte hong huk dimsak ding leh a tawntungin hong lencip ding mi thupi diak leh a tuam vilvel (special) ding mi hong bawlsak manin a vang leh a mun awng a bawl hi zaw hi.

💬 Lungdamna leh lungnopna (happiness) inn na nuntakna etlawm sak in, khum (sweet) sak a, na nuntakna mi nek theih dingin na khumsak theih leh tua in lungdamna leh lungkimna hong guan den ding hi.

✍ Thang Khan Lian