THU-UM GALKAPPA TANGTHU

THU-UM GALKAP TANGVAL KHAT TANGTHU

Ni dang lai-in Khristian thu-um mahmah tangvalno galkap khat om hi. Ni khat galdo a kuankhia dinga kitengkhia sungah amau' battalion galkap sung lak panin amah zong kihel kha ahih manin a kuan loh phamawh ta hi. Galdo dingin a kuan khiat dingin khukdin’ in thungetna nei a, “Topa aw, cidam in innlum lolum hong tung kiksak ta peuh in,” ci-in thum in, hong kuankhia ta hi.

Gal kidona hong nasia mahmah a, amau lamte in a galte lel mahmah uh hi. Sihna tuak leh liam leh baina tuak-a tuk hong tam mahmah a, a galte un amau lam hong neh tektek in, hong mainawn hanhan ta hi. Tua lai takin a galkap bupa un kilel peelmawh ding hi cih tel lua ahih manin galkapte thu zasak a, “Na nuntak theihna dingin tai un la, na buk theihna mun ciat uh-ah bu un. Kuamah in na thau uh lawn nawn kei ta un! I galte hat lua-in tam lua uh ahih manin i kipasalsak nuam teta pong hangin kilel veve ding hi. Tua ahih manin amau khut sungah kipiakhia (surrender) le'ng lah galmat in hong nei ding uh a, genzawh loh bawlsiatna kithuak ding ahih manin i kipiakkhiat sangin i nuntak theihna dingin a tai zo teng tai-in, a bu thei teng kibu zaw ni,” ci-in thu pia hi.

Tangvalpa' battalion sunga nungta lai teng zong a tai zo teng tai in, taina dingin tha a nei zo lo teng hong kibu ta uh hi. Tangvalno zong a nak liam lua ahih manin tai zo lo a, a buk loh kiphawh hi. A bukna ding mun simtham leh muanhuai ding hong vel kawikawi a, a tawpna ah bukna ding suang kuahawm sung khat hong mu hi. A manlang thei pen in tua sungah lut pah a, tua mun-ah hong kibu hi.

Galte in a tai zo a bu man lo a tuah khak teng uh ban kaplup in, pawl khatin a taite delh uh a, pawl khatin a kibute hong zong ta uh hi. Tangvalte battalion sunga kibute bukna mun zongte in hong zong kawikawi ciangun tangvalna bukna mun kiangah pawl khat hong tung uh hi. Tua lai takin tangvalnopa galkap in thungetna hong nei a, “Topa aw, ka biak a nungta Pasian na hi hi. Nang adingin a haksa bangmah om lo hi. Na tapa’ thungetna hong ngaikhiatsak in. Ka bukna suanghawm kulh muanhuai hong suaksak in la, ka galte khut sungah hong pia kei in. Nang lo belh ding dang ka nei kei hi,” ci-in thungetna nei hi. A thungetna a man khit lianin maimom khat a bukna suanghawm ah hong kikhai suk vat a, tua maimom in tangvalno lutna suanghawm kiim tengah a leen hong kam hi.

Tangvalno in, “Topa aw, kong thungetna maimom huhna hilo a, kulh muanhuai hi zaw hi. Ka thungetna za loin hong nungheisan na hi hiam?” ci-in kap kawm in thu hong ngen kik hi. Tua leh tangvalno bukna mun zong galte in lim takin hong zong kawikawi uh a, tua suanghawm sung lutna kongah maimom len kikam a muh ciangun khat leh khat kiho uh a, “I galte bukna mun dinga kilawm lo khat zong hi ngelngel hang ei... Hih suanghawm sung lut theihna ding mun-ah maimom leen kikam ahih manin kuamah lut loh zawh sawtpi hi ta ding hi cihna lim (sign) hi. Hih mun-ah kuamah lut lo dinga, i galte hih munah kibu lo hi cihna hi. I zon’na mun man lo hi,” ci-in tua mun nusiatsan uh a, tangvalpa suakta hi.

Thukhupna: Haksat hun leh cimawh beidong tawp i tuah hun lai takin lungsim takpi tawh i thungetna pen Pasian in hong za khial ngei lo hi. Hong za lo dingin a bil ngong lo a, hong huh zo lo dingin zawngkhal lo hi. I thunget lai takin muh theih dingin a vanglian leh na lamdangpi hong piang vat loh hangin i thungetna pen Pasian in hong za lua hi. Mihing' ngaihsutna leh lametna pen i muh theih ding, a muanhuai ding leh a belhtak ding kideih se hi. Mihingte' muhna leh Pasian muhna kibang lo a, mihingte' ngaihsutna leh Pasian’ ngaihsutna kibang lo a, mihingte' zia leh tong leh Pasian’ zia leh tong pen kibang ngei lo hi.

Pasian in na neuno khat zong a zat nuam leh ahih theihna vanglian mahmah hi. Ei lam-etna leh ei ngaihsutna bangbangin Pasian in i nget bangbangin hong dawng den lo mah ding hi. Thu i nget ciangin hong piak ding i ngak lai takin Pasian’ hong dawn’na, a hoihna leh a vangliatna pen i telsiam ding, i ngak zawh ding leh i muan zawh ding a kisam hi zaw den hi. Ei ngetna bangbangin ngah ziauziau pahpah hi le'ng Pasian’ vangliatna leh hoihna pen kitelkhial thei zawsop den hi. Pasian in i nget bangbang hong pia lo a, ei adingin kilawm kituak a sak ciang bek hong pia na hi zaw se hi.

@ Thang Khan Lian #ZUNs