MI DANGTE TUNGAH THU KHEN PAHPAH KEI IN

MI DANGTE TUNGAH THU KHEN PAHPAH KEI IN

Ni khat zato inn ah naupang cina gim mahmah khat hong kipuak hi. Tua naupang a dam zawhna dingin manlang takin at (surgery) loh phamawh ahih manin ki-atna khan (operation theatre) sungah siamah (nurse) ten hawl lut suakpah uh hi. Ahih hangin tua zato inn a mi at siavuan (surgeon) duty pen na om lo citciat se hi. Tua naupangpa pa zawh cimawh leh mangbang kisa in, cihna ding a theih loh luat manin siamah teng ban taisuk gawp phangphang hi. Siamah ten phone tawh siavuanpa hopih uh a, “Dam lo gim mahmah khat hong kipuak vat a, manlang takin a ki-at kei leh a nuntakna kikhahsuah peelmawh ding ahih manin manlang takin hong pai in,” ci-in sam saisai pah uh hi.

Tua leh siavuanpa zong a manlang thei pen in hong tai a, zato inn hong tun ciangin dam lo naupangpa ki-atna kong mai lian ah baang ngat a khuisa a om siavuanpa ngak cimawh beidong naupangpa’ pa tuak kha hi. Naupangpa’ pa in, “Siavuan khat hi buang lo na hi hiam? Tu dong bang ngak na hi hiam? Na tavuan thei lo na hi hiam? Ka tapa neihsun sih ding bek ngak in lum hi. Nang tapa hih zong siavuan ten hih bangin thudon loin hong koih leh lungkim ding na hiam,?” ci-in na hapkhum bakbak a, siavuanpa paina ding lampi na daltan sak hi.

Siavuanpa in, “Kilungnuam sak in dai phot in la, na tu hithiat ta in. Na tapa zato ah hong kipuak hi ci-in siamah ten hong sap uh ka zak phet in hong delpah hi’ng. Dai hithiat in na kilungnuamsak phot lecin ka sep ding teng ka sem thei pah zaw ding hi,” ci-in kamdam in nuhmai hieuhiau kawmin dawng hi.

“Kilungnuam sak in, dai in na tu hithiat e? Nang tapa zong tua khan (room) sungah sih ding bek ngak in lum leh kilungnuamsak in, dai in tu hithiat thei ding na hi hiam?” ci-in heh lua kisa san lela in awtol tawh dawng gemgam hi.
Siavuanpa’n nuihmai hieuhiau kawm in, “Pasian’ hong piak ka siamna uh siit loin ka siam theih tawp uh suah in, na hong sem sak ta in. Na tapa damna dingin nang zong thu na ngen in,” ci-in naupang ki-atna dinga kikoihna operation theatre sungah lutsan hi.

Naupang atna in naikal khat val bang hun hong bei a, siavuan leh siamah ten ahih tawp uh sit loin tua naupangpa lawhcing takin at in, kamphatna tawh a nuntakna hong humbit zo liailiai uh hi. Siavuanpa zong nuihmai hieuhiau in operation theatre sung panin hong pusuak khia masa pah saisai a, naupangpa’ pa kiangah,
“Pasian huhna leh hoihna hangin na tapa nuntakna kihumbit zo lai a, lawhcing takin a at ka man ta uh hi. Dot nop leh theih nop na neih beh leh siamahte na dot beh mai in,” cih leh a khut let (handshake) thuah in, taisan pah hi.

Naupangpa' pa zong lungkim tuan loin siamahte kiangah, “Na siavuanpa uh kiliansak si e. Bang hanga hih banga hong neu hiam? Ka tapa bangci at a, bang teng thuak haksa sa lai a, cik ciangin a ki-atna liam mate dam ding a, cik ciangin a kikhuinate phel theih ding hiam cih beek hong gen phot loin bang hanga hong taisan hiam,?” ci-in siamahte han’san lualua kik hi.

Siamah teng hong khitui naptui luang in, khat in, “Zan in siavuanpa tapa tang neihsun lampi ah mawtaw tuahsiatna tuak in si hi. Ka sap lai takin hanmual ah om a, a tapa vui dingin a kithawi laitak hi a, na tapa dam lohna thu a zak phet in, a tapa vui ding nusiatsan in zato inn zuan in hong taisuak pah hi. Tu-in a tapa kivuina ah kihel ding leh hun om lai tengah kihel in, a tapa mangpha tawpna khak dinga taisuak pah hi zaw hi. Tawm khat zekai kha leh a tapa vui man lo ding hi,” ci-in dawng hi.

Nisim na nuntakna ah nang zong hih bang tuak ngei kei ning na ci thei kei hi. Mi dangte tungah thukhen pahpah ding pen baih kisa mahmah ciat hi. Ahih hangin thu na khen ma-in amau zong bang zah takin hanciam in, bang zah takin gentheihna leh lungkhamna, gimna leh tawlna thuak uh hiam cih na ngaihsutsak beek ngei hiam? Nang hong huhna ding, nang phattuamna ding na a sepna ah bangzah ta-in gim leh tawl, nat leh sat, khua-ul kai liangin hanciam uh hiam cih beek ngaihsun masa zel in. Nang tungah thu hong kikhen ding na deih loh bangin mi dangte tungah zong thukhen pahpah nawn kei in.

📝🖋️Thang Khan Lian