GAWM DING MAW, KHEN DING? PUAH DING MAW, SUSIA ZAW DING? MANGTHANG DING MAW, MINTHANG NUAM ZAW MAW? DEIH TEEL THEIH HUN HI.

GAWM DING MAW, KHEN DING? PUAH DING MAW, SUSIA ZAW DING? MANGTHANG DING MAW, MINTHANG NUAM ZAW MAW? DEIH TEEL THEIH HUN HI

Zomi or Zo minam it kici lanlan napi mi khatpeuh in biakna, minam vai thu khat post kha zek leh akta mang kuan bangin kitu pah ngeingai dep, kisel, kitawng thapai den keei cih pen akta mang kuan vai lua ta a, luak suah huai, khamhuai leh zumhuai mahmah hi. Khantoh vai sangin a niamna lamah kiat suksukna lim (signs) hi zaw hi.

Biakna vai khawng zong Fb khawng peuh ah post cih pen a khangto khinsa minam ten na ciing nawn lo hi. Biakna pawlpi tawh vantung gam tun ding hilo hi cih phawk hun ta hi. I biak Pasian kibang hi napi-in, biakna pawl khat ah a kipumkhat thei lote pen minam vai, minam min leh minam min tawh kipawlnate tawh kihai thuthuahin kipumkhat den ding baih pak lo ding hi.

Tua banga kiselna ding bekbek tawh na buai den nuam lai teng pen Zomi na itna huih bungpi hi lel hi. Zomi it ing, ngai ing cici napi nam dangte pau, leitang leh ngeina peuh ultungsak masa nuam zaw in, Zolai nangawn a mal a man in gawm thei loin, zong kisin sawm lo zaw lai ihih leh i minam itna uh leh i veina pen mi tawh kiselsel bek, minam dangte demlah leh hazat man liuliau hangin muhdah bawlin gal bawlna bek hi lai hi mawk a, mangthat vai lua mahmah hi. I minam i it leh i kampi bek leh a min bekin it loin, taisansan loin, i Zolai, i Zogam leh i Zo ngeina puah in, zuun zaw in, pilna mah bul bawl masa leng meethuai zaw ding a, kikhangto zaw ding hi.

I pau, i lai leh i gam i zuun kei leh kuamah in hong it sak loin, hong zuunsak loin, hong puahsak lo ding hi. Zomi Fb group tuamtuamte thu gina lo teng genna tawh buahsak loin, kiselna group suaksak lo zaw in ( i kisel kinial zongin a khantoh vai leh pil vai hi ding), unau beel kang kituhna group suak saksak nawn kei ni. News a kipost leh news bangin sim lel in, ngaihsutna genna thu a kipost leh a hoih teng zuih pah in, i kup beh nop a om leh a khantoh huai ding thute leh a thei lote theih beh ding kup beh kisin zaw leng cidam huai in, pil huai zaw ding hi. Ei leh ei kizuak, kitawlem leh kiminsiatsakna ding thute post khawlsan ta ni.

Kiatna ding sangin khantoh theihna ding hanciamna khawlsan loin, hanciam behbeh zaw lai ni. Kup ding leh gen ding i theih kei leh zong kup loh ding leh gen loh ding beek theih sawm ni. lai ni. Kup ding leh gen ding i theih kei leh zong kup loh ding leh gen loh ding beek theih sawm ni.

"Na lawmte in a kisap lohpi paulap bawl se kei in. Na galte nangawn in na paulapna um lo lai ding hi." -John Wooden

 Thang Khan Lian #ZUNs reports