A KAM A UK ZO LO PUTEEKPA' TANGTHU
Ni dang lai-in puteek khat in zuau thu phuaktawm a, a inn veng tangvalno khat guta hi cih mun khempeuh ah thu thangsak hi. A thu phuahtawm a sawt khit teh a za ten um uh ahih manin tua tangvalno kiman a, thongkia hi. Ahih hangin ni tam lo khit nungin thukhenna zum ah thusitna a kineihphat kik ciangin tua khangno mawh lo hi cih teci tawh lahna ding kimu ahih manin kikhahkhia kik hi.
Thonginn panin hong kikhahkhiat khit ciangin tua tangvalno lungkim lo ahih manin tua puteekpa in a man loin ngawh in, a thongkiat manin thukhen zum ah heek hi. Thukhen (sitni; lawyer) ten tua puteekpa thusitna hong nei tak ciangun tua puteekpa in, “Ka gen mawkmawk hi a, kuamah poina ding leh liamsakna ding ka thugen in piangsak lo hi. Thong ah a kiat hangin kikhahkhia kik pah hi,” ci hi.
Thukhenpa’n a thukhenna zum ah tua puteekpa tungah a pulakkhiat ma-in puteekpa kiangah, “Tua tangvalno tawh kisai na thugen khempeuh lai ah gelh in la, na gelh khit ciangin tua na gelhna a lai neu cikcik in balkek in la, inn na ciah kik ciangin tua lai themte na car tawlet (window) ah lawnkhia in. Zing ciangin ka thukhenna za dingin hong pai kik in,” ci-in thu pia hi.
A zing ciangin thukhenpa in a thukhenna a pulakkhiat ma-in puteekpa kiangah, “Thukhenna daan (sentence) na ngah ma-in zan a na car tawlet panin na lai balkek them khempeuh a vek in na va kaihkhop kik ding ka deih a, a vek in thukhenna zum ah hong paipih kik in,” ci-in thu pia hi.
Puteekpa in, “Tua bangin ka kaikhawm kik thei kei hi. Bang hang hiam cih leh ka paihkhiat khit phet in huih in mutmang pah a, a omna ding uh ka thei nawn kei hi,” ci-in dawng hi.
Thukhenpa in, “Tua mah bangin nap au mawkmawk leh na thugen mawkmawk ten mi khat thumanna siasak a, na bawlphat kik nop hangin na bawlpha kik thei kei hi. Mi khat hoihna thu gen ding na thei vet kei leh bangmah gen sese kei in. I kam a cing zo I hih ding mi khempeuh I tavuan leh a kam’ to (master) I hi a, I kam kem in cing zo leng I paukhiatsate sila kisuak lo ding hi. Ka na uk zo in, na cing zawh mateng thong ah na kiat loh phamawh hi," ci-in thongkia dingin daan pia hi.
Mi gensiatna leh thu phuahtawh pen guktatna sangin siahuai zaw hi. Na upmawh leh phuahtawm thu na ban gengen leh na thugen khatvei a ki-up hangin hong ki-up nawn loh ciangin na thugen khempeuh kuamah in um ngei nawn lo ding hi. Bang hang hiam cih leh mi gensiatna in mite hihna manphatna, thupina (dignity), minthanna leh mi hoih hi ci-a mi tampi in a theihna (reputation) leh mi up theih dingin a manphatna (credibility) na guksak a, na guksak khit ciangin kipia kik thei lo hi. Na thugen khitsa leh leh na paukhiatsa na la kik thei kei hi. Na khe a kital ciangin na kipna, kikhaikimna (balance) na khahsuah a, na lei na kep zawh loh ciangin na gen khiatsa thu hoih lo khempeuh na la kik thei nawn kei hi.
✍ Thang Khan Lian
No comments:
Post a Comment