KISIALPIH DING LEH ULTUNGSAK NOP A HAU ZOMITE

KISIALPIH DING LEH ULTUNGSAK NOP A HAU ZOMITE

Kuamah in i upna hong dot kei leh Farisaite bang keekkeek in LST tang peuh talsuan banga suangsuang kul se lo a, Christian hi'ng ci-a kuamah dot loh pi-a gengen ding hilo hi. I upna midang ten hong muh theihna dingin sepkhiatna leh i gamtatna tawh i lah khiat ding thupi zaw hi. Khuavak in, "Kei khuavak hi'ng," ni in, " Kei ni hi'ng," ci ngei lo napi a vakna uh leitung mi khempeuh in a muh banah a mialna mun teng zong taang zo lai hi.

Min pen hong kisapna ding leh hong kiciamtehna ding ahih manin lai poimawhte (documents), Gmail, Fb ac ID leh adng dng ah zat loh phamawh mah hi. Beh min banah Zomi cih zong behlap tangtang kisam lua nawn lo hi. Hong thei nuam ten bang beh hiam, bang minam hiam ci-a hong kan banah i nu, i pa leh i khua i tui nangawn hong kan lai ding uh hi.

I beh min leh i minam min i lapsang nuam leh no hoih sem khia in, thuman in, pilna thupi bawl in, mi phak ding hanciam zaw in, mi tungah leng sawm in, kithutuak in, pangkhawm in, mi lian, mi lal suahna ding hanciam tek zaw leng midang ten i beh min leh i minam minthong kan pah ding a, ciapteh leh theih tham hong sa pan ding hi.

Kisialpih masak loh ding teng peuh kisialpih masa sak loin i kisialpih nop leh a kisam masa teng sep leh bawl masak ding hanciam phot ni. Buai loh ding teng buaipih nawn kei ni. I beh leh pawlpi bek i ultungsak nuam luat manin i kipumkhatna ding leh khan'tohna ding hong dal den a, hong hencip den hi. Hong hencip khempeuh a phel khia kik thei ding ei mah i hi hi.

🖋️Thang Khan Lian