A MAWKNAPI A GAM LEH MINAM ITNA

A MAWKNAPI A GAM LEH MINAM ITNA

Gam itna (nationalism) leh gam it luat man in sepkhiatna tawh lahna (patriotism) pen tong leh lam in kikhia hi. Tehkak theih ding hi vet lo hi.

🕯️Ka gam, ka lei ka it ing na cih hangin 
sepkhiatna tawh na lak kei leh
Na gam itna a mawknapi ahi hi.

🕯️Ka gam, ka lei ka it ing ci napi in
na lalsan ngam a, na thudon nawn kei leh
Na gam itna a mawknapi ahi hi.

🕯️Ka gam, ka lei it ing ci napi
A sunga teng a mite na it kei leh
Na gam itna a mawknapi ahi hi.

🕯️Ka gam, ka lei ka it ing ci napi
A sunga a sing, a lo leh a suangte na it kei leh
Na gam itna a mawknapi ahi hi.

🕯️Ka gam, ka lei it ing ci napi na beh leh na pawlpi bek na it a, Tua bek su hum, taw hum in na hum teta nop den kei leh
Na gam itna a mawknapi ahi hi.

🕯️Ka gam, ka lei it ing ci napi cimawh genthei leh
Huh ding kisam tagah lu bawk, methaite itna na neih kei leh
Na gam itna a mawknapi ahi hi.

🕯️Ka gam, ka lei it ing ci napi a sunga tengte tawh
Kikhawl thei loin, ki-it kilemna ding na lunggulh ngei kei leh
Na gam itna a mawknapi ahi hi.

🕯️Ka gam, ka lei ing ci napi namdangte leh gamdangte siatna ding bek ngaihsun in, a ki-it a kilem teng na suktuah den leh
Gam itna neu (narrow nationalism) nei na hih manin
Na gam itna pen a hawmpi leh a mawknapi taktak ahi hi.

🖋️✒️Thang Khan Lian