ZOMITE KHAN'TOHZIA LEH I TUN'NA CIANG

ZOMITE KHAN'TOHZIA LEH I TUN'NA CIANG

👉Mi Facebook phishing bawlsak (temporary block) thei in, pil kisa lua pah. Tua lah minute nih leh thum sunga kihong kik ziau pah ahih beek thei lo napi pil kisa mahmah dep zaw lai. A hai lo buangin fb security password leh email leh phone number security dingin koih tek a, millions vei na phishing sak hangin permanent block sak thei lo ding hi teh. Na kibatpih khat fb ac phishing na bawl khaksak ciangin na kilule sak pen gilbeem lutna dinga toh honna in kimang thei sam ding hi.

👉Pilna leh sepna ngah man a gamdang tung hilo napi leitung thu teng leh leitung tangthu (history), international politics pai dan, neo-colonialism, neo-imperialism vai, democracy vai sanginn ah laibu zong mu kha lo leh lawng kha lo tam mahmah napi thu khempeuh a thei bang keek a pau phanphan ngam lai, upmawh thu teng leh khualak a mi thugen a hem zak teng um pah a kilule sak kitam lai mahmah hi.

👉Fb lawng khak cil a kipan news sim kha, tua zong Zokam tawh a kitei teng hi zaw lai, pan hi napi news khat kipost leh thal nial pah ngak leklek, comments ah upmawh teng leh maan gina lo teng peuh post thei in, pil kisa lua pah lai kitam mahmah lai hi.

👉Politicians ten a ciampeelna, a ginat lohna a tuangsak ngam newste pen India gam-a ruling party BJP in anti-natonalist ci, US ah Trump in Americate gal, Fake news a cih kammal thukimpih lua in, Zokam a news group tengah a kammal zat viral sak siam kitam mahmah lai dep hi. News atte leh puakte (reporter, correspondence) pen mihing mah ahih man un a gen teng uh 100% man khin ngei lo mah ding hi. Media khempeuh anti-natonalist leh Fake news cih pen haina lak panin a suuk pen hi. I haina tangkoko kei leng zong mi'n tel lua hi.

👉Gamdang tun manin khuak gol pah ding, mit leh bil gol pah ding sa a, a pil kisa lua pah kitam mahmah lai hi. April 12, 1961 pek in mi space na kah ta a, technology leh pilna sang zaw sem ding hanciam lai uh hi. Zomite pen sial bangin a tat ngeisa mun teng a tata in, sep ngeisa teng leh theih ngeisa teng tawh lungkim lai hi. I tuat ngilsa lampi mah tawn in kipai ngaungau den lai napi a pil lua kisa kitam mahmah mawk hi.

👉Zomi a tuibang kigawm a, kipumkhat ding vai kam dimpi tawh awngawng napi news group khat ah pau leh ham dang khat news kipost kha leh ko suk pah, "Sim hak bialbual si e, hih bang pau leh lai peuh," ci lanlan a Zomite gawm sawm kitam lai mahmah hi. Tua bang ngaihsutna na neih leh nang bek zong Zomi in na kipumkhat zo ngei kei ding hi. Na ngaihsutna a liat leh na gam zai pan ding hi.

📚Pilna I thudon mateng, thu theihna i pi bawl mateng leh thu i kan mateng news kiteite Pasian zah a i muh gamte phatna thu a kisuaksak loh tengin tangtel sihtan bangin, i sa-ik den ding hi. News bek sim ken la, history zong kan in. Laisim i hahkat mateng thuman leh man lo kikhentel thei ngei lo dinga, mi sila leh mi nuai ah ki-om den ding hi. Pilna i thupi sim mateng haina henkol panin kisuakta thei ngei lo ding hi.

Zomite hai lua sa ing.. Zomi ka hi. 😢😢😢

🖋️Thang Khan Lian