SAUDI LEH UAE IN GCC PANIN QATAR DAANGKOIH SAWMNA HANGIN GULF GAMAH KITHEIHSIAM LOHNA LIANPI PIANGSAK

SAUDI LEH UAE IN GCC PANIN QATAR DAANGKOIH SAWMNA HANGIN GULF GAMAH KITHEIHSIAM LOHNA LIANPI PIANGSAK

June 6, 2017: US President Trump in nung kha in Middle East a zinna ah tua kiim a gam tengin Iran a langpan'na dingin new approach (policy) a bawl in Saudi Arabia leh United Arab Emirates (UAE) hangsansak (emboldens) a, Arab gamte kipawlna Gulf Cooperation Council (GCC) panin tu-in Saudi Arabia UAE in Qatar daangkoih (isolate) sawm uh hi ci-in analysts ten ci uh hi.

Gas hau Qatar in sawtpi a kipanin independent foreign policy nei in na zang a, nung kha-in US in Iran a gal bawlna (hostility) a gam ua official news agency in a dotna thu nawlkhin in, Emir Sheikh Tamim bin Hamad Al-Thani in Trump in Saudi Arabia ah a zin lai-in a kampau a zatte a dotna (questioning) nawlkhin sak hi. Emir Sheikh Tamim bin Hamad Al-Thani' kampaute pen Trump in Iran a langpanna thu a deih lohna dotna ahih manin a thugente pen Sunni kumpite (monarchies) pangbetna tawh kibang hi. Hih thu hangin zan in Saudi Arabia, UAE, Yemen, Bahrain leh Egypt in Qatar tawh diplomatic lamsang a kizopna khaktan hi. Hih thu hangin GCC kipawlna sungah kitheihsiam lohna lianpi piangsak in, Qatar in suakta takin foreign policy a neihna leh Muslim Brotherhood kipawlna tawh kizopna a neih manin Saudi leh UEA in in gam guk kipawlkhawmna GCC panin Qatar daangkoih hi ci-in European Council on Foreign Relation ah visiting fellow Adam Baron in ci hi.

Muslim Brotherhood pen a kiphutkhiatna kum 90 hita a, Egypt gam-a Islamist group kipawlkhawmna ahih banah hih kipawlkhawmna pen Arab gam tengah kizeel hi. Mohamed Morsi' makaihna tawh Egypt gam-a democratic election ah Muslim Brotherhood in gualzawhna hong ngah in, Morsi in Egypt president hong let ciangin Saudi Arabia, Egypt leh UAE in Brotherhood government pen “terrorist group” in pulak khum pong uh a, 2013 in Egypt galkap ten thatang hatna zangin Morsi laih (coup) in, thongah khum a, amah leh Muslim Brotherhood member tampi sih daan pia hi.

Tua bang hong piang ciangin Qatar in democracy kiteelna tawh president cing Morsi a gup manin Bahrain, Saudi Arabia leh UAE thangpai in, 2014 in Qatar panin a Ambassadors-te kha bangzah sung hiam sam kik uh hi. Ahih hangin Qatar in Muslim Brotherhood makai galtaite tampi a gam uh beelsak veve hi. London khuapi a Chatham House ah senior research fellow Jane Kinninmont in Qatar gamtat kik thakna hang hilo zaw in, nung kha-in Middle East gamah Trump a zin lai-in Iran langpang dingin Arab gamte kipawlkhawmna ding a va tangkopih manin tua hun lem la-in Saudi leh UAE in Qatar a daankoih hi zaw hi ci hi.

Saudi' khauh kaihna leh mi tampi dianglutna (bandwagon)

Nung kha-in Saudi khuapi Riyadh ah Trump in Sunni ngongtat ten gam tuamtuam suam uh hi ci-in Gulf gam-a Muslim makai ten hiamgam leh ngongtatte (extremists and terrorists) a hawlkhiatna ding uh leh Iran pen Aram gam kiim tengah terrorist piangsak ahih manin langpang khawm ding hi ci-in va cial hi. S. Rajaratnam School of International Studies, Singapore a senior fellow James Dorsey in Saudi leh UAE in GCC panin Qatar daangkoih ding a sawmna pen Iran a dangkoihna uh behlapna hi ci hi. Hih bangin Qatar daangkoihna dingin campaign a bawl uh len non-Arab gam ten zong Qatar a daangkoihna ding uh a nawhna leh Qatar in Iran langpangna dingin anti-Iranian Saudi bandwagon kici ah a kihel nuam loh man leh Qatar in Islamist group leh militant groups tawh kizopna a neih man hi ci-in gelh hi.

Qatar pen Hamas makai lui leh galtai Khaled Meshaal bukna gam hi a, Syria ah Islamist rebels-te huhna pia hi ci-in Syria kumpi in ngawh a, 2013 in zong Qatar khuapi Doha ah Afghan Taliban ten zum (office) hong uh hi. Iran in hih Gulf gamte kikal ah kitheihsiam lohna pen thagum zangin kivengsak thei lo ding a, gam kiangte leh leitung mual leh guam, lui leh tuipi (geography) pen ut bangbangin kilaih thei lo hi ci hi. Doha pansan Al Jazeera news agencyte Saudi gam-a local office zong Saudi kumpi in khaksak hi. US Secretary of State Rex Tillerson in Sydney khuapi a zinna panin Gul gam innvengte kitheihsiam lohna hangin IS dona nawngkaisak dingin ka lamen kei a, a kitheihsiam lohna uh leh a kipumkhatna uh dengdelsakte a ven'sakna ding uh a deihna thu gen hi.

Source: The Hindu
@Thang Khan Lian