YAKUB ABDUL RAZAK MENON JULY 30 CIANG KIKHAILUM DING

YAKUB ABDUL RAZAK MENON JULY 30 CIANG KIKHAILUM DING

1993 kum a Mumbai khuapi sung mun 13 a bomb puaksak a kigolh Yakub Abdul Razak Memon July 30 nai 7 am ciangin Central Jail, Nagpur ah kikhailum ding hi. A upa Tiger Memon pen hih bomb puaksakte' maikaipi hi a, taimang ahih manin tudong kiman nai lo hi.

Terrorist and Disruptive Activities (TADA) Court in July 27, 2007 in sihna thuak dingin thukhenna na pia hi. Yakub Menon in India thukhenna sangpen Supreme Court ah hih sihna thuak ding panin a suaktak nang om sun ngaihdam ngetna lai (mercy petition) khia a, July 21 ciangin Supreme Court in a vai gensiang ding hi. Ahih hangin Maharashtra State Government in July 30 ciangin khailup ding in Nagpur aa a kikhumna thonginn kithawi khol dingin thu zasak hi. India President kiangah zong 'mercy petition' khia a, President pa'n May kha in na nial hi.

Mumbai bomb puakah mi 257 si a, mi 700 val liam hi. Yakub Menon' nu leh pa, a sanggam pasal thum, a zi leh a sanggampa' zi zong hih bomb puaksakin kigolh hi cin ngawhna tuak uh hi. Ahih hangin a zi, a nu leh leh a sanggampa Suleiman te' kigolhna taktak kician kimu lo ahih manin kikhah kik hi. Hih Mumbai bomb puaksak a kigolh mi 10 in damsung thongkia dingin thukhenna tuak uh hi.

Underworld makai (don) Dawood Ibrahim zong hih thu ah ngawhna tuak a, tudong taimang ahih manin kiman nai lo hi. Pakisitan ah busim dingin ki-ummawh hi. Bollywood limcing (actor) Sanjay Dutt zong Mumbai bomb puah lai in thau a lai nei lopi kem in kiman a, TADA in mawhpaih in thong kiat lawh lai hi.

Yakub Menon pen kum 52 a upa hi a, a kikhailupni ciangin kum 53 cing lian ding hi. Yakub pen chartered accountant sem hi a, a thong kiat sungin correspondence in IGNOU panin English Literature leh Political Science subject ah Master degree ngah hi. Thonginn ah a ompihte lai hilh in Urdu zong hilh thuah ahih manin "Sia pa" cin sam uh hi. Muslimte Ramzan sungin zong ann ngawl a, van a lei ciangin zong a thong kiatpihte hawm hi.

Mumbai bomb puak khit in taimang a, 1994 in Nepal ah kiman hi. Mumbai bomb puaksak na dingin bomb puaksakte sum pia a, bomb leh thau tawh kiman ahih manin sihna thuak dingin TADA Court in 2007 in thukhen hi. Sih ding thukhenna thu thukhenpan a piak lai in Jesuh kammal "Pa aw, hih miten bang hih ahi uh hiam cih thei lo ahih man un na maisak in" ci hi.

Mumbai Jail Manual,1962 thukhunsa bangin a khailumpa sum tang Rs.10-25 kikal kipia ding hi.

-Mid-day News and The Hindu