DRUG LORD JAOQUIN 'EL CHAPO' GUZMAN THONG PAN TAIKHIAKIK

DRUG LORD JAOQUIN 'EL CHAPO' GUZMAN THONG PAN TAIKHIAKIK

July 13,2015

Mexico a khamtheih zuak a sumbawl Joaquin “El Chapo” Guzman 'the world’s most famous drug lord' a kici pa a kikhumna Altiplano thonginn (maximum security prison, Mexico) panin a nih veina dingin taikhia kik a, Mexico police ten zan in mat dingin zon kipan uh hi.

Jaoquin Guzman pen Sinolao cartel (khamtheih zuak) pawlte' makai lian pen hi a, Altiplano thongah kum khat leh a lang kikhumta hi. Hih thong pen top drug boss te' kikhumna hi a, kua mah luh zo loh ding liangin kingaihsun hi. Guzman tangthu laibu in kibawl a, best selling book nangawn ngah liang in, la ngawn kiphuah khum hi. Guzman a tun feet 5 leh inch 6 in sang ahihmanin "Shorty" ci'n kisam hi.

Security a hoih mahmah hangin Guzman ni saguk ni (Saturday) in a thonginn omna kisilna inn dei vang panin tai khia a, mile khat sangin a sau zaw tuilong ah kitholh in vaimiim huan leh bawng khawina huan ah pusuak ziau hi.

Mexican President Enrique Peña Nieto in khamtheih zuak a sumbawl tampi mansak khin a, Mexico leh leitung in in pakta mahmah hi. Ahih hangin Guzman taikhiat kikna in minsiatna tampi guan hi. Guzman 2001 in thong panin taikhia a, February 2014 in kimankik zo nawn pan hi.

Joaquín “El Chapo” Guzmán pen leitung ah khamtheih zuakte lakah a minthang pen in kingaihsun a, Mexico leh leitung mun tuamtuam ah 'the most wanted criminal' in kiciamteh hi. US in February, 2014 in Guzman Mexico te kiangah US ah thusitna neih dingin (trial for extradition) ngen uh a, ahih hangin Mexico President Nieto in ko gamah thusitna nei nung ci-in pia khia nuam lo ahih manin US te lungkim lo uh a, US leh Mexico kitanauna nangawn siasak zo hi.

U.S. Attorney General Loretta E. Lynch in zanin a thugenna ah Guzman matkikna dingin US in huhna kisam khempeuh pia dingin man khin hi ci'n gen hi. Mexico's national security commissioner, Monte Alejandro Rubido, in thuthaksaite kiangah a genna ah Guzman pen zanhal nitak nai 8 in a thong sungah om lai hi ci'n gen hi. Altiplano thonginn kianga tuilong bawlte ' (pipe-line project construction) huhna tawh taikhia dingin ki-ummawh hi.

Altiplano panin mawtaw minute 45 taina a gamla Toluca airport zong khakcip uh hi. hi. Ahih hangin Guzman mankik ding pen baih nawn khollo ding hi. Guzman pawlte 'Sinaloa Cartel' ten a khamtheih zuakna ding un van pua vanlen (cargo aircraft), private aircraft, tuinuai tembaw (submarines) leh van koihna bawm tum thei (submersible and semi-submersible vessels), container ships, supply vessels, go-fast boats, fishing vessels, bus, rail cars, tractor trailers, trucks, automobiles, private leh commercial interstate leh foreign carriers te zang ziahziah uh hi ci'n Mexico Justice Department in tukum bul in gen hi. Sinaloa ten Mexico ah cocaine, methamphetamine, ganza (marijuana), khamtheih tuamtuam leh methamphetamine bawlna ding chemical gam dang panin Mexico ah pua lut uh a, a bawlkhit ciang un San Diego zangin Us leh gam tuamtuamah zuak ziahziah uh hi.

-Washington Post