ISRO IN UK TE SATELLITE 5 PUA PSLV-C28 KAPKHIA

ISRO IN UK TE SATELLITE 5 PUA PSLV-C28 KAPKHIA

July 11,2015

SRIHARIKOTA: Indian Space Research Organization (ISRO) te' Polar Satellite Launch Vehicle (PSLV) C28 in Satish Dhawan Space Centre, Sriharikota panin zan nitak nai 9:58 lian in UK te satellite 5 kapkhiatsak uh hi.

Hih pen PSLV 30 vei a kikapkhiatna hita a, 29 vei a lawhcinna hi a, ISRO te' PSLV kap khiatte lak panin a gik pen hi lai hi. UK satellite 5 a puak teng tawh kigawmin Kg. 1,440 in gik hi. PSLV in June 30,2014 a France te commercial launch satellite SPOT 7 Kg. 712 a gik na puak/kapkhiat sak khin ngei hi. Tu tungin ISRO in XL version rocket (additional strap tawh kithuah) na zang a, hih pen leitung a dingin a hoih pen pawl hi a, sum muhna dingin ISRO te nakpi takin huh ding hi.

Hih ISRO four-stage PSLV-C28 44.4 metre in sang a, ton 320 a gik van pua zo hi. Tu kum a dingin ISRO in PSLV a kapkhiat a nih veina hi ta hi.
September 24, 2014 (7:47 am) in zong ISRO in Mars Orbiter Mission (MOM) spacecraft Mars planet ah na kap khia uh hi. Mars a koih ding Satellite kikapkhia teng lak panin MOP kapkhiatna ah sum tawm bei pen lai a, Hollywood movie 'Avatar' bawlna a kizang sangin tawm bei zaw lai hi.

ISRO ten amau van bawl mah zangin Germany, Republic of Korea, Belgium, Indonesia, Argentina, Italy, Israel, Canada, Japan, Netherlands, Denmark, Turkey, Switzerland, Algeria, Singapore, Luxembourg, France leh Austria te' satellite te zong na kap khiatsak khin zo uh hi..