MIHING LEH PA PO BANG I NUNTAKNA SUNGAH A LUNGNGAIHHUAI THU

MIHING LEH PA PO BANG I NUNTAKNA SUNGAH A LUNGNGAIHHUAI THU

🕊️Vasate in a nuntak lai sung tengin lungno 🐛leh miksite 🐜an nek in nei uh a, a an dingin zang uh hi.

🐦Vasate a sih uh ciangin lungno leh miksite in an nek in nei in, an dingin zangin ne uh hi.

🌲Singkung khat panin meigit tang; meimit bil (matchstick) million kibawl zo hi. Ahih hangin meigit tang khat bek in singkung million kangtumsak zo hi.

A thu a mun leh a hun tawh kizui nate (circumstances) pen kilaih vat thei hi a, kilaih den hi. Tu ni-in na vangliat mahmah a, thuneihna sangpen na nei a, ngalkhaat bangin na thahat mahmah hangin nang sangin hun (time) thahat zaw leh vanglian zaw in, thakhauh zaw hi cih mangngilh kei in.

Na thuneihna, na thahatna, na neih na lam suangin kam bembem in ham kha pah kei in kuku laulau pah kei in. Khut sung lumlet mitphial kal in bei ziau thei a, huih let khiat ansi leh anvai bangin lengmang in maimang ziau thei hi. Den ciang leh zing ciang hun ding theikhol in, mukhol thei lo hi teh cih mangngilh kha kei in sanggam aw.

I cinte (nails) a sau ciangin i khut zungte kitan loin i cin saute bek kitan hi. Tuamah bangin kitelsiam lohna a khan' ciangin eima ading bek khual luatna leh i angsung khualna (ego) bek tan ding hi a, mi dangte tawh i kizopna leh i kal (relationships) tan ding leh sattat pah ding hilo hi. Kholhpih hoih leh manpha i neihte sup khak ding baih mahmah napi kholhpih hoih leh manpha muh ding hamsa mahmah hi.

Ahih hangin mi dangte tawh kizopna ding leh kikholhpih ding zongin kilawmtatna leh kizopna na bawl ciangin kihong lua pah kei in. Bang hang hiam cih leh tawm bekin hong itna uh man a, pawl khatte in lawp luatna, hong tel nop man bek uh leh nang tungah lametna leh meetna ding bek ngimna nei in hong pawl bawl nuam tam mahmah hi. A taktak, a thuman leh a sit (genuine) a hong lawm bawl na tam het lo hi. A sungtawng uh-a om bang hi hiam cih thei lopi leh ngia tuuvon silh hi napi tuuno maj na sak khak ding baihlam mahmah hi. A gilkial humpinelkai' mai-a om ganhing na bat khak ding kidawm in.

Mihingte nuntakna pen pa po bang lel hi a, a palh khit a sawt lo ciangin muat hi. A muat khinsa pa kimanna ding tam nawn lo hi. Na palh lai sung teng mi dangte etlah leh nek theih dingin na nuntakna zang lecin na kisik kei ding hi.

✍️Thang Khan Lian