MAKAITE DEM IN HONG KINGAWHNGAWH THONG

MAKAITE DEM IN HONG KINGAWHNGAWH THONG

Makaite dem thei loh sa, a hoih lohna uh gen theih loh a sa kitam dep hi. Mi dem (compete) cih pen ken kuamah dem ngei lo hi'ng. Ahihna uh lopi ka gen (ie gensia, criticised) ngei kei a, ahihna mah uh a gen ka hi bek hi. Mi' hih lohnapi gensiatna dingin hum pammaih lel a, mi demna dingin citna leh hatna ka nei kei hi. Kei teek lua ta, ka tangval lai hi le bel mi dem nop hau ngel in, dem dinga ka hawi gieugiau tam nei mah ve hi veng maw😰😰😰

Ahihna uh i gen pen a dem leh a gensia kici ngei lo hi. Makai khat hihna gensia or dem ci-a hong ngawh ngam ten ahih lohna uh ka demna leh gensiatna uh hong zasak ta peuh un. Ka kam a cidam mahmah hangin numei thusiate bangin mi gensiatna ding leh demna dingin ka hun pammaih ka sa lua lai hi. Makaite dem leh gensia ci-a hong ngawh ngam ten mangpau compete leh criticism cih a khentel thei nai lo cihna leh Zokam ah ahihna bang uh gen leh dem/gensia cih khentel thei nai lo na hi zaw uh a, mangpau na theih kei uh leh Zokam na sin phapha lai un.

I sep lohpi leh ihihna lopi mi hong phat ding deihna pen naupang vai leh haina lianpen khat mah hi. "Mihaite pen kineihkhem bawl siamte kineihkhemna ngaih mahmah a um teng hi," ci-in Spurgeon in na gen hi. Ka pil loh hangin Spurgeon in mihai ci-in a ciamtehna sungah a kihel nuam lo bek ka hi zaw hi. Makai khat ka phat nop hangin ahihna lopi peuh um pah in, a pum phat ngam lo leh a nung uh sialpi nung zuih bangin a zui nuam lo ka hi bek hi. Ken ka zuih man loh hangin a zui ding kiphu ngeingai in, tam lua lel ahih manin zuih teitei ding ka awlmawh se kei hi.

Vision nei lo makai khat a kimanna ding om lo a, vision nei napi in a vision muh theih dingin a kilatkhiat/sepkhiat theih kei leh a kimanna ding om tuan lo hi. Koimah ciang na tun nop kei leh kongzing a mihon vak thap teng sialpi nung zuih in va zuizui lel in.

"Ahih lohna bang genna (criticism; gensiatna i cih) guahzu banga zu pen a khauh luat loh ding hi a, gensiatna tuakpa' khantohna dinga kammal hoih kisam hi."
-Frank A. Clark

"Gensiatna na tuah nop kei leh bangmah gen kei in la, bangmah hi se kei in. "
-Elbert Hubbard
(Makai zong pang se dah in la, mot om in a cih nopna hi).

"A hoih ding lametna tawh nungta in la, lungdam in. Na nakpi takin sem in la, khawlsan kei in. Gensiatna ngahna dingin lampi hong in la, sin ding omte sin beh in. Mi lungkim leh mi hoih leh mi hoih diakte tawh kikhawl in."
-Tena Desea

"A nawngkaihuai thu pen mi a tam zawte gensiatna sangin phatna hangin siasak zaw hi."
-Norman Vincent Peale

"America president gensiat lohna dingin pulakna pen American mipite lehpeina hi."
-US President 26 veina Theodore Roosevelt

"Gensiatna om lohna mun ah democracy pen mi khat bek deihna (tyranny) tawh ki-ukna suak thei hi." -Mohd. Hamid Ansari, Vice President of India
(11.8.2007 - 11.8.2017)

"Gensiat leh a citlahna leh a thuman lohna gen ding a deih lo makai khat pen a ut bangbangin a phengtat nuam leh ngongtat nuam makai hi bek a, makai hoih zawk ding hanciamna a nei kilkel lo, zatna ding a om vet lo makai nuam pong hi lel hi."
-Thang Khan Lian

🖋️Thang Khan Lian