DEMOCRACY, MIPITE LEH MAKAITE KIKAL

DEMOCRACY, MIPITE LEH MAKAITE KIKAL

Democracy tel zo nai mahmah lo milmel ihih a, dictatorship leh authoritarianism tawh ki-ukna in hong bumhai lai a, a gu kham a luvai lailai ihih leh hih kammalte ngaihsun pha phot lai ni:

Herbert Hoover in, "Sepkhiatna tawh kithuah lo kammal bekbekte pen muh theih dinga sepkhiatna tawh kithuah ngaihsutna (idealism) thatpa hi," na ci hi. "Na hih lohna genna (criticism, Zomi ten gensiatna i cih pah pong) gen ding panin na kipelh nop leh bangmah hih kei in la, bangmah gen kei in la, bangmah suak in bangmah hi sese kei in," ci-in Elbert Hubert in gen ci hi.

American President Theodore Roosevelt in, "President ahihna lo gen (gensiatna i cihcih; criticism) theih loh ding hi ci-a pulak a tangkona pen sia leh pha khen theihna tawh America gam mite lehpeina (morally treason) hi," na ci miau hi. US President masa pen George Washington in lah, "Suakta takin ngaihsutna genkhiat theihna (freedom of speech) a kilaksak ciangin a pau thei lo leh dai dide gawh dinga kikai tuu banga hong kimakaih hi ta hi," na ci hi. India gam lapi phuak pa leh literature ah Nobel Prize ngah leh British ten India a ukkhumna deih loin galhangsan (knighthood) pahtawina a piak uh a piakik ngam pu Rabindranath Tagore in," Democracy gam ah mi khempeuh kumpi hi (Amra saboi raja; All of us are kings)" na ci hi.

Political democracy ah thuneihna sangpen len leh to (master) za a len mipite vote khiat ding ciang bekin a vote uh zangin a pau ding uh deih in, tua lo buang pau thei lo a dai dide a omsak nuam ihih leh gawh dinga kikai tuuno banga bawl nuam ihih leh daih dide dan dan hi. Vite zong mipite piak kisam sese lo hi. Elections ah mipite sum (public money) tam bei thei lua ahih manin elections zong neih thapai kisam sese lo hi.

Genbaang lo Pasian in a cih Job in zong ze-etna bang teng thuak hiam cih ngaihsuthuai sa ing. Makai khat pen political society ah sila or palai nasem (public servant or representative) hi lel hi. A political master mipi ten thu nei loin bangmah gen ding a deih lo a public servant kimlai public master a suak nuam makai ten ganhing makaih lel hen. Ahihna lo gen a buai man ding om kei. Ahih lohna a kigen a, a zakdah uh leh defamation case file thei lua uh hi.

Mipite nasem ding, mipite sila gam makaite cite ahihna bang uh leh ahih lohna bang uh gen ding i zakdah a, mipite sila (gam makaite) kumpi (king) suaksak nuam cinten lai ihih leh dictatorship leh authoritarianism tawh ki-ukna North Korea, kumpi khat bek a omna Sunni Muslim gam Middle East gamte ah va peem in, gam dang leh gam thumna zuan nuam khempeuh leh zuan khin a butom khin teng in zong Sunni Middle East gamte bek ah refugee na siau lel le uh cin vaisiang penpen in, thoveng pen ding hi.

✍️Thang Khan Lian