NGIA LEH VA NGAWNGSAU' TANGTHU
Hun khat lai-in gammang ah ngia (wolf) khat om hi. Ni khat gammang kuam teng hong pheklek kawikawi leh sapul khat mu a, a sate nek ding a om nawn loh hangin gamsa leh sa sial ne vasate nek baang saguh bawl a kham khop ding tampi tuak kha hi. A muk liak pualpual in, gamsa dang hong mu hong hiam cih dak gualgual in sagul omna delh samsam pah hi.
A saguh muh gamsa dangte tuah khak ding lauthawngin tua ngia in a pet theih pet khak teng a ban pet samsam leh saguh a dang tawngah hong awk vat hi. A saguh kiat ding lametna lianpi tawh a khuh thalthal hangin a gawl a saguh awkkhia zo lo ahih manin a awkawkna hangin tawl gawp ahih manin cimawh in hong kual khengkhuang hi. Cimawh mangbangin ngai a om lai-in va ngawngsau (va kengsang a ci zong; crane) khat lamet lohpi in ngia omna ah hong leng kha hi. Cimawh beidong a om ngia a muh ciangin hehpihhuaisa ahih manin ngia' kiangah tua va ngawngsau hong bawh suk hi.
Ngia zong sih ham dialdual liangin va ngawngsau' huh ding hong thum a, "Lawm aw, hehpihna tawh hong huh hi. Saguh ka pet lai takin thalh kha vat ka hih manin ka gawl tawngah saguh bawk them khat awk hi. Hong lakkhiatsak in. Nong huhna sanga kilawm zaw thaman hoih mahmah tawh kong thuk kik peelmawh ding hi," ci-in huhna ding ngenin kamciamna bawl thuah lai hi.
Va ngawngsau in hehpih lua ahih manin huh dingin thukhensatna hong la ta hi. Va ngawngsau in ngia dang tawngah a muk sau zeza thun suk a, a saguh awk deih takin petin haksatna bangmah om se loin lakkhiat sak ziau hi. Tua leh va ngawngsau in, "Lawm aw, kong huh man thaman piak dinga nong ciam bangin hong pia ta in," ci hi.
Ahih hangin a dang tawngah saguh awk nawn lo hi cih ngia in a theihtel ciangin, "Na hihna bangin lumkim lel in. Na muk sau zeza ka dang tawngah thun sukin haksa het loin saguh na lakhia ziau a, na muk ah liamna bangmah a om loh banah na gim na tawl beek tuam kei hi. Nong huh man thaman piak tham lo a, piak dingin zong kilawm lo hi teh," ci-in nuihsan hi. Va ngawngsau zong ngia in a ciampeelna ta hi cih a tel ciangin thangpai mahmah a, thakhat in ngia' mit tukkhap sakin lengmangsan hi.
Moral: Migilo leh mi thuman lo cimawh beidong mi na tuah ciangin na huh man peuhin a thaman hong loh kik ding lametna tawh huh kha kei in. Na thaman na ngah loh ding lamtak phawk gige in. Thuman lo leh mi gilo khat na khat vei huh in, na hutkhiat hangin na huh leh hutkhiat zom den loh phamawh hi. Thaman ngah kik ding lametna tawh cimawh khat huhna pen huhna hilo a, a meet ding bawlna hi zaw hi. Thaman lametna tawh cimawh khat na huh ciangin na thaman dinga kilawm leh kamciamna hong kibawl bang na ngah kik loh hangin liam lo, sum loin na suahtak leh lungkim zaw ing. Mi huhna ngen in thaman leh loh kik ding ciam napi na piak kik kei leh samsiatna leh a kilawm bang kamsiatna na thuak leh na ngah dinga kilawm letsong mah ahi hi.
-Thang Khan Lian
No comments:
Post a Comment