A PIL BILPI' THUKHENNA

A PIL BILPI' THUKHENNA

Hun khat lai-in mihaupa leh mi zawngpa om a, sakhi thang na siahkhawm uh hi. Mihaupa in a sakhi thang sing tungah siah a, mizawngpa in a sakhi thang lei-ah siah hi. A thang siah khit un kiciamna nei uh a, thang a awk masa sak pen in a awksak lo pa sila in koih/neih ding leh kal khat sung kuamah in a sakhi thang siah uh vil lo dingin thukimna hong bawl uh hi.

Ahih hangin nipi kal khat a cin' ma-in mihaupa in thang uh na vil sima, mizawngpa' thang siahna ah sakhi awk mu hi. Tua leh mihaupa'n manlang takin tua sakhi pen ama' thang siahna
singkung tungah koih to-in na awk sak se mawk hi.

Nipi kal khat hong cing ta ahih manin a kiciam ni uh bangin a thang siah uh vil dingin hong kuankhawm ta uh hi. Thang hong vil tak ciangun mihaupa' thang siahna sing tungah sakhi na awk geigai mawk hi. Mizawngpa in sing tunga sakhi awk a muh ciangin, "Singkung kah thei lo sing tunga thang kisiahna ah sakhi awk thei ngei kei," ci-in mihaupa tawh hong kinial thapai uh hi.

Tua bangin a kinial lai un gammang a om bilpi in lim takin a kinialna teng uh phun lo pau loin na ngaihkhiatsak dide hi. Tua leh bilpi in mihaupa leh mizawngpa kiangah, "Kinial nawn kei un, keimah in thuman leh thutang tawh kituakin nipi kal khat khit ciangin na thubuai uh thu kong khensak ding hi," ci hi. Tua bangin bilpi' genna mihaupa leh mizawngpa'n thukim uh hi.

Thukhen ni hong tung ta hi. Ahih hangin thukhen ding bilpi in a nai hong lap lo sese a, muh dingin om lo hi. Thukhen hun ding nai cing khit naikal 3 nungin thukhenna munah bilpi hong tung pan thalthal hi. Bilpi in thukhen hun lap loin zekai a hong tung' mihaupa'n a muh ciangin bilpi ui ho ngeu ho-in na sal gega in, "Bang hanga thukhen hun ding nai lap loin hong zekai na hi hiam?" ci-in na tai gemgam hi.

Tua leh bilpi in dam in dawng a, "Thukhen hun ding nai a cing dek lian in ka pa' nau suah hunin hong pha citciat se ahih manin a hun hong lap in hong tung zo lo hi'ng.. hong maisak un," ci hi. Mihaupa in, "Leitung piancil a kipanin tu dong pasal naupaai leh nau nei cih bang om ngei kei," ci-in bilpi tai gemgam hi. Tua leh bilpi in zong, "Leitung piancil a kipanin cik mahin singkungah sakhi kah ngei lo a, sakhi thang sing tunga siah om ngei lo a, sakhi sing tunga thang kisiah ah awk ngei lo hi," a cih ciangin mihaupa'n a gen ding thei nawn lo a, thukhenna ah mizawngpa'n zoin mizawngpa sila suak hi.

Na neih leh lam hang leh na hauh manin thuman lopi tawh na ut bangbangin na gamtat buatbuat hangin hong nial ngam tam lo kha mah ding a, hong nial ngam om pah lo kha mah ding hi. Ahih hangin na hauhna kisialpih in na ut bangbangin thuman lo tawh mizawngte neihsa suhsak in, na ut bangbangin a phengtat thei den ding na kisak hangin na hauh manin na vanliatna leh na thuneihna in ciangtan nei a, nang langah Pasian na pang ding lamtak mangngilh kei in. Nang langah Pasian a pang ciangin na guallel ngitnget ding a, maizumna leh mindaina cih loh buang a dang bangmah na thaman leh lawhtak ding om lo hi. A man lopi in midangte na nuaineh sawm leh na nuaineh sawm ten nang hong nuaineh zawsop ding uh hi. Geelna hoih loin a hoih lo mah nang tungah hong tungsak peelmawh hi cih mangngilh kei in.

-Thang Khan Lian