I BIAKNA PIAK DANTE LUNGNNGAIH KIK HUAI HI

I BIAKNA PIAK DANTE LUNGNNGAIH KIK HUAI HI

Ei Zomi ten mundang gamdang i om ciangin nasem silbawl ihih manin a tam zaw nasep vive tawh buai den ihih manin kal khat in khat vei sunsun kikhopna - Nipini kikhopna ah i pai ciangin bang hih dinga pai ihi hiam cih i lungngai ngei hiam? Pasian zahtakna, itna tawh bia dinga pai ihi hiam? Lawm leh gual tawh kimu ding maw? Gualnopna bawl dinga paikhawm ihi hiam? I gilpi ading bek buaipih in Jerusalem khuate bangin pawi an nekna tawh buai thapai dinga paikhawm ihi hiam cih i lungngai ngei hiam? Phat tak Pasian phat leh bia dinga paikhawm ihi zaw hiam sanggamte aw??? Pasian biak piak ding ngaihsun masa loin i ngeinate lak khia dinga paikhawm ihi hiam?

Biakinn kician i neih zawh nai loh manin a lem theihna mun khat peuh kawm in, ahih kei leh inn khatpeuh biak piakna dingin i zang uh hi. Mi dangte niakinn sap ahih kei leh inn khatpeuh beel in biakna i piak ciangin nipi kal khat sung naikal tam lo (nih leh thum a sawt pen) sung bek lungsim takpi leh suakta takin Pasian biakna dingin i hunte pia ngam loin, sumh ngam lo ding ihi hiam?

Biak piak lai peuh in ganhing khumna (zoo) bangin kiciak ngeingai in kigamlum henhan den a, nek ding bawl a anbuk sung bek-a buai a gamlum henhan tawh, uk zawh loh bangin naupangte khahzau gawp in biakna i piak se pen Pasian in a namtui biakna in hong saansak dingin i lamen hiam? Mihing khatin ei hong mai-et nuam in tua bangin gamlum henhan kawm leh buai ngeingai kawm in hong mai-et leh saan huai i sa ding hiam? Kikhopna ah gamlum henhan in, ciak ngeingai khawmpi-in i om ciangin i ki-awlmawh hangin kitai bawl ding zong a nuam het lo thu khat hi.

Tua zang zeelzul lakah lungsim takpi tawh biakna pia nuam mite ading leh thugente adingin nuam hiau lo hi. Kumpi Saul in Amelek mite a sim dingin Pasian in Amelek mi khempeuh leh a neih a lamte uh leh a gan khempeuh uh a vat maina dingin thu na pia hi. Ahih hangin Saul in Pasian' thupiakna mang loin Amelekte' kumpipa Agag a hingin man a, a hoih pen tuute leh bawngtalte leh gannote leh tuunote leh a hoih khempeuh khawi in that mang lo hi. Hih thu hangin Pasian' hehna hong sinso a, "Kumpi in Saul ka koih ka kisik hi; bang hang hiam cih leh amah pen keimah zuihna panin kihei kik a, ka thupiaknate sem lo hi," ci-in Samuel' kiangah thu hong tung pah hi.

Samuel in Saul tai a, "Topa in meihal biakna leh biakpiaknate, Topa' thu man' ding zah in deih ahi hiam? Biak piakna sangin thu man' (obeying) ding hoih zaw a, tuutal thaute sangin thu ngaih ding hoih zaw hi," na ci hi (I Samuel 15:1-34). Jerusalem biakinnpi ah biakna pia dingin Jesuh a pai lai-in biakinn sungah van zuak van lei-a omte hawlkhia a, sumkheek nasem-a om mite' sabuai lumlet sak gawp in, "Ka inn pen thungetna inn kici ding hi napi note in sumkheekna phualpi na suaksak uh hi," ci-in tai gawp hi. (Matthew 21:13,Mark 11:17) cf. Isaiah 56:7,Jeremiah 7:11.

Mary leh Martha' inn ah Jesuh a va hawh lai-in Topa' thugente ngai-in ama kiangah Mary a om hi. Martha in bek in nasemin manlah lua mahmah ahih manin a hehsuak a, Jesuh' kiangah ka sangggamnu in kei bek na hong sepsak niloh phamawh sa lo na hi hiam ci-in a hehna thugen hi. Jesuh in, "Martha, Martha aw, nang na lunghimawhna tam hi. Ahi zongin a kisam taktak khat bek om a, Mari in a kisam na pen a semsem ahih manin a nasep kikhawlsak lo ding hi," ci-in taihilh hi.

Namdangte leh mikangte' lak leh biakinnte ah i kikhop ciangin Pasian sangin amaute maipha zong masa zaw in, hong neumuh ding uh lau-in dai takin biakpiakna pia-in i tate gan bangin i khahzan ngam kei hi. Ahih hangin ei bekin biakpiakna pia in, kikhopna dingin i innte i i neih ciangin biakinn bangin ngaihsutna nei se loin i ut teng tawh buai-in i tate khahzan in anbuk ah i buai henhan a, i gamlum henhan hi. Pasian sangin mihingte biak tak sa zaw se ihi hiam cih lungngaihhuai mahmah hi.

Biak piakna sangin Pasian' thu man' ding hoih zaw hi cih Saul' tung panin i mu hi. Jerusalem mite bangin biakinn sung leh kiim van zuakna, sumkheekna, i phonete tawh buai khop in, maan leh video bek zaih tawh buai in, gualnopna mun dingin i zat ding hilo a, thungetna inn in i zat ding hi cih i mu hi. Mary leh Marthate' unau' tung panin an nek ding leh dawn ding sangin thungaih ding Topa Jesuh' deihna hi cih i mu thei hi. Mihing ihih manin an leh tui a poimawh lo hi a ci ihi kei a, ahih hangin mihingte nuntakna dingin an leh tui bek hilo a, Pasian kammal thutak tawh kinungta hi zaw hi. "Anlum bek tawh mite nungta lo a, Pasian' gen khiat thute tawh nungta zaw hi." (Thuhilkikna 8:3; Matthai 4:4).

I kikhopna mun ah Jesuh hong kihel hi leh Jerusalem biakinn panin a hawlkhiate bangin hong hawl khia ding hiam? I sabuaite hong lumlet sak ding hiam? Martha bangin hong tai diam? Saul bangin hong lehheisan hi hong ci diam cih i biak piak ziate lungngai pha kik in, ngaihsun pha kik ni. A saan huai leh a namtui biak piakna tawh Pasian' maipha i zong masa zaw hiam??? I gilpi ading i masaksak zaw hiam? Mite maipha zon ding i masak zaw hiam? I biak Pasian' lungkimna ding i masasak zaw in i lunghimawh zaw hiam???

@Thang Khan Lian #ZUNs