A DANG BANG NA KISAM LAI HIAM???
Ni khat pasal kizang dawn muan mahmah khat, "Kei lo kua?" a kici tha hoih mawh lo khat zu sai (shop) ah hong lut vat a, "Beer can 3, zu thawl khat, sabak kankeu kuang nga leh soda thawl 5 manlang takin hong pia un. Nong piak kei uh leh na sai uh haltum ding hi'ng," ci-in hong awng baba hi.
Sai neipa in a deih teng phun lo, puam lo, pau loin manlang takin va pia pah saisai hi. A dawn ding leh a nek ding teng a kham khit ciangin lungdam ko se loin paisan hi. Tua mah bangin ni khat khit ni khat, kha khat khit kha khat tua sai ah hong lut in, "Beer can 3, zu thawl khat, sabak kankeu kuang nga leh soda thawl 5 manlang takin hong pia un. Nong piak kei uh leh na sai uh haltum ding hi'ng," ci-in awng baba den hi.
Tua leh ni khat tua sai mah a hong pai kik a, "Beer can 3, zu thawl khat, sabak kankeu kuang nga leh soda thawl 5 manlang takin hong pia un. Nong piak kei uh leh na sai uh haltum ding hi'ng," ci-in hong ot baba leh a kiu khat panin, "A dang na bang kisam lai? Na deih beh om lai hiam?" ci-in aw un pian khatin dam in na dawng hi.
Tua tangvalno in a et leh amah a balzan nuam bang lianga en gemgam thagol mahmah a zawh vet loh ding khat na tu liauluau hi. Tangvalno zong dai takin a lu kunsuk in, "Dawn ding tui siangtho hai khat beek kong dawn thei diam?" ci-in aw nem takin dawng khial hi.
"Hai khat bek dawn ken la, na duh zahzah dawn lel in," ci-in tua sai kiu a tu pa'n dawng hi. A dawn khit phet in tua tangvalno pusuak pah a, tua sai ah va dak ngam nawn vet lo hi.
Moral: Zawhthawh thu tawh thuman loin a gamtata thei i cihte pen a thuman lohna uh a gen ngam ding leh a pholakkhia ngam ding a om ngam loh manin a ut bangbanga gamtang ngam uh hi bek hi. A kiphatsakna uh leh a thuman lohna uh a langpang leh lehdo ngam dingin thuman a gen ngam, thuman a dinpih ngam a om loh man bek ahi hi.
Thuman lo na sak khat na genkhiat ngam kei leh nang zong thuman lo a dinpih, thuman lote a kipawlpih, a gamtatna uh a thukimpih cihna na hi hi. A thuman zo den kuamah a om loh hangin thuman ding deih in, thuman ding i hanciam ciang bekin thuman in kinungta zo bek hi.
Thuman lo leh zawhthawh thu tawh mi bawlte pen thatang bek tawh do theih hi loin kamdam leh thuamanna tawh kido thei lua hi. Thuman lo lehdona dingin hangsanna leh thumanna pen galvan hoihpen ahi hi. Thau leh hiam tawh lehdo sese kisam masa lo hi. Thau leh hiam tawh na lehdo leh thau leh hiam tawh thukkikna tuak ding leh a zo dingin kimansa in om masa in. Tua loin na guallel den veve ding hi.
🖋️Thang Khan Lian
No comments:
Post a Comment