SANGINN LAM PA/NEI PA LEH A SANGNAUPANGTE NIHTE' TANGTHU

SANGINN LAM PA/NEI PA LEH A SANGNAUPANGTE NIHTE' TANGTHU

Ni dang lai-in papi ham khat in inn dei 10 a sang inn lam a, a lam khit a sawt loin a inn pen teenna dingin zang loin sanginn suaksak a, ama'n a sangsiapi (headmaster) len pah hi. Tua leh ni khat a sangnaupang nih aana tawh a ut bangbangin a bawlna cimtak in, mang nuam lo uh ahih manin gawtna pia a, sanginn baang 100 vei tuak tum dingin thu pia hi.

A sangnaupang khatna pa'n sanginn baang za khat vei zong tum nai loin kap nena pah a, 100 vei dong ta tup kei leh 500 vei hong sat ding hi'ng ci-in 100 vei a tup dong si leh nai luang liangin tum sak veve hi. Tua leh a nihna pa hong kipan a, 10 vei deih takin khat veina tum pa' tupna mun mah a tup ciangin "Boom! Boom!" ci-in inn baang a leiseek (brick) khat khit khat hong kia tultul mawk hi.

Sangsiapipa: Hunsak ta in, leiseekte ban kiatkiat mu lo na hiam, mi ze?
Sangnaupang: 100 vei tum dingin thu nong piak sa hi. Sangsiapi khat in a thugen laih themthum ngei lo hi. Na thugen laih kik in, na thugensa na pasal manin 150 vei ka tum ding hi cih tawh baang tup zom veve hi.

"Boom! Boom! Boom! Boom!" ci-in baang hong ciim ziahziah ta hi.

Sangsiapipa: Khawl in, hunsak ta in ka ci hilo maw? Bil nei lo maw? Na bengngong maw phelphal cin. Na sangsiapi ka hih ban ah na pa tawh kigual hi'ng. Thu kong piak theihna dingin na pa zah a ham hi'ng. Hun sak in cih hilh theih loh dingin zawl ta bang kei in.

Sangnaupang: Ka pa min paulap in, ka pa min buahsak in zawl ta hi lopi zawl ta hong ci na hih manin 250 vei ka tum ding hi.

Sangnaupang in baang tum zom a, "Boom! Boom! Boom! Boom! Boom! Boom! nasia semsem hi.

Sangsiapi khukdin in, a khutte zep kawm in," Hong maisak in boih. A baang khempeuh ciim khin zo ta a, a sual/tuang beek bangmah hong lawhsak nawn kei in.

Moral: Na uk khumte uk zo ta, thuzawh zo ta ci-in na thuneihna a val in zang in, na kamciamsa na pelh ciangin na ukna man lo leh na thuciam peelna thuaklah na uk khumte hong heh ciangin bawl kik theih loh zah siatna nang tungah hong tungsak lah lo uh hi cih mangngilh khial kha kei in. Nang tung hong kibawl ding na deih bangin midang tungah zong na hoih bawl in la, thuman thutang tawh a kilawm in vaihawm in. Tua in nang adingin damna zatui hi zaw ding a, na thupha ngahna kong kihonna hi zaw in, na ukna sawt mang zaw ding hi. Kumpi gilo bangin na uk leh nautang gilo bangin mipite hong gamtang leh na thuakzo kei ding hi.

🖋️Thang Khan Lian