PASAL SUMBUK A VAN LEI PA' TANGTHU

PASAL SUMBUK A VAN LEI PA' TANGTHU

Ni khat papi khat sumbuk ah a va hawh leh zawhngeu an 50% discount a kizuak mu ahih manin a lei ding tampi kaikhawm hi. A sumbuk ngakpa'n tam lei sawm sa lua ahih manin zawhngeu nei lopi a tate piak sawm dingin ummawh ahih manin, "Na zawhngeu hong lak masa in, tua loin tua zah tak na lei thei kei ding hi," va ci hi. Papi pa zong a inn ah ciah kik in, a zawhngeu va la a, sumbuk ngakpa a lah ciangin leisak pan hi.

Tua leh ni khat tua sumbuk mah ah hong hawh kik leh ui an 50% discount mah in na kizuak ahih manin tampi a lei ding khawm kik hi. Sumbuk ngakpa'n, "Ui na neih takpi lam nong lah kei leh tua zah tak na lei thei kei ding hi," va ci kik ahih manin papi pa inn ciah kik vingveng in, a ui hong tonpih ciangin sumbuk ngakpa'n leisak pan hi.

Ni khat saphuk lai ip (plastic bag) sungah van a dim phial hong khai in, papi pa sumbuk hong lut a, sumbuk ngakpa kiangah, "Hih ka ip sung na khut lang nih in sawksuk sin aw.. bang hiam cih na theih nop leh," ci hi. Sumbuk ngak pa'n en se loin thakhat in tua ip sung a khut lang nih tawh sawksuk buat a....

🤓Sumbuk ngakpa: "Mi ze, na ek hilo maw? Bang hang na ek peuh hong sawk sak na hi hiam liakluak pialpual teh."
👴Papi: "Liakluak pialpual phelphal hong sa zaw ngel mah ing. Van lei nop nei kik ka hih manin a teci lah ding la-in inn ah nong guak ciahsak kik ding ka ut nawn loh man hi bek hi.

Moral: Sumbuk ngak mi khat na hih leh na van leite (customers) a mel et bek panin na simmawh bawl pah kha kei in. Nang mi dangte na bawl bangin hong kithuk kik ngekngek leh nuam na sa khin khol kei ding hi. Sumbuk ah van lei dingin i pai ciangin sumbuk ngak ten hong thusim loh pen na mahmah veve hi.

🖋️Thang Khan Lian