BANG HANGA MUSLIM TEN EID PAWI CIANGIN KEEL GO SESE UH HIAM

BANG HANGA MUSLIM TEN EID PAWI CIANGIN KEEL GO SESE UH HIAM

Muslimte pawi Eid al-Adha pen Nekkhawm bawl Pawi ("Sacrifice Feast" or "Bake-Eid") cihna hi a, leitung bup ah Muslimte khawl ni (holiday) a nihna hi a, khawl ni nihna lak panin a siangtho pen in ngaihsun uh hi. Hih Eid pawi ciangin keel tam go thei lua uh ahih manin keel ten Eid pen Die ci-in a kammal a leh sim uh ciangin "Sihna" cih kammal suak ahih manin keelte dah thei mahmah uh a, dah in ham ngeingai uh hi ci-inciamnuih in kigen zawzen hi.

Eid pawi pen pawi mawkmawk hilo a, Muslim ten ka pianna ka pupi uh a cih uh Ibrahim (Abraham a cihna) in Pasian in, "Na tapa (ei Khristiante Lai Siangtho ah Isaac kici) zangin meihal biakna hong pia in," ci-in Moriah mual tungah Abraham' upna a ze-et lai takin Abraham in meihal biakna tau tungah a tapa khau tawh hen in, dawt lum dingin a kitawi lai takin Pasian in a Vantungmi Jibra'il (Gabriel a cihna) sawl in na biak piakna hong kisansak a, gam lak a khau a awk keel (en tuuno i cih) tawh biakna hong pia in a cih phawkna dingin a zat uh ahi hi.

Muslim ten Eid pawi ah keel biak piakna dingin a gawh ciangun a sa seh thum in khen uh hi. Seh thum suah seh khat pen a keel go innkuan ten ngah uh a, seh khat a tanaute uh, a lawmte uh leh a inn vengte uh pia uh a, seh khat mizawng daipamte pia uh hi.

Bang hangin Eid pawi ah keel go sese uh hiam?

Muslimte Lai Siangtho Koran ah Allah (Pasian a cihna) in Ibrahim' tapa masa pen Ishmael (Abraham leh a zi neu Hagar in a neih a tapa uh) Pasian sawlna bangin a thuman'na lahna, Pasian a zahtakna lahna (subservient) dingin Ishmael biakna dingin piakhia ngam hi ci hi. Koran ah Pasian in Ibrahim tungah a kalh bangin meihal biak piakna dingin a tapa Ismael' gawl atsak dingin a kitawi lai takin na biak piakna hong kisansak zo hi ci-in Vantungmi Jibra'il sawl a, a biak piakna dingin keel go in ci-in thupia hi cih kigelh hi.

Tua keel pen Ibrahim in a tapa tawh biak piakna a piak sawm lai takin Pasian in Ibrahim tungah a itna lian a lahna hi ci-in tu dong Pasian in Ibrahim a itna lahna dingin biak piakna ding keel a piak phawkna lahna dingin Muslim ten Eid Pawi hun ciangin keel a gawh sese uh ahi hi.

🖋️Thang Khan Lian