TU HUN-A KHRISTIAN KINEIH PHA DIAKTE OM ZIA TOMNO
Tu hun ah thu um kineih diak mite pen:
LST sim ngei vet lo, simsim napi tel zo lo ahih manin nuntakpih dingzia nangawn a thei lo, Christmas ni bek-a Kilemna Kumpi muak hun ciang bek-a kilemna thu gen a awng buakbuak ONE DAY CHRISTIAN kitam mahmah hi. Pasian' kammal sangin hauhna leh daupaina thu bek gente (prosperity preachers), mutsiamna leh zuaugen siamte (Charlatan), Christian thu um kici napi-in a thu upna tawh kituak lo ngaihsutna neite (heretics) thugenna leh tangthu phuahtawm leh ciamnuih gensiam siate thugente, sia man lo leh zuau kamsang (false teachers and prophets) mite thugenna AMEN piak tawh kipsak manin Khristian a kisa pha diak se kitam mahmah mawk hi.
Jesuh in Mual Tung ah a thuhilhna ah:
Dahin a thum a tau mite Pasian in amaute hehnem ding ahih manin thupha ngah mi ahi uh hi.
A lungnem mite in Pasian’ ciamsa leitang ngah ding uh ahih manin thupha ngah mi ahi uh hi. Pasian’ deih teng sep ding a hanciamte Pasian in lungkimna ngahsak ding ahih manin thupha ngah mi ahi uh hi.
Midang a hehpih mite tungah Pasian in hehpihna pia ding ahih manin thupha ngah mi ahi uh hi.
Lungsim takpi tawh Pasian a zong mite in Pasian mu ding ahih manin thupha ngah mi ahi uh hi.
Kilemna ding deihin a hanciam mite in Pasian’ tate cihna ngah ding uh ahih manin thupha ngah mi ahi uh hi (Matthai 5:4-9)
na ci napi tu hun a Christian a kisa pha diakte in:
Hau in lungdam in a nuinui mite Pasian in amaute hehnem ding ahih manin thupha ngah mi ahi uh hi.
A lungkhauh mite leh ngongtatna leh gitlohna tawh a gualzawhna sawm tawntung mite in Pasian’ ciamsa leitang ngah ding uh ahih manin thupha ngah mi ahi uh hi.
Ama aituam ding leh gilpi deih teng sep ding a hanciamte Pasian in lungkimna ngahsak ding ahih manin thupha ngah mi ahi uh hi.
Midang a muhdah, a galbawl, a bawlsia leh a vaulaute leh a huaiham mite tungah Pasian in hehpihna pia ding ahih manin thupha ngah mi ahi uh hi.
Kineihkhem siamna leh kilimbawl siamna takpi tawh Pasian a zong mite in Pasian mu ding ahih manin thupha ngah mi ahi uh hi.
Gal kidona ding deihin a hanciam mite in Pasian’ tate cihna ngah ding uh ahih manin thupha ngah mi ahi uh hi ci se uh hi.
Tu hun in Christian a kineih pha diakte in biakinn sung a lut uh ciangin a ihmut ma sung teng uh a phone uh tawh maan leh videos zaih in a buai khit uh teh, "Ka pa' innsung hi," hi ci-in ihmu in naksia baba uh hi. La a kisak teh, "Na lampi ah ling a om leh a lu tunga khupa phawkin...," ci-in awng lala in laamlaam napi-in biakinn sung panin a pusuakkhiat uh teh, "Na lampi ah ling a om leh tawm in la, na tuah masaksak lu tungah khusak in," ci-in sa in awng baba uh hi. Biakinn sungah, "Na paang langkhat hong kibet leh a langkhat zong na dawh beh lai in," ci-in gen in, aw neih khempeuh tawh HALLELUJAH, AMEN! ci-in awng keek napi-in biakinn kong pua kankhia leh, "Na paang langkhat hong kibetsak leh hong beng mite paang langnih na bet khit ciangin na cilphih in la, golum in la, sa seh bangin sehsat beh lai in," ci-in ku vava uh hi.
LST kammal up man bekin Kristian hi ing kicih lanlan tuam theih hilo hi. Dawite nangawn in Pasian um in ling deldel uh a, LST kammal bek a zak ciangun om thei loin taikhia uh hi. Hindute bekin zong pasian 34 millions val nei uh hi. Kristian kici mite pen Pasian kammal um bek hi loin LST thu tawh kituakin a gamtat leh Jeuseh gamtatzia etteh a gamtang mite leh honpa leh gumpa a sangte bek hi.
Pasian khat bek om hi, ci-in na um hi. Tua pen hoih mahmah hi. Dawite nangawn in zong tua bangin um in lau-in ling deldel uh hi. Lawmte aw, gamtatna in a zuilo upna pen a hawmpi ahihna thu ka hong lak ding hi. Eite' pupi Abraham in biakna tau tungah a tapa Isaac a piakna hangin Pasian tawh kipawl thei hi. Tua ahih manin upna leh sepna kizom khawm a, sepna in upna a kicin'sakna thu na thei uh hi. Lai Siangtho in, “Abraham in Pasian um a, a upna hangin Pasian in mihoihin a sang hi,” ci-in a genna thumanin tung takpi a, Abraham pen Pasian' lawmpa kici hi. Tua ahih manin, mi khatpeuh in a upna bek tawh hilo in, a sepna tawh a kizuih ciangin Pasian tawh kipawl theihna ngah pan ahihna thu na thei uh hi. Tua ahih manin hu a diiklo, hu a sanglo pumpi pen a si ahih mah bangin sepna tawh a kizomlo upna zong a si ahi hi.(James 2:19 - 24, 26).
No comments:
Post a Comment