NAUPANG KHELTATTE UNAU' TANGTHU
Nupa khatin ta pasal kheltat leh phengphi mahmah nih - kum giat leh kum sawm a upa nei uh hi. Buaina ding bawl den in, buaina omna tengah kigolh zo den uh ahih manin a khua sung uh-ah buaina piang hi cih a zak ciangun naupangte nu leh pa lauthawng in, dipkua leh diphum in patau in om den uh hi.
A nu leh pa ten a pattah theih bangin a tate gel uh pattah in, thuhilh in, sat in, thu hoih la hoih nono tawh a mop hangun tua unaute hilh loh zawlta leh ui mei kang bang velvul veve uh a, phatuam loin dual tuam lo uh hi. Khua sungah naupang pattah siam a kigen siampi khat om hi cih a theih ciangun a nu leh pa'n tua pa kiangah a tate sawl dingin siampipa hopih masa in, sawl hong khensat ta uh hi.
Tua leh a nauzaw pen siampipa kiangah sawl masa uh hi. Siampipa in naupang tu sak a, "Pasian koi a om hiam?" ci-in dong hi. Naupang in a dotna dawng loin siampipa zong et in nei beek loin a dotna thudon vet lo hi. Siampipa zong hong thapai a, a dotna mah dong kik, "Pasian koi a om hiam?" ci-in a dot zom zihzeh hangin naupang muk phim a khui bangin tu mieumiau lel hi.
Siampipa in dotna kibang awtol zaw sem leh ngaihzaw semsem in a dot kikkik ciangin naupang pa'n cimtakhuaisa lua ahih manin thakhatin siampipa' inn panin taikhia vat a, a inn dong uh meital liangin taisuak a, bizu (almirah) sungah kibu hi.
A sanggampa'n lamdangsa pian ahih manin, "Bang va tuak kha a, bang thu om hiam?" ci-in a dot leh, "Tutung bel buaina lianpi tuak taktak ta hang ei u aw... Pasian a mang sa uh a, ei hong ngawh uh hi," ci-in dawng hi.
Moral: Naupang kheltat, uk hak leh hilh haksate kamkhauh leh dotna hamsa tawh na pattah sawm leh a lungtang uh phengphi semsem, khauh semsem, sinpha semsem, kheeng semsem zawsop ding a, a lungsim uh theih masak ding hanciam masak a, a lunggulh lam leh a uukna lam uh tawh zol masak a, lungkimsak masak a, tua khit ciangin pattah kipan leng muibun zaw hi. Sik kizanthei (spring) khat nakpi takin na zan leh a sik na khah khak leh deih takin nang hong lehsat bak ding hi.
🖋️Thang Khan Lian
No comments:
Post a Comment