LAMKA COLLEGE PAWL KHAT JCB TAWH KINAWKSIA

LAMKA COLLEGE PAWL KHAT JCB TAWH KINAWKSIA

Nov. 3, 2017: Zan nitak nai 8pm a kipanin zingsang 4am kiim kikal Lamka College a building bang zah hiam leiphutna JCB zangin pawlkhat kinawksia hi. A kigen danin Village Authority (VA) House leh YPA, Elim Veng Unit Hall lamna dingin hih mun suksiat a om hi ci uh hi. Lamka College Principal in zong DC, SP leh SDO kiangah hekna Report bawl khin ta ci uh hi. Hih tawh kisai ka ngaihsutna tawm kong kum ding hi.

Hih bang thupiang pen dan leh thuham phengzat na nam khat ahi hi. Na hoih sem a, diktat tak-a pai hi a gamtatna hi leh zan nung leh phalvak ma-in suksiat kisam citciat lo ding hi. Hih danin ngongtatna kuamah in thapia loin kipahpih kei thei lehang hoih mahmah ding hi.

Diktatna ding bekbek tangkopihpih kawm a dik lo tak-a YPA hall leh VA office ding bawl ding, tua khit ciangin Pasian kianga apna neih ding zawzaw pen Pasian a lungkim tam? Hih banga gamtatna cikziathuai leh lipkhaphuai ka sa hi. Tua banga a gam leh a leitang ding kisam teta i hih leh bang hanga Minister/MLA, MDCte zanga land allotment ngen masa a, lakhia masa lo i hi hiam? Hih banga nasem ten, "Minister pa' theihpihna tawh kisem hi," ci zaw lai dep uh hi. Ngimna hoih lo tawh na khat gilohna tawh hih ding lamsang ah kithuzawh (kifuih) i siam lam tak bel na hi sese zel ven maw? A lianpen (Minister) a panin a neupen tanin diktatna tawi sang dingin hih zah-a i kisinsak lai-in.... nuvei leliang aw ...a gu (paap) pua zo ding i maw..!!

Lamka College pen eimah aa lieuliau hi i cih theih kei leh bang suak ta ding i hiam?!! Zogam i cih lanlan leh Zogam i sunmang bang bang suak ta ding? 1997 buai lai a kipanin namdang ten i College hong lawihsan uh a, sangnaupang zong i neih zawh manin Science stream kilakhia hi. Tu-in zong Arts stream bek a om nimnem tei lai sam hangin student 100 zong nei zo lo uh hih tuak hi. Hih bang danin hong paizom leh kum bang zah hiam ciangin phiat or suankhiak or hih bei ahih mel kithei lo lai a, a manan limci vet lo hi. Bang hang? Lamka College puah ding gam it makai leh minam it mipite ki-om lo hi ven!

Hih zah-a a awlmawhhuai i innsung a Government College khat a om lai a, SSPP bangin lah ngaihsak mahmah lo "Siamsinna Mah Aw Le" cici kawm a local politics khawnga i President bang buai den zaw lai zen..!!!

Lamka College Principal eimi mah hi a, zan zekin in-charge la pan hi zaw lai hi. Tu lian dinmun ah bel Principal in zong report a bawl loh theih loh hita a, report kei leh a susiate tawh kipawl hi cih ngawhna tuak ding a, report kei leh a tavuan zo lo suak zel ding hi. Hih report hanga thukanna hong om a, case hong pai bang hi leh VA leh YPA makaite bangin case hong nei ta ding? bang suakta ding? YPA in gum teta ngam lai ding maw?YPA ngeina mah maw hih banga kumpi leh mipi neihsa suksiat? Zumhuai lua lo ding maw..??!! Hih bang dan liang ahih lohna dingin zuau bangzah gen ngai ding hiam? Zuau gen siam mi bang zah kigolh ngai ding? Press Release zuau bulom bang zah ah clarification bawl kisam ding? Political pressure leh public pressure (nawhna) i piak tam peuh leh Govt. muh dan leh Law dan-a lah ei kimawh semsem zaw mah ding a maw..! Vaisah mahmah kha ding hi. Nawhna a om kei leh thumanna in i hong lawi takpi a, lawki dawibia mite sanga lipkhaphuai zaw Zuaumite i suak ding hi.

Hih thei, bawlthei, ci thei, vang nei i kisakluat laitak i niampen lai hi nuam mahmah zawsop hi ei guai. Revolutionary army nei i kici uh a, revolution kici a om ciangin a lui nate kilaih gawp in, a hoih lamin piang hi. Tua ahih leh i thau tawite hatna munte sung beek ah sanginn kikhakcipte, sangsia om napi a kai a om lohnate, sanginn om napi in sangsia muh ding leh sangnaupang muh ding a om lohnate, sanginn omna thei lo sangsiate sawlna ding leh sanginnte lim takin a kihonna dingin pan i bangci lak a? Nekgukna, takgukna, golhgukna beisakna ding leh kideihsak tuamna (nepotism) zanga kumpi sepna leh nasemna tuamtuam kipiaktuam daidaite beisakna dingin pan i bangci lak ua? Gam it makai ci-a baibek banga gilpuak leulau, kambeem lianga gam leh minam it kici makai ten siansinna sanginn puahna ding leh zuunna dingin pan a bangci lak ua?

Tangpi leh tangta phatuamna dinga om khuasung thuneite (VA) leh philanthropic organisation ten siamsinna government college i omna mun-a i neih sunsun hih bangin suksiat theihna dingin thuneihna koi panin i ngah a, siamsinna lamsang laptohna ding sangin ei philanthropic organisation bek ultungsakna dingin hanciam leng i maban ding kitualvatna leh kilangneihna, kimuhdahna, kitelkhialhna bek hi cih ngaihsutna nei lo i hi hiam? I gam khantohna dingin thumanna, cihtakna, thukhun zahtakna leh zuihna leh siansinna poimawh pen hi cih i theih kei leh i maban pen MANGTHANG DING, MANGTHANG KHAWM VEK DING, MITE SILA LEH NUAINEH MINAMTE hi ngitnget ding hi hang cih ngaihsutna khuak nei ten ngaihsun pha in, lungngai pha kik ni. Guahsia in hong lap ma-in a hun om lai-in a hun sotto loin a zekai luat ma-in kipuahpha kik in, hanciam in, panla thak ni. Philanthropic leh namke kipawlnate ultungsak lua loin, tu leh keel bangin kikhen nawn kei ni. Zomite hanlungciam, khangto diam!

Source: WhatsApp leh Fb group tuamtuam panin hong kikhah ka muhte kong tei sawn, puahphat leh behlap ahi hi.

@Thang Khan Lian