TUU VUN A SILH NGIA TUU SAK KHAK DING A LAUHUAI BANAH HAIHUAI HI
Biakna leh gamvai tawh kisai tuu leh keel bangin a kikhenna gam (secular state) ah makai cimawh leh beidong kisa tengin biakna paulap in pasian, nusian leh Pasian (god, goddess and God) min zangin biakna paulap in nei-in awng baba uh a, meetang (vote) leh amau gum ding mi (supporters) zon'na in nei uh hi. Democractic gam khempeuh phial pen a gam bup uh thukham/upadi (Constitution) ah biakna suahtakna (religious freedom) leh biakna leh politics a kikhen ding hi ci-in SECULAR cih tuang khin hi. Gam khatpeuh ah minam tuamtuam leh biakna tuamtuam tampi om ngeingai ahih manin biakna leh gamvai a kigawmkhop ciangin galvan lauhuai pen suak thei a, minam neu leh biakna neu (minorities) tengin minam leh biakna golte (majorities) thuak zo lo uh a, minam leh biakna hanga kideidantuamna leh kituambawlna (prejudices and discriminations) khauhpai semsem sak ahih manin kigalneihna leh kimuhdahna lianpi piangsak hi.
Zum (office) leh meetings neihna mun khawnga video leh maan kizaih liangin thungetna tawh pat sese pen biakna hahkat mite ngeina hi peuhmah lo a, a innlum a lolum ah thungen ngei mel lo, thungen man lo liangte ngeina leh pianzia lim kilahna leh a puatham in biakna hahkat kineih Farisai' mite lungsim hi. Zum sung leh meetings neih sim in thungetna nei nuam tentan teitei ten kuamah muh leh theih sese loh in a ging loin zong lungsim thungetna nei thei lua uh a, lungsim tawng a encik Pasian in a thungetna dawng lo dingin hai lo hi.
Zum sung leh inn sung khawnga biakna tawh kisai Mary, Jesuh leh a dang dangte suang liapluap pen biakna hahkat mi hihna lahna hilo hi. Mary, Jesuh leh a dang dangte maan leh liim pen amau hun in maan kizaihna camera na om lo a, a lim uh kisuai in a kem cih bang kuamah om lo ahih manin milim biakna (idolatory) namkhat mah na hi zawsop hi.
Democractic secular gam-a politics ah biakna puaklut sawm teitei mite pen mihoih a kineihkhem makai, amau Pasian min tek tawh biakna leh gamvai gawm leh mek khawm lo dingin a kiciamna uh leh a gam Constitution palsat makai, thuneihna leh amau pum gup ding ngahna ding ngimna nei mi cimawh politician gina lote lim kilahna hi. Biakna hahkat mi in politician nasep a hun neih khempeuh (full-time) uh beisakin semkhawm ngei lo hi. To (master) nih na a sep khawn sawm sila huaihamte lungsim hi. Biakna kizelh ding a deih taktakte in a biakna thu uh leh Lungdamna Thu (gospel) a za leh thei kha nai lo mite kiangah va puakin a va tangkopih dingin missionary in kuankhia zaw uh hi.
Politician ngia tuu vun silh mite' thangzak ah awk khak ding lauhuai mahmah hi. Biakna leh politics a gawmkhawm gam makai gina leh hoih taktak kuamah om lo hi. Bang hang hiam cih leh a baih vet lo na lianpi nih sepkhop kisam hi. Politics pen Lungdamna Thu tangkona dinga platform hilo hi. Politics leh biakna gawmkhawmte pum gupin a pakta mite pen secular democractic politics taktak thei vet nai lo, Communist gam suuksia diakte bangin biakna khat bek aana tawh kizuihsak ding deihte leh sazuk in kiman'na ding nei loin a ki a puak ngaungau bangin luzang ah khuak a mot puak belbal mite bek leh mi dangte' biakna leh ngaihsutna thuakzawhna nei loin mi ngongtat (fanatic bigot or radical) mite bek hi.
Politics ah lawhcin'na dingin biakna tangkopih kisam masa lo a, amau sik leh tang dinga teel mipite hamphatna ding leh noptuamna dinga nasemte lawhcing uh hi Biakna hahkat kineih politiciante na etteh sangin Pasian' adingin a lutang phum ngam in, a nuntakna khempeuh kipia ngam mite etteh zaw lecin kha gim na nam zaw ding a, na biakna zuih zia man zaw ding hi.
Thang Khan Lian
No comments:
Post a Comment