I IHMUTNA PANIN KHANGLO IN SIAL TAT KHIT NUNGIN SIALDAI KAIKAI KEI NI

I IHMUTNA PANIN KHANGLO IN SIAL TAT KHIT NUNGIN SIALDAI KAIKAI KEI NI

Nov. 11, 2019; Pizing: Imphal Valley sung tengah Inner Line Permit (ILP) in Manipur kici ngen in Meitei ten kiphinna nasia takin hong neih khit nungun tua hun in Chief Minister len Congress party panin Okram Ibobi Singh’ hun in Aug. 31, 2015 in state assemble in Three Bills kici – Manipur People’s Bill, 2015, Manipur Land Revenue and Reforms (Seventh Amendment) Bill, 2015 leh Manipur Shops and Establishments (Second Amendment) Bill, 2015 passed hi. Hih thu hangin ei khamtung mite in i leitang suplawh theihna ding hi cih ngaihsutna nei-in kikhang lo a, kipumkhat ngeingai in i makaite un i leitang uh hong zuaksak uh hi ci-in a innte uh nangawn i ban hal uh a, luang kua tak i khamlawh liang uh hi.

Hih anti-migrants bills i.e. 3 Bills vai tawh kisai Union Home Minister Rajnath Singh leh Manipur sunga political parties tuamtuamte panin delegation-te Chief Minister Okram Ibobi Singh in makaih in Delhi ah a kimuhna uh-ah Rajnath Singh in a thukimpih lohna thu a genkhum khit ciangin Ibobi Singh leh political parties dangte representatives ten joint statement a bawlna uh-ah legal experts leh constitutional experts mite in a bills vai tawh kisai legislation thak bawlna dingin etphatkikna (re-examine) kinei ding uh hi ci-in June 7, 2016 in pulak uh hi. Ei khamtung mite in hih 3 Bills vai tawh kisai lunghimawhpih nawn loin i om kalin Meitei ten Chief Minister thak Biren Singh’ makaihna nuai-ah nasia takin panlak na zom vive uh a, Manipur Legislative Assembly fifth session July 23, 2018 in Meitei ahi lote (non-Manipuri) lut ding dalna leh hawlkhiatna (regulate entry and exit) ding ngimna in Manipur People's Protection Bill 2018 kici na passed ziau uh hi.

Meitei ten khamtung mi teng (tribals) “illegal migrants” hong suahsak theihna un a ngimna dingin pan a lakna uh sawt mahmah ta napi tua thu lunghimawh khakna khutcin vom cia zong nei loin ei khamtung mite Meiteite’ saguh bawk lot kituh in unau beelkang kituh i bang ngeingai lai zen uh hi. Ngaihsun thei leng zumhuai mahmah ta hi. Government of India (GoI) leh Naga ten kithukimna dingin kihona a neihna (negotiation) uh kum 22 cing khin zo ta a, Naga peace process vai tawh kisai Indian Central Government in October 31 in buaina hamsa ven'sakna (solution) bawl ding leh kilemna (peace accord) suaikaih dingin National Socialist Council of Nagaland (NSCN-IM) faction Isak-Muivah leh working committee Naga National Political Groups (NNPGs) ten thukimna nei khin zo uh a, final settlement (peace accord) suai a kaih ciangun “Naga national flag” leh “Naga Yezhabo (constitution)” tuam (separate) neih dingin a kalh cinten uh vai leh Naga ten Nagalim (Greater Nagaland) a nget un a huamkhakna Arunachal Pradesh, Assam leh Manipur states leh Myanmar gam-a Nagate’ teen’na sung teng pia ding hiam cih hong kitel ta ding hi.

Tua bangin Nagate tawh Central Govt. in peace accord suai a kaih ding uh Manipur State govt. bek hi loin Meiteite na patau mahmah uh a, ei a patau zaw dingte a ihmu tawh, a lungdampih i kidim zawsop uh hi. Tua bang kawmkal ah State Government of Manipur in Government of India (GoI) tawh Article 371 C amendment bawlin Manipur Hill States in pulak dingin sawmna nei-in thukim (recommendations) nei uh hi ci-in Imphal Times source in Oct. 18, 2019 in suaksak hi. Source in a genna ah Government of Manipur (GoM) in GoI in dei nih a nei thukham bawlna (bicameral legislation) nei-in Manipur state pen Nagaland ah maban thupiang thei leh deihna (envisage) bangin Sixth Schedule format nuai-ah koih in Hill state in pulak dingin recommend hi ci hi. Ahi zongin na khatpeuh ahih ding zia (modus operandi) tawh majority Meitei community-te Schedule Tribe status pia lopi-in Hill state in koi cih pulak ding hiam cih thusim pholakkhia (revealed) lo hi.

Source in a genna ah GoM in minam (ethnic) bulphuh in NSCM (IM) lungkimsakna dingin administration bawl ding langpang a, ahi zongin autonomous district council (ADC) om khinsate - North Autonomous Council, South Autonomous Council leh phaizang (valley) sunga districts om teng Central Autonomous dingin sawm hi ci hi. Tua bang a pian' theihna dingin GoI in Article 371 C puahphatna (amendment) bawl dingin thukim hi. Hih thukimna panin Manipur state bup sung 6th Schedule of the Constitution in koih dingin cih ahi hi.

Source in GoM thukimna GoI in thukimpih ding hiam cih gen thei lo a, ahi zongin GoI thucian a kidot hangin Indo-Naga peace talks kinei lai ahih manin Manipur state mite lauhna dingin bangmah genkhia nuam lo hi ci hi. Autonomous district thum omsa teng a bup in Autonomous Council thum in laih ding vai a kidot ciangin source in North Autonomous district Council of Ukhrul (tu lianin Ukhrul district leh district kibawlkhia thak Kamjong district thuneihna or jurisdiction nuai-a om), Tamenglong (Tamenglong leh district kibawlkhia thak Noney district jurisdiction nuai-a om) leh Senapati (Senapati district jurisdiction nuai-a om) in amau district headquarters ciat panin offices tuam kineih ding hi ci hi. South Autonomous Council pen GoM on ADCs of Churachandpur, Sadar Hills leh Chandel in amau district headquarters ciat a neih ding uh sawm hi. Ahi zongin Act East Policy nuai-ah mun poimawh (strategic location) gamgi a om Moreh pen GoM in valley districts nuai-ah koih in Central district Autonomous nuai-ah koih dingin thukim hi ci-in Oct. 28 in Imphal Times newspaper ah kisuaksak hi.

Tu ni-in WhatsApp ah Thahdo pau-in a kikhah message hong kiforward ka ngahna ah, “Meitei ten Moreh khuapi amau kivaihawmna (administration) Autonomous Council 3 om sak dingin pulak ta uh a, Tangkhul Nagate leh Meitei ten Kukite’ pu leh pa GAM la zo ding uh hi ta hi. Thu hung kihawl ding dan hi,” ci hi. Thuman hiam upmawh thu hiam cih a kitelcian loh hangin GoM leh GoI in Article 371 C amendment bawlin Manipur Hill States in pulak dingin sawmna nei-in thukimna (recommendations) bangin ADCs thum in kikhen leh Moreh pen i taanlawh masak pawl ding suak kha thei bang ta hi (a leitang hi pah loin thuneihna).

Nung Kiginni (Nov. 9, 2019) in Supreme Court of India in thuman tawh lahna ding teci (evidence) bangmah om lopi-in tuan a kipanin tangthu kigen (mythology) bulphuh leh pansan (based) in minam tam zawte (majority) leh Hindute’ lungsim leh ngaihsutna (sentiments) lungkimsakna dingin kum 27 Supreme Court ah case kidiah Ayodhya khuapi-a Muslimte leh Hindute' leitang kituhna hanga buaina (disuted land) vai a thukhenna ah Hindu mythology ah a pasian uh Ram pian'na mun dingin a upmawhna uh - kum zalom 16 hun in Mughal kumpi Babur hun lai-in Ayodhya khuapi-a Babri Masjid mosque kilam a kisuksiatna (demolished) pen "illegal" hi ci nap-in tua mun leitang 2.77 acres sung teng Ram Madir (temple) lamna dingin pia ziau mawk hi. Tua mah bangin Manipur Legislative Assembly in mythology based mah zangin Chandrakirti' khekap om hi a kicihna Chivu kuam teng leh Behiang dong Talpakte a piak theihna dingin Manipur Legislative Assembly fifth session July 23, 2018 in Meitei ahi lote (non-Manipuri) lut ding dalna leh hawlkhiatna (regulate entry and exit) dingin Manipur People's Protection Bill 2018 kici Bill hong zatkhum bak mawk leh Behiang pen Zogam Ayodhya a suahkhak theih vat ding thubaih bang mawk hi.

Zogam Ayodhya thukhenna a pian’ theihna ding thu na om hi. Meitei ten a 3 Bills teng uh Central Govt. in thukimpih hen la, National Registration Commission (NRC) kici Manipur state Govt. deihna bangin Assam state bangin hong kizang hi leh India leh Manipur citizenship i hihna lahna dingin (proof) i voting IDs, Adhar Card leh i innmun lomunte registration (pakka patta) bawl kum hong sitsak hileh 1970s sanga naupang zaw tam ding ahih manin “illegal citizens” hi uh teh hong ci thei ziau mawk ding uh bang hi. Hih thu lim takin ngaihsun in Chandel, Ukhrul, Senapati cihte a sanggam Kukite pen Naga peace accord hangin leitang nei lo dingte ci-in i koko leh phinphin hun hi nawn lo a, amaute tawh kipumkhat leh pangkhawm in, i historians leh research scholars neih teng thu lim takin dong in, i pan’khawm hun lua ta hi.

Meitei ten Behiang dong ka gam ka leitang uh hi ci-in hong suhsak nopna uh sawt mahmah khinzo hi. Tua bang a ngimna uh a tangtun’ theihna dingin 1990 pekin Behiang panin 2 km bek gamla Indo-Myanmar gamgi a om Chivu kicihna mun (site) a lai kigelhte (inscription) humbitna dingin Manipur state government in Manipur Ancient and Historical Monument and Archaeological Sites and Remains Act. 1976 nuai-ah 49 monuments lakah na koih khinzo ta hi. Hih Chivu mun pen British ten Lushai Expedition (1871-1872) kici gal dona leh gamkeekna dingin a nawk lai-in Cachar Column sungah Meitei kumpi Chandrakirti’ galkapte Major nih – Thangal leh K. Balaram Singh kici makaih Meitei galkap 2,000 kiim kuante in March 7, 1872 in ciahkik lam un a giahphual satna uh ahi hi.

Meiteite' galphual Chivu mun a va nawk kha Go Khaw Thang leh a galkapte tawh thau muitum kidem ding ci-in Go Khaw Thang’ galkapte Meitei ten thau lawnsak masa uh a, a lot khit uh a thauvui leh thautangte uh a thunkik ma-un thatang hanta tawh Go Khaw Thang galmat in man in, Imphal dong galmat bangin kai-in thonginn (prison) sungah khum uh a, 1872 in si hi. Lushai Expedition gualzawhna lim lahna dingin Chivu ah Meitei galkap 2,000 kiimte a khumlut (enlisted) pa British’ officiating political agent Major General Nuthall, Maharaha Chandrakirti Singh leh Major Thangal leh Major K. Balaram Singh phawkna dingin suang thum phut in lai (inscriptions) na gelh uh a, Chandrakirti Singh’ khekhap ding zong bawltawm uh a, gal dona ah Chandrakirti zong a kuan bang keek-in Meitei ten history a man lopi (distorted) in deihkaih in gelh uh hi [Hih thusim zuau bulomtang ahihna i pholakkhiat semsem ding kisam a, Meiteite pen Major General' Nuthall' reinforcement bek ahi uh hi. Hih thu ka sanggampa Dr. Kham Khan Suan Hausing in “Unmindful of history: on Biren Singh and Manipur” kici a gelh Indian leading newspaper The Hindu in Dec. 29, 2017 in suaksak a, Economic and Political Weekly (EPW) journal panin zong simtheih hi. A sim nuamte adingin https://www.thehindu.com/opinion/op-ed/unmindful-of-history/article22320391.ece ].

Meiten ten Chivu bek hi loin Behiang dong hong laksak sawm in gam hong keek sawm uh hi cih ngaihsutna nei om lo hi zen i hi hiam ah, Zou Gal (Kuki ten Anglo-Kuki War a cih leh tua bangin history ah a kiciamteh zaw) a kum 94 cin’na in Behing khua-ah thupi takin kibawl hi. Tua hun in Indian Govt. in Look East Policy a neih paulap in CM Biren Singh’ ngian (tactic) thei loin zinmangpi (chiefguest) dingin thupi takin muak in i na vaidawn (welcomed) ngeingai dep uh hi. Biren in a tuanna helicopter Chivu ah lengsuak sakin va bawh uh a, Behiang khua-ah Dec. 19, 2017 in Zou Gal Memorial Cemetery hun in Indo-Myanmar trading outpost ding cih paulap in Chivu ah Chandrakirti Memorial Park adingin foundation stone i na phutsak zen uh hi (Biren in bel hai hong sa mahmah ding a, a nuihkhiat loh hangin a lungsimtawng ah nuih kauhkauh peelmawh kha ding hi).

Behiang leh Chivu pen India’ Look East Policy nuai-ah “second gateway to Southeast Asia” hih sak ding cih Biren’ kampau leh kamciam hi napi a tak takin Behiang panin 2 km gamla a om Chivu dong Maharaja Chandrakirti Singh’ kumpi ukna gam hi cih ciamtehna dingin Chivu ah Chandrakirti Memorial Park adingin foundation stone hong phuh leh Chandrakirki' leitang hi cih thuman tawh lahna teci (evidence) koihna ding ngian hi zaw bek a, Modi’ government leh Biren Singh’ majoritarian nationalism policy hi bek hi. I ihmutna panin i khanlawh meng kei leh Naga peace accord suai hong kai khin uh hen la, Manipur sunga Nagate’ teenna leitang sung teng Nagalim hong suak peuhmah leh Meitente' gam hong neu ding ahih manin gamkeek hong kipat sawm ding uh a, i ihmut kal in Meitei ten Chivu dong gamkeekna dingin suang hong phut khinsa uh suksiat loh in a om banah Chandrakirti' khekap (footprints) a cih uh kisusia loin om den lai ahih manin i teenna leitang teng Meitei ten "Ko aa hi" ci-in i khahsuah vat khak ding thubaih thei leh kilawm bang hi.

I ihmutna panin khanglo in sial tat khit nungin sialdai kaikai nawn kei ni.

A gelh: Thang Khan Lian #ZUNs