US IN ISRAEL ADINGIN F-35 STEALTH FIGHTER PIAK BEH DING

US IN ISRAEL ADINGIN F-35 STEALTH FIGHTER PIAK BEH DING

Oct. 6: President Trump' thupiakna bangin Russia in Syria' tungah S-300 air defense batteries a piak thukkikna dingin US in F-35 stealth planes hong supply beh ding hi ci-in Israeli news website Debka in suaksak hi. Tua loin Middle East gam-a US kipawlpih Saudi Arabia leh United Arab Emirates (UAE) ten US F-35 squadron masa pen UEA khuapi Abu Dhabi leitaw lam 30km a om Al Dhafra Air base ah sawt loin kikoih ding hi ci-in US in pulak hi.

Debka in Israel ah F-35 kipiakna ding pen Syria gam ah S-300 kikoih manin Russian-Syrian air defense a khauhsak beh hangin US leh Israelin Syria gam-a Israeli Air Force ten a military operations khawlsan lo ding hi cih a lahna uh hi ci-in military sources in gen hi ci-in suaksak hi. Reports pawl khatin Israel in US tung panin F-35s fighter 50 order hi ci hi.

Zan diakin zong Israeli Regional Cooperation Minister Tzachi Hanegbi in, "Leitunga gal vanleng hoihpen F-35 steal fighters ka neih na thei uh hi. (A taktakin US gal vanleng F-22 Raptor kicite hoih zaw hi). S-300 batteries in S-35 steal fighters omna man thei; thei thei lo (detect) hi. S-300 batteries in Israel air force gamtat theihna ding nawngkaisak taktak thei lo ding hi. S-300 system in F-35 stealth fighters a kapna panin F-35 kipelh (avoid) thei ding a, lei-a S-300 system omna mun F-35 in kapsia kha thei hi," ci-in gen hi.

Israeli Defense Minister Avigdor Lieberman in Russia in Syria ah S-300 a koih manin Israel government lungkim lohna thugen a, ahih hangin S-300 system a om hangin Syria gam ah Israel air forces ten military operation a bawl zomna ding khaktan lo ding hi ci-in gen hi. Russia in bel gamdangte ngimna ding hi loin Syria gam-a Russia galkapte security bitna ding ngimna tawh a kikoih hi bek hi ci hi.

September 17 in Syria gam-a rebels hatna omsun Idlib a galte panmun enkhia dingin Russian Il-20 reconnaissance aircraft (spy plane) a leng lai-in lei a omte tawh contack kiza thei lo uh a, tua lai takin Israel F-16 jets 4 ten Syria galkapte panmun kap uh a, Syrian air defence-te tawh kikaptuah uh hi. Tua hun lai takin Syrian air defense ten S-200 air defense missile tawh Russian Il-20 reconnaissance plane kapkhia kha uh a, a sunga tuang Russian airmen 15 a sih a dawn' kikna dingin Russian in Tuesday S-300 systems vante (components) 49 koih a, tua vante lakah radars, control vehicles leh launchers li kihel hi.

Russian Ministry of Defense kamsiatna tawh "friendly fire" ah Russian Il-20 reconnaissance plane a kikapkhiatna pen Israel in kizaksakna "hot line" panin hong zasak masa loin Syria galkapte panmun Latakia ah a kap ma uh minute khat bekin hong zasak uh a, Syrian S-200 missile in F-16 jets lite a kapkhiat ding panin kidalna lum (shields) in Russian Il-20 aircraft a zat man uh hi a, Israel mawhna hi ci hi. Tu kum May kha bei kuanin Israel Air Force commander Amikam Norkin in leitung ah US F-35 gal vanleng a masa pen dingin Israel in gal dona ah zang masa pen a, Syria ah a ngimna mun nih kap hi ci-in pulak hi. BBC in US single-seat F-35 fighter jets import masa pen Israel hi ci-in gen hi.

F-35 i cihte pen nung kal in amasa penna dingin US in Afghanistan ah Talibante panmun kapna dingin kizang hi ci-in pulak hi. F-35 vanleng nam thum pha a, a masa pen dingin F-35B kicite 31 July 2015 panin US Marine Corps ten zang masa uh a, F-35A kicite 2 August 2016 panin US Air Force ten zang uh a, F-35C kicite tu kum sungin US Air Force ten zat dingin geelna nei uh hi. F-35A (nam) variants kicite khat $89.2m man a, F-35B variants khat US$115.5m man a, F-35C variants khat US$107.7m tak man ahih manin gal vanleng man tam in kiciamteh hi.

#F-35 gal vanleng a kigen zah in muanhuai takpi mah ding hiam?

23 June 2014 F-35A vanleng Eglin Air Force Base panin training dingin a lengkhia dingin a kithawi lai takin a engine kiim (area) kang a, a hawlpa tuahkhia man hi. Hih tuahsiatna hangin F-35A training 25 June pan 3 July 2014 dong kikhawlsan hi. June 2015 hih thupiang USAF Air Education and Training Command (AETC) ten report pia pan uh a, a engine' fan module a third stage rotor in na a sep theih loh manin kuang hi ci uh hi. Hih F-35A bawlphatna in $50m beisak uh a, ni 25 khit nungin leng kik thei hi kici hi.

A nih veina dingin USMC ten a zat uh F-35B khat training a leng kimlai Marine Corps Air Station Beaufort, South Carolina kiangah kia a, F-35 program adingin a kiat masakna hi. A hawlpa bel tuahkhia man hi. F-35B kicite pen a hatna 4.5 g leh 400 knots (740.8km/hr) hi a, a vanleng a galvan kithuah thak software upgrade nam tuamtuam kihel a, a galvante 5.5 g leh Mach 1.2 panin a final target 7 g leh Mach 1.6 kikal ciang manlang in kap thei hi. F-35A Lighting II kicite ah galvan thaupi 25 mm GAU-22/A; 2x AIM-120C; 2x GBU-31 JDAM kithuah a, a hatna (speed) Mach 1.6 (1,200 mph) hi a, a sau leng zawhna ciang (range) 1,200 nm (nautical miles) hi ci-in Military.com in ci hi.

Military Machine in bel F-35 in F-22 Raptor manlangna lam ah a hoihna dem zo lo a, F-35 pen air-to-ground combat design bek adingin kibawl ahih manin a top speed pen 1.60 Mach ciang bekin hat ahih manin F-22 in dogfight scenarios (gal vanleng nih sanga tam zaw kidotuahna munte) ah haksa takin mainawt theihna (maneuverability) siam lo zaw hi ci hi. F-22 bel 2.25 Mach cianga hat in leng zo a, minute khatin 62,000 feet lengto zo hi. Ahih hangin minute khatin F-35 pen 45,000 feet ciang bek lengto zo hi ci hi.

(Mach 1 i cih 332 m/s or 1195 km/hr or 717 miles/hour manlang a hatte genna hi)

#S-300PMU-2 Favorit long-range air defense missile system i cih bang hiam?

S-300 system pen nam tuamtuam om a, S-300V, S-330P leh S-300F nam thumte nuai-ah nam tuamtuam 20 val leh export a zuak ding namdang export version om lai hi. S-330 innkuan lak panin a hoih a kigen S-300VM kicite Maximum target speed, m/s = 4,500 of ballistic targets hi a, USte Patriot PAC-2 in ballistic targets 2,200 a tampen (at most) leh Patriot PAC3 Maximum target speed, m/s = 2,200 a tampen (at most) hi.

S-300 ah missiles nam thum kizang thei hi. (1) S-300 48N6E2 missile: Year = 1992; range = 200 km; altitude = 28 km; length = 7.5 m; diameter = 0.5 m; weight = 1, 800 kg; warhead = 150 kg leh guidance = Track-via-missile hi. 9M96E missile: Year = 1999; range = 40 km; altitude = 20 km; length = 4.75 m; diameter = 0.24 m; weight = 330 kg; warhead = 24 kg leh gudiance = Active radar homing hi. 9M96E2 missile: Year = 1999; range = 120 km; altitude = 35 km; length = 5.65 m; diameter = 0.24; weight= 420 kg; warhead = 24 kg; guidance = Active radar homing hi. Russia in export dingin S-300 variants a bawl pen S-300PMU-2 or Favorit air defense missile kicite hi a, 30N6E1 (Tomb Stone) radar kithuah hi. A radar range 300 km, a radar in a ngimna a mat; theih theih (detect) 100 targets, track leh engage 36 mun kap in thei thei a, missile 72 cing (guide) hi. Khat vei thu-in a ngimna (simultineous targets) mun guk kap thei a, missiles 12 cing (guide) hi.

S-300PMU-2 ah 48N6E2 missile kizang a, range = 200 km, a hatna speed = Mach 6-8 kikal kap thei a, a sangna lam (altitude ranging) = 10 m- 28 km ciang kap thei hi. USte air defense system Arrow 2 anti-ballistic system a ngimna maximum speed Mach 8 ciang kap thei a, Patriot PAC-2 in bel maximum speed Mach 6 a hat in kap thei hi. S-300PMU-2 system ah missile neu zaw 9M96E and 9M96E2 missiles a kizat ciangin a rance 40 leh 120 km ciang a missile in kap ban tuak uh a, a hatna maximum speed Mach 15 in kap thei hi. USte Patriot air defence hoih zaw Patriot PAC-3 missiles in a ngimna maximum speed Mach 4.7 a manlang ciang bek kap thei hi.

Israel ten S-300 batteries omna kikapsiatsak kha thei ding hi a cih hangin S-300 battaries van tuamtuamte (components) pen mun khat ah kikoih lo a, utna munpeuh hei kawikawi leh a omna kilaih koikoi thei (mobile or automated) hi. 54K6E2 leh 55K6 system a kizang command post hi a, a nih in automated ahih banah 22T6E2 missile loader leh 5T58E missile transporter in support hi. Match 15 cianga missile hat kilawnkhia thei leh radar in 180–360 km (110–220 mi) ciang a gamla a detect thei S-300 batteries unit koihna mun a top speed 1.60 Mach bek-a hat US F-35 stealth fighter in a vanleng a kithuah galvan hatna Mach 1.2 - Mach 1.6 a hat tawh kapsiat ding bel gen bangin thubaih pak ziauziau lo kha ding hi cih kitel hi.

S-300PMU-2 system pen Russia in Azerbaijan, China, Iran gamte tungah export (zuakkhia) ta a, Algeria ah zong export dingin ki-ummawh a, Tuesday in Syria ah kikoih hi. Israel in Iran kap nuam mahmah napi-in Iran leitang a kap ngei loin, Syria gam-a Syrian government galdona huh a om Iran military commanders omte leh a kipawl uh Hezbollah groups kicite panmun a kap theih zel pen Iran in a airspace cing dingin S-300MU-2 system a neih man na hih tuak lel hi. Syria gam a kap ngam teitei ding uh hiam, Syria galkapte S-300MU-2 system in na a septheih zah (capabilities) bangin a zang thei uh hiam cih dam in hun hong tung ding hun bekin hong hilh thei ding hi.

Source: Sputnik; Military.com; Military Machine; Military Today
@Thang Khan Lian #ZUNs

Photo: F-35 Stealth Fighter vs S-300 Air Defense System