ZOGAM LEH ZOMI IN HONG SAMSAM, "HONG HUH HONG HONKHIA UN" CI-IN KAP

 

ZOGAM LEH ZOMI IN HONG SAMSAM, "HONG HUH HONG HONKHIA UN" CI-IN KAP

Online sungah i Zogam leh Zomi itna kilim gen ngeingai ciat a, online sung panin sih ngamin a it leh humbit nuam vive ihi uh hi. Zogam leh Zomi it loin a lehpei leh a langpang hi teh, kici le hang zadah lua kisa-in vompi halung vei bangin a kitom nuam vive kitam hi. Feb. 1, 2021 khit nungin i neu panin Zogam leitang i cihcih sungah a kihel Kawlgam ah Zomite ten'na sunga leitang leh a mite in junta regime kolhbulhna tuak hi. Hih hunin na minam leh na gam itna koi ciang hiam cih mimal kim kisit hun lua khin zo a, khutzep hithiat kawmin galdon theih miumiau hi nawn lo hi. Kum khat pha dek ta hi. I gam leh i minam i itna taktak tu laitak sepkhiatna (action) tawh lah hun hoih pente lak-a khat hi.

Junta' henkol bulh leh khauh khih a tuak i gam leh i mite in haibang hong ngak hi. I pilna, i siamna, i thathang thagui, i neih leh lamte siit nei loin tu hun nangawn in i pan'khawm theih kei leh vangsel Zolei leh Zomi khangthakte in hong maisak zo ngei lo ding uh hi. I din'na leh pan'na ciat tawh hong kiciamteh ding hi. Akta mangkuan bangin kituktuk, uino bangin kipetpet hun hilo hi.

Nang leh kei i Zogam leh zomite in haibang hong ngakin, "Hong hon un! Hong honkhia un'' ci-in hong samsamin, khitui naptui luang kawmin a khutte hong vaanvan lai hi. Zogam vontawi lia leh taangte'n ngaihsun dih ni. I pu i pate' satsa Zogam nunnuam singdang' tang ding leh junta tuatcil gawp ding bang tan vei phal lai phal ding maw? Hanlung ciamin mapang khawm ve ni.

Singdang gam-a om Zomite aw, Zogam in vaibang hong sam hi. Vul khawmn ne khawm, ta khawmin i o lenna i Zogam lei hi Kua dang neihsa, kua minam dangte hilo hi. Eima' neihsa hi, eima sisan kibatpih i laizomte vive thuakna hi. Tunnu Zogam, mihing bangin i mipihte a nuntak theihna dingun khut sung ban sung sisan naisan, lutang khamin pangkhawm ve ni. Kol bulh khauh khih thuakin om ahih manin honkhia lo ding maw? Lehpei-in a bawlsia leh a hencip junta regime tawh kipawl zawsop zaw ding maw? Hun in hong khengkheng, ni tampi'n kheng zo ta hi.

ZOGAM HONKHIA NI

A sa: Jk Lianpi feat. Cingnu

Zogam in haibang hong ngak hi,

Kawl leh Vaite' khut sung om hi;

Pilna siamna, thagui thatang,

Neih leh lam teng tawh pangkhawmin,

Honkhia lo ding maw?

I Zogam in haibang hong ngak,

"Hong hon un!'' ci-in hong samsam,

Zogam vontawi lia leh taangte'n ngaihsun dih ni;

Pu-pa' satsa Zogam nunnuam

Singdang' tang ding phal ding maw?

Hanlung ciamin mapang khawm ve ni.

Singdang gam-a om Zomite,

Zogam in vaibang hong sam hi,

Vul khawm sak siam Zogam lei hi,

Hanlung ciamin mapang khawm ni,

Eima' neihsa hi.

Khut sung ban sung sisan naisan,

Lutang khamin pangkhawm ve ni,

Tunnu Zogam pu-pa' lamsa,

Kol bulh khauh khih thuakin om hi,

Honkhia lo ding maw?

Zogam leh Zomi honkhia ding maw? Ahih kei leh Zogam leh Zomite melma suak liang ding maw? suahtakna ahih kei leh kol bulh khauh khihin saltang nuam zaw? suahtakna leh hutkhiatna deih pawl lamah pang ding maw ahih kei leh mi dangte sal bangin a bawlte kipawlin i gam leh i minam zuak zaw ding maw? Teel ding thu nih nam nih bek om hi.

@Thang Khan Lian #ZUNs reports