NGALLIAM MINAM PANIN SILA LUNGSIM A PAAI MINAM SUAK KHIN TAKPI DING MAW?
"Zomite pen i pu i pate' hun panin gal leh sa mai-ah a tai lo, vompi leh keivom' mai-ah zong a tai lo, lutang a beng galdo minam hi hang. Minam hangsante hi hang," ci-in a kisialhpih leh kisaktheihpih kitam mahmah hi.
Ahih hangin galkapte in thuman lopi-in ukna hong buluhin thuneihna February 1 coup d'ètat tawh hong buluakin hong ukcip leh nuaineh leh tuatcil dikdek khit nung nangawnin, "Kawlte leh Kawlte buaina leh thuneihna kituhna hi lel hi, ei va kitaklahna ding om kei et hithiat lel ding hi," ci-in Kawlgam mi ahi lo bangin a kigen leh i kampauna uh panin mi meidawi minam ihihna a tangkopih tam mahmah khin zo hi.
Myanmar coup khit gal kidona a nasiatna pen tu laitak Sagaing Region, Magwe Region, Kayah State, Shan State leh leitungah state i neihsun Chin State hi pha diak hi. I gam i lei leh a mite a humbit dingin thautang pet liangin kiciamin a nuntakna luang kham ngamin a hu leh kembit dinga kiciamte nangawn in, "Do sese kei le'ng kibit pen ding hi, zawh loh ding kipat kul sese lo hi, a do masasa thuak ahih manin a hai teng bekin do hi," a cih miumiau uh pen i gam i lei hong kibuluh niloh hang phamawh kei, hong kisuamsuamin, zusa bangin hong kikhutkhut hangin bukcip ding hi, cih thu bullet in a len meidawi teng ngalliam a kici nuam ahihna uh kilang khia semsem a, a thau tawite uh political party khat bek, thau tawi kipawlna khat bek tawh junta dictatorship regime style zangin ki-ukcipna tawh ei leh ei kivauna leh kithahna ding bekin thau tawi ahihna uh kilang semsem bang hi.
Moses Pau' in, "Zumhuai lel, hong kimaisak sese dah un hong lawn mang ning," a cih dan cih nop huai ta hi. I gam leh i leitang leh a mite, i democratic rights leh i nuntakna right to livelihood nangawn i humbit ngam kei leh junta regime force leh Min Aung Hlaing' taw liahsak zaw ning, tua hileh suakta in bit zaw kha ning, cih tawh kilamdang nawn lo hi.
MAL leh junta dictatorship regime forces in dictatoship system tawh gam ukcip nuamin a thah nop teng ui leh akno bangin thathat ding, a buan nop teng buan ding, inn a hal nop teng halhal ding, neihsa lamsa a suhsak nop teng suhsak niloh den nuam kimlai do sese loin Zogam state demand ngah dinga kilamet miumiau a, huih thau bek online panin a do, online bek panin gal do leng kibit pen leh ol pen hi, MAL leh junta regime pen lauhuai lua ahih manin do sese kei leng full democracy, federal system leh self-determination tawh ki-ukna leh Zogam state kingah baih pen ding hi, cih ngaihsutna a nei ngalliam kitam lai mahmah mawk hi.
Junta forces in a hiam tawh a do vet loin kibit ding, bangmah hong lawh sese loin hong khahkhong ding hileh February 9 in Yezin panin lungphona nei dingin a sanggam numeite tawh Naypitaw ah va kuanin peaceful protests ah a va kihel kum 19 mi Mya Thwe Thwe Khaing si nai lo ding hi. Junta' security forces ten thau a khahna uh-ah thautang in Mya Thwe Khine' lutang kha a, zato inn ah brain dead in a lupcip khit nung dam zo loin February 19 ni-in February 1 coup d'ètat khit nung 11:00 local time (04:30 GMT), February 19 in kum 20 a birthday a tun khit deuhin a si masa nu' tung panin hiam tawh a lehdo vet lote zong MAL leh a Piknote leh Kapnote in that loin suaktasak tuan loin bit tuan lo ahihna uh kilang a, lesson sin ding leh khuaphawkna ding hi khin hi.
March 3 in zong Mandalay ah anti-coup peaceful protests ah a kihel kum 19 mi Kyal Sin (Burmese: ကြယ်စင်), Angel ci-in a kithei zaw a Chinese min Deng Jiaxi (邓家希) zong lungphona a neih lai takun junta regime forces ten thau tawh pheng kap uh a, ganhing bangin na that veve uh hi. Hiam tawh coup d'ètat regime lehdona a kipat ma 13 March in junta security forces ten nautang 60 val a thah khitte uh lakah a seh thum suah seh khat valte pen kum cing nai lo teenagers mi vive hi.
MAL leh junta dictatorship regime leh a security forces lehdo sese kei leng i bitna ding leh i suahtakna ding thusim hi, cih thu bullet pen Min Aung Hlaing leh a silate kihtakhuai lua ahih manun 1962 panin 2011 kikal sung kum 46 sung piikpeek Ne Win, Saw Maung leh Than Shwe in dictatorship regime tawh hong ukcip khum bangin a cimtak piikpeek mateng uh ki-ukcipsak ni, hong thah nop lai teng uh kithatsak ni, i numeite a buan nop lai teng buanbuan sak lel ni, i inn leh lote a cimtak dong uh halsaksak lel ni, i neih i lam a deih teng uh kisutsak den ni, i gam i lei humbit sese loin a galtai nai lo a omsun teng lai zong gamdang ah galtai kidem ni, ci-in sila lungsim neihna leh meidawina hi zaw leh hi khin ta hi.
Kum 49 sung piikpeek junta dictators thumte hong nengniam, tuatcil leh bawlsiatna i thuak khitsate banah Feb. 1, 2021 in dictator thak Min Aung Hlaing hong khan' kum khat dektak tawh junta dictatorship regime nuai-ah kolhbulhna kum 50 - Golden Jubilee pawi muak nuamin a suahtakna khempeuh uh district piak dingin SAC geelna tawh a lungkim, district lel tawh a suahtakna khempeuh uh zuak ngam, kum 50 piikpeek sung junta dictatorship ngongtatna teng a mangngilh ngam ding zahin junta regime' saguh bawk lot limci a sa zaw tam hi.
Sila lungsim paai bek hun sa loin ui lungsim nei-in junta regime' SAC in saguh bawk neuno khat hong lot tawh na suahtakna khempeuh na zuak ngam leh suahtakna taktak, full democracy, federal system tawh ki-ukna, human rights na lunggulh teng na suplawh taanlawh khin ding hi. Akta duhgawl kilawh khuh hi.
Suahtakna lunggulh maw? Ahih kei leh sila lungsim leh ui lungsim paai khawm ding teel zaw ding maw? Nangma deih teelna ah kinga hi. Na gam leh na minam adingin suahtakna sangin saguh bawk mah enlah zaw in delhin na bawh leh tu leh khangsawn hunin suahtakna, human rights, full democracy, self-determination, federal system tawh ki-ukna deih momno teng hong maisak zo ngei ding hi.
Fool's democracy, junta' feudal system or feudalism, selfish-determination pian'na dingin suahtakna go lumte na kipawlpih khak leh mipite gal na suah bek hi loin democracy gal lianpen ci-in hong kimangngilh ngei lo ding hi. Na gam leh a mite in suahtakna a ngahna dingin na sup ngam leh tu hun leh khangsawn momno ten hong mangngilh ngei lo ding uh hi.
Koi danin hong hong kimangngilh loh ding na teel zaw diam? Nangmah leh na suan na khakte tangthu ding a atat na hi hi. Na tangthu gelhna bangin hong kiciamteh ding hi. Na suahtakna na ngahna ding leh na humbit theihna dingin na kitom ngam, na lehdo ngam kei leh na suahtakna na mansuah leh khahsuah ciangin kap nena sese kei in.
Mi haipa' sih bangin
Abner aw, si ding na hiam?
Na khutte kihen kei,
Na khe kol kibulh kei;
Suahtak na'ng Hebron ah
Kal khat suan lai in!
No comments:
Post a Comment