LOKHOPA LEH A LO LAI-A VANLENG KIATNA THU (Tangthu tom)

 LOKHOPA LEH A LO LAI-A VANLENG KIATNA THU (Tangthu tom)

Ni khat a lo nawl-ah politicians vive tuan'na passenger vanleng kia khat lokhopa in va mu hi. A vanleng kiatna thu a zak phetun police team khat in tua lo hong delh pah henhan uh a, lokhopa kiangah, "Bang thu teng piang hiam?" ci-in thu a kicianin dong pah seisai uh hi. 

Lokhopa: Gam thu lamsang ah makai (politician) vive tuan'na vanleng khat ka lo nawl ah hong kia suk bak hi. A vanleng sunga tuang khempeuh a vekpi-in va vui khin pah hi. 

Lokhopa in tua bangin a dawn'na palikte lak-a khat in lamdangsakna lianpi tawh, "A vanleng sunga tuang khempeuh si khin takpi mah uh hiam cih theician na hi hiam? Bang hangin a vekpi un na vui khin pah na hi hiam?," ci-in dong hi. 

Lokhopa: A venleng sunga tuang pawl khatte nasa lua-in hagawi sa-in thum leh tau kawmin awng ngeingai uh a, "Si loin nungta lai ung," a ci om mah uh hi. Ahih hangin tua bangin a genna uh ka um ngam tuan kei hi. Nang thei nai lo zen maw? Politician a kici limlim a thuman om lo uh a, zuaugen kihta lo vive ahih lam uh nang tu dong thei nai lo zen maw? Si loin nungta lai ung, a cih a om uh hangin up ngam huai lo hi. 

@ZUNs Ciamnuih Correspondent