MITE IN THUMAN A NGAIH NOP HUN LEH A MAN LO SIATE NUNG A ZUIH HUN UH TANGTUNG SEMSEM

 MITE IN THUMAN A NGAIH NOP HUN LEH A MAN LO SIATE NUNG A ZUIH HUN UH TANGTUNG SEMSEM

Britain gamah bel Medieval Age hun lai pek panin England kumpipa/nu in ngalliam pahtawina a piak nuam mite a liangko tung uh-ah temsau ngakna tawh "knighthood" a a kici a piakte uh "Sir" cih zahtakna tawh na kisam hi. Khua leh tui leh kipawlna sungah a kiluahsuksawn minphatna leh zum a lente innkuan panin a piangte leh a zahtakhuai zaw diakte "higher noble" a kicite "Lord" na ci uh hi.

Ei mi sungah bel Reverend, Pastor ordination, upa ordination cihte bel khawng bel zahtakna za kipia na ven, SIA cih za kihawm ngei vet lo napi-in a min mai-ah SIA cih koih tawmin SIA za a kipia tawm mi tam mahmah khin zo hi.

Ei sungah Sia a kicite pen biakna lamsang theology college panin Lai Siantho (LST) sinna panin buaih a ngah pawl khatte in deih pha leh za nuam pha sese uh bang hi. LST sung en in sim le'ng Topa Jesuh in,

"Mihon lakah mite in hopihin, ‘Sia aw,’ a cih ding uh a ut uh hi. Ahi zongin note pen, ‘Sia,’ na kicih ding uh hilo hi. Sia khat bek na nei uh a, no adangte khempeuh unau khat na hi uh hi. A kiliansakte khempeuh in niamkhiatna thuak ding uh a, a kiniamkhiatte khempeuh a lianin kibawl ding hi," ci-in Matthai 23:7-8, 12 sungah Thukham hilh siate leh Farisai mite in gimna a ngahna ding thu uh Matthai 23:1-36 na sim leh sin kha ngei lo ai tam maw?

Tu hunin Sia a kici tata in gam ki-ukna leh kivaihawmna vai tawh kisai (politics) pen biakna zahin ngaihsun uh a, biakna thu awlmawh ding sangin politics awlmawh leh a buaipih zaw, a lim tangkopih zaw kitam pian hi. Politics leh politiciante peuh biakna thu leh biakna lutang a sasa tam uh a, tua bek hi loin pawlpi lutang peuh gam makai politiciante zahin ngaihsun uh a, pawlpi lutang Khris (Efesa 5:23) a neuseek semsem zawsop leh politiciante biak ding zahin a gen leh ngaihsun bek hi loin a pum phat leh pum muan tam mahmah mawk uh hi.

Tua bek hi loin, leitung thupiangte - nisim a thupiang, kialpi, tuikhang, pulnatna, gal kidona, mualkang, huihpi, tsunami, gamkang cihte natural disaster panin mihing pian'sak tawm disasters nam tuamtuamte peuh politiciante in amau thuthu leh deih bangin a hei zo leh dal zo ziauziau dingin Pasian sangin a muanna uh a lim gen zaw tam mahmah uh hi.

Tua loin, "Tua in kumpi sem lai hi zen leh hih bang piang lo mah ding hi ven, tua in kumpi a let panin buaina khang semsem hi," peuh ci-in online sungah mot paupau uh a, Pasian' geelna leh LST genkholhna a tangtungte a dal leh kham nuamin vompi halung a vei tam mahmah mawk uh hi. Pasian' geelna leh LST genkholhna bangin piang a, tangtung semsem ding hi, ci dinga kilawm tata in Pasian' geelna leh LST genkholhna teng khaktan sawmin kipum pei keei hi. Amau LST sinna koi lai hi sese a, bang LST sim sese uh ai zen tam? Hori shet!!! Mawk peuhmah!!!

Tua zah liangin politics lunglut vet ahih uh leh Pasian' gam nasepna ding leh gammial ah nasepna dingin sawm ah khat kipiate neknek khawlsanin, gam makai dingin election ciangin kiteelna hong tuh vet zaw mai le-uh biakna leh politics kigukluksak hangin a buah gawpsak leh uih gawp khinsak teng hong ve'ng ziau ding a, biakna pawlpi lutang Khris mah suakkikin, politics kici gam ki-ukna leh kivaihawmna dingin hong kizang thei ta dingin lamethuai hi.

Tua hileh biakna pawlpi kalsuanzia leh politics kalsuanzia hong man zaw ding hi, ke'n na cici ing e. No e leh? Kuamah in bombi sungten peuh puan tungsilh in zang ngei lo a, kuama'n sungsilh peuh sungten in zang ngei dihdih lo hi. A zat mawk leh a lungsim mi tawh a kibang lo hi ding hi. A kibang lo nate a kibatlohna khentel theih kisam a, a kibanglo nate a kibang bangin ngaihsut niloh ding hilo hi.

Kamsang kineihkhem mi tampi hong piang ding a, mi tampi tak umkhialsak ding uh hi. Gitlohna khang mahmah ding ahih manin ki-itna hong kiam ding hi. Ahi zongin a bei dongin a thuak zote in hotkhiatna ngah ding uh hi. Tua ciangin mi khempeuh tungah teci ahi dingin Pasian’ hong ukna hangin a lungdamhuai thu, leitung khempeuhah kihilh ding hi. Tua khit ciangin beina hong tung ding hi. (Matthai 24:11-14)

Mite in thuman a ngaih nop loh hun, amaute’ deihna bek a zuih nop hun, amaute’ zak nop thute bek a gen ding sia a cial thuahthuah hun hong tung ding hi. Amaute in thuman thutak ngai nuam nawn loin tangthu phuahtawm peuh ngaihsutpi-in nei ding uh hi. (ref. 2 Timoti 4:3-4)

Kuamah kim in a phawk loh Gitloh Gamtatna kigamta khin ta a, ahi zongin hih thu a pian' ding a khamcippa a kilakkhiat khit matengin a hong piang ding thu hong piang nai lo ding hi. A khamcippa a kilakkhiat khit ciangin A Gilopa hong kilang ding a, Topa Jesuh hong pai ciangin tua A Gilopa mutlum ding a, vanglian minthangin hong kilatna tawh a maimangsak ding hi. Satan’ vangliatna tawh A Gilopa hong pai-in, lim leh na lamdang a tuamtuamte hong bawl ding a, gitloh khemna a nam tuamtuam zangin, siatna a thuak ding mite a khem ding hi.

Tua bang mite in a suahtakna dingun thuman sang nuam lo, deih lo uh ahih manin siatna a tuak uh ahi hi. Tua ahih manin Pasian in amaute lakah nasem dingin zuau thahatna paisak ahih manin amaute in a man lo thu um uh hi. Tua ahih manin thuman um loin, mawhna sungah nuam a sa khempeuh in mawhsak thukhenna thuak ding uh hi. (2 Thesolonika 2:7-12)

Jesuh in amaute kiangah, “Kidawm un la, mite’ khemsa-in ta kei un," ci-in Matthai 24:4 sungah na genkhol khin hi. Kidop hun hi a, mite leh Sia nengnengte khemsa-in gamtat haihai hun hilo hi.

Thang Khan Lian #ZUNs reports