WHITE HOUSE SUNGAH AMA PASIAN A PUAKKIK MIPA IN GAM A UK TAK CIANGIN BANG PIANGSAK HIAM?

 WHITE HOUSE SUNGAH AMA PASIAN A PUAKKIK MIPA IN GAM A UK TAK CIANGIN BANG PIANGSAK HIAM?

Pasian ki-umsak pha diak napi-in White House a US President sem masasa in a hun (presidential term) uh a bei ciangin tua Inn Kangpi sung panin a pusuakkhiat uh teh Pasian leh Jesuh in a maban uh-ah makaih ding uh deih lua pha diak lai-in White House pusuahkhiat sanpih pahpah bangun gen luakluakin, "Let's bring back God to White House" ci-in Pasian a ut bangbangin tawi (bring) kawikawi bangin a utna peuh a taalkaih sawn den nuam manin a ku luakluak den khat na om sese hi.

Pasian leh Jesuh pen na kikholhpih nop leh na omna mun khempeuh ah hong ompih tawntung dinga mansa leh hong ompih den hong nusiatsan ngei lo lawmhoih pen ahi hi. Na zuautat nop ciang leh zuau na gen nop sim in nangma ut hunhun in na hawlkhiat den kei buang leh na sap kikkik, na puak kikkik themthum kisam lo hi. Naupang banga tengta kimawlpih ding a ut naupang melmawl hilo hi. Pasian a kikhem zo dinga ngaihsut a, ututna mun ah puak ziauziau theih hilo hi. Amah i kikholhpih nop peuh leh mun khempeuh ah om a, vantung a tokhom hi a, leitung a khe ngakna hi.

White House sungah Pasian leh Jesuh a puakkik mipa hun sunga thupiangte pawl khatte ke'n tel lua e. Tam lo hong gen pak ning maw....

*November 5, 2017 ni-in New Braunfels, Texas mi Devin Patrick Kelley in Ruger AR-556 semi-automatic rifle tawi-in 216 4th Street

Sutherland Springs, Texas sunga om First Baptist Church va suam a, biakpiakna pia kimlai mi 27 (thaukap pa leh naungek piang nai lo khat kihelin) sihna a pian'sak banah mi 20 in liamna tuak ahih manin US tangthu sungah Khristian biakinn kisuamna nasia penpen hi lai hi.

*December 29, 2019 in Texas state sung mah-a om White Settlement ah West Freeway Church biakinn Keith Thomas Kinnumen kicipa in kikhop lai takin Sawed-off shotgun (12 gauge) a tawi tawh va suam a, kikhawm mi nih a kap lup hi. Kikhopna sung mah ah a om volunteer security team member kum 71 mi Jack Wilson in Kinnumen kap lup man pah kei leh biakinn sungah mihon kithahna nasia mahmah piang ding hi. Pasian a um pha diak kineihte tamna leh party ukna sung mah ah kilom thahna nasia pen piang zawsop a, biakinn sung leh sanginn nangawn ah Khristiante bit nawn lo hi.

*October 1, 2017 ni-in kum 64 mi Stephen Paddock in thau nam 24 zangin (a thau zatte lakah 14 .223-caliber AR-15-type rifles, Eight .308-caliber AR-10-type rifles, .308-caliber bolt-action rifle, .38-caliber revolver cihte kihel) Mandalay Bay Hotel dawl 32 tung panin Route 91 Harvest music festival, Las Vegas Strip, Nevada ah mihon lak kap cih takin kap a, a khuanunga sih beh a liam teng tawh gawmin mi 61 a kap lup banah mi 867 in liamna (a kapliam leh lau-in a taina lam un a liam teng tawh) piangsak ahih manin US tangthu sungah mass shooting ah milom kithahna nasia penpen hi lai hi. Hih thu pian' lai takin Nevada state Governor Republican Brian Sandoval hi.

*February 14, 2018 in Parkland, Florida state sunga om Marjory Stoneman Douglas High School kici Smith & Wesson M&P15 Sport II semi-automatic rifle kum 19 mi Nicolas Cruz in va suam a, a sanginn -a semte leh naupang 17 a kaplup banah 17 kapliam beh ahih manin 1999 kum in Bill Clinton' presidency hunin Colorado sunga om sanginn ah milom kithahna (massacre) "Columbine High School massacre" kici ah 15 kithat sangin nasia zaw ahih manin US tangthu sungah sanginn ah milom kithahna nasia penpen hi lai hi. Florida sanginn ah milom kithahna a pian' lai takin state governor Republican Rick Scott hi a, 2018 gubernatorial election ah a cing thak January 8, 2019 panin Governor Republican mah Ronald Dion DeSantis hi. A man takin gen le'ng, 45th American president len pa ukna nuai-ah kilom kithahna nasia pen Republican-controlled state na hi khinkhian zawsop den hi.

*October 27, 2018 ni-in Sabbath zingsang biak kikhop lai takin Judahte a mudah mahmah leh Trump supporters lakah a suuksia diak white supremacist ideologies, antisemitism leh white genocide conspiracy theory um-in a haipih kum 46 mi Robert Gregory Bowers kicipa in Colt AR-15 SP1 semi-automatic rifle leh Three Glock .357 SIG handgun zangin Pittburgh, Pennsylvania sunga om Judahte biakinn (synagogue) Tree of Life – Or L'Simcha Congregation kici va suam a, kikhawm mi 11 a thah banah 7 kapliam ahih manin US gamah Judahte leh a biakinn uh kisuamna nasia penpen hi lai hi.

*US federal agency FBI in 2018 kum kikhentuamna ahih kei leh kimuhdahna hangin ki dangte deidantuamna (bias or prejudice) hangin hate crime kum 16 adingin sang pen a, minam neute (minorities) tungah thukham palsatin ngongtatna (hate crimes vviolence) US tangthu sungah kum 16 adingin sangpen hi ci-in hate crimes incidents piang zah, minam neute hate crimes thuak zah a records om teng a report Nov. 12, 2019 in The New York Times in "Hate-Crime Violence Hits 16-Year High, F.B.I. Reports" cih thulu zangin suaksak hi. A kician zaw in na sim nop leh a tunga thulu Google ah gelh lecin sources tuamtuam panin zong sim theih a, FBI records teng zong et theih lai hi.

*2020 kum pen US tangthu sungah nautangte nuntakna humbit ding tavuan len law enforcement department or policete khualna nei loin a ngongtatna (police brutality) leh racism hangin mipi thangpaihna hangin kiphinna/lungphona (popular protests or demonstrations) nasiat pen kum hi lai a, US gam sung bek hi loin leitung bup ah police ngongtatna leh minam kideidantuamna langpan'na hangin lungphona kizeel hi.

*Tua bek hi loin media tungah gal a pulak (declared war on media) leh amah a pum phat leh pum gup lo leh thuman gen media khempeuh FAKE NEWS a ci leh American mite gal hi a ci mipa ukna nuai-ah U.S. Press Freedom Tracker in 2020 kum pen law enforcement ten US tangthu sungah journalists tam a matna uh "RECORD NUMBER" tung hi.

2020 kum sungin Dec 14, 2020, 03:00pm EST dong US gam-ah journalists kiman ahih kei leh custody ah kikhum (arrests or detained) 117 cases a om khit banah mi dang 17 kimat sawm lai ahih manin 2019 kum in journalists 9 kimante tawh tehkak le'ng 1,200% in khang hi, ci-in 2017 kum in a kiphuankhia US gam-a press freedom violation (palsatna) ciamteh U.S. Press Freedom Tracker’ Managing Editor Kirstin McCudden in gen hi, ci-in minam kikal ah kitelsiam lohna hanga buaina (racial unrest) overage bawl journalists tam zawte kimatna thu Dec. 14, 2020 in Forbes in "A Record Number Of Journalists Were Arrested In 2020, Most Covering Racial Unrest" ci-in suaksak hi.

*President leh First Lady a suah theihna ding uh leh thuneihna a let theihna dingun Pasian a taalkaih sawm nupa - poitician a suah khit Khristian a kineihtawm seisai pak leh porn modeller lui Khristian kineihin politics (naingyanzi) ah hong kibual khit nungun biakna meetbawlna dingin a zang nupa kopte White House sungah a tut khak tak ciangin Khristian, Judahte biakinn sung leh sanginn leh public concert ah milom kithahna nasia pen a pian' banah minam kideidantuamna nasiat luatna hangin minam neute in ngongtatna nasia pen kum 16 adingin a sangpen tuak uh hi. Thuneihna (power) ngahna ding ahih peuh leh a gam mite a lom sih ziahziah zongin mi dangte thuman lopi-in tang ngawh leh zuau bulomtang genna banah politics ah biakna kimawlna in zangin minam kikhenna leh kimuhdahna (racial division and hatred) zat bek hunsa loin a gam kipumkhatna Union puakkham in tualgal (civil war) a piang zongin phamawhsakna nei vet lo hi.

*Tua bek hi loin US democracy kum li sungin go lum man dektak uh a, elections ah a guallelh thuman sang nuam loin vote gukna lianpi om hi ci-in US tangthu sungah voter fraud conspiracy theories zuau bulomtang a mut zawhna hangin a nungzui Trumpism cult members a tam zawte in American democracy, democratic process leh electoral system thumanna (integrity) sangin a President let zawh mid-October tanin zuau bulomtang 25,000 val a mutkhia khinpa zuau bulomtang gengen leh kutkut teng um zaw khin uh hi.

*Merry Christmas leh Happy Holidays cih greetings kamkhum dingin a kizang pen a kibatlohna thei melmal loin, November kha bei kuan leh January kha thak kuan kikal pen Thanksgiving, Christmas, kum zalom 2BCE kipat cil lai-in Seleucid Empire' Antiochus IV ukna nai-ah Judahte' galdo mite Macabbee kicite kiphinnna leh lehdona Maccabean revolt (167 to 160 BCE) kipat cil lai-in Judahte' Second Temple siahsuahna leh apkikna (rededication) leh Jerusalem a lakkik zawhna uh a phawkna pawi Hanukkah, Kum Lui leh Thak (New Year's eve and New Year), American-American culture zuite in kum sim in December 26 - January 1 kikal a zat uh pawi Kwanzaa kici, culture tuamtuamte in zan a sawt pen hun a zat uh pawi Winter Solstice, letsong kipiakna pawi (a taktakin mi zawngte huhna dingin letsoong kipiakna ni) Boxing Day, leh haksat thuak gimnate pulakkhiat hun dingin annek khawmna pawi Festivus cihte a om hun tawh kituak ahih manin Happy Holidays cih greeting a genkhawmna dingin kizang peuh Christmas tungah gal kido khum hi ci-in mi humhai mipa ukna nuai-ah bang piang hiam?

Christmas Day ni-in tua bangin "They declared war on Christmas," ci-in mi ngawhpa a pum gup Make America Great Again (MAGA) cult mi leh MAGA lukhu khu kum 63 mi Anthony Quinn Warner in a RV mawtaw sungah bomb a kam downtown Nashville, Tennessee ah puakkhamsak hi. MAGA cult member dingin mi dangte nuntakna na khual bilbel kha zenzen a, a bomb a puahsak ma-in a kiim a kianga omte kihemkhia dingin minute 15 sung hun pia ahih manin mi giat bek liam hi. A bomb puahna kiim-a communication services newtowk supply AT&T Communications building kisia gawp ahih manin Tennesse leh a kiim states li ah communication lines Christmas ni-in nawngkaina a pian'sak banah a bomb puakna 2nd Avenue North, downtown Nashville ah investgations a kineih sung curfew kikoih ahih manin Christmas suakta takin zang thei lo uh hi.

*Kum li sung America gam a siatsak dihdek beh lohna dingin Pasian leh Americans 80 millions valte khensatna (deihlohna) tawh Electoral College votes 306-232 tawh a tokhom tung panin January 20, 2021 ciangin kaikhia man zo kei leh bang teng siatna a pian' beh sak lai zen tam cih ngaihsutna khuak zangte adingin ngaihsut ngam huai nawn loin mulkimhuai mahmah khin zo hi. A presidency hun sung bekin Democrats ten mi' up theih dingin zuau thu a phuahtawm thak uh new Democrats HOAX a cih leh pandemic tampi vei na piang khin ta napi-in Covid-19 pandemic peuh a virus Sente bawl hi ci-in a ngaihsunin Chinese virus a ci miatmiat ngaihsutna pongman nei nawn lo khat ukna nuai-ah a HOAX virus hangin Americans mi 343,182+ a sih khit banah mi 19,781,718+ in a natna ngah khin zo ta hi, ci-in Worldometer data in ciamteh hi.

"Pasian a kikhem zo dingin ngaihsun kha kei un. Mi khempeuh in ama vawh nam khaici mah ngahkik ding hi. Mi khatpeuh in ama leitung pumpi deihna khaici a vawh leh sihna ngah ding a, Kha Siangtho deihna khaici a vawh leh Kha Siangtho tung panin nuntak tawntungna ngah ding hi." (Galati 6:7-8)

Topa in hih bangin ci hi:

"Vantung pen keima tokhom hi a, leitung pen keima khengakna ahi hi. Kei adingin koi lai-ah inn lam ding a, keima tawlngakna ding mun koi lai ahi hiam? Hih nate khempeuh keima bawlsa ahih manin hih nate khempeuh keima aa ahi hi," Topa in ci hi. "Ahih hangin kiniamkhiatin, lungsim a kitamzan mipa, keima thu-ah lau-in a ling kelkelpa, keima deih mipa ahi hi." (Isaiah 66:1-2)

"Pasian in gam leh minam tungah tungah thu a khen nop ciangin amaute adingin gam uk mi gilote pia hi." (When God wants to judge a nation, He gives them wicked rulers.)

- John Calvin

"Mi’ thugen a sang thei nawn lo, teek leh hai a thuah kumpipa sangin zawng napi-in a pil tangval khat hoihzaw hi." (Thuhilhna/ Ecclesiastes 4:13)

Thang Khan Lian

MERRY CHRISTMAS LEH HAPPY HOLIDAYS A CIH A KHIATNA THEIH LOH MANIN A BUAI MI TAMPI TAK OM

MERRY CHRISTMAS LEH HAPPY HOLIDAYS A CIH A KHIATNA THEIH LOH MANIN A BUAI MI TAMPI TAK OM

Merry Christmas cih leh Happy Holidays a cih pen mi dangte tungah a hoih a pha a tun'na ding, nopna a ngahna ding uh i deisakna tawh kamkhum kizang (polite seasonal greetings) tuaktuak ahi hi. Ahih hangin hih kammal a kizatna leh a khiatna a bang hiam hiam cih a theisiam zo lo mi pawl khatte, a diakin mi dangte biakna leh ngaihsutna thuakzawhna ahih kei leh theihsiam (religious tolerance) a nei vet loin biakna hahkat pha diak kineih a khauhpai khengval luate (religious bigots) in gam leh minam vai-ah meetbawlna dingin hong zat sawm uh dihdih uh a, "Christmas tungah gal hong kipulak khumna dingin Happy Holidays cih hong kizang hi," ci-in conspiracy thories mutna tawh mi tampi tak bumhai gawp uh ahih manin buai dingin a kisam lopi-in a buaipih kitam mahmah mawk hi.

November kha bei kuan leh January kha thak kuan kikal pen Lungdamkohna (Thanksgiving), leitungah mi mawhte honkhia leh gumkhia dingin Jesuh' hong suah a phawkna dngin a kizang Christmas, kum zalom 2BCE kipat cil lai-in Seleucid Empire' Antiochus IV ukna nai-ah Judahte' galdo mite Macabbee kicite kiphinnna leh lehdona Maccabean revolt (167 to 160 BCE) kipat cil lai-in Judahte' Second Temple siahsuahna leh apkikna (rededication) leh Jerusalem a lakkik zawhna uh a phawkna pawi Hanukkah, Kum Lui leh Thak (New Year's eve and New Year), American-American culture zuite in kum sim in December 26 - January 1 kikal a zat uh pawi Kwanzaa kici, culture tuamtuamte in zan a sawt pen hun a zat uh pawi Winter Solstice, letsong kipiakna pawi (a taktakin mi zawngt huhna dingin letsoong kipiakna ni) Boxing Day, leh haksat thuak gimnate pulakkhiat hun dingin annek khawmna pawi Festivus cihte a om hun tawh kituak hi.

A tunga pawi lian leh thupi pawl khat i gen daudaute leh khawl hun (holidays) hun in Merry Christmas cih kammal zat den ding pen ahi thei lo leh a kilawm lo kammal tawh hong kibang pah hi cih kilang hi. Tua banah a tunga pawi i gente pen secular leh religious pawi tawh kihelh ahih manin Merry Christmas cih bek greetings kammal dingin kizang leh Christian ahi lo biakna dangte biakna simmawhsakna tawh hong kibang ahih manin a huampi in genkhawmna dingin Happy Holidays a cih mah zat hong kilawm pen hi. Merry Christmas pen Tapidawte in Christmas a pi ni-in i nak zat pha diak a, Christmas a tun ma leh kum thak ma greetings kammal dingin i nak zat mahmah kammal ahi hi.

Happy Holidays leh Merry Christmas kammal kizatna leh Happy Hollydays cih Christmas dona dingin kizang peuh i saksak ma-in a kammal a khiatna a bul a bal i theih kisam hi. I theih mateng politics (naingayanzi) ah biakna meetbawl nuamin mi hingkhem phamawh a sa lo gam makaite leh upmawh, phuahtawh leh zuau bulomtang a kigawm a kuku pawlte conspiracy theory in a gengente un hong bumhai niloh ding hi.

HOLIDAY cih kammal pen kammal nih "holy-day" cih nih kigawm ahi hi. "Holiday” cih kammal hong kizat masakna a kimuhna pen 1500s hun hi pan a, tua ma-in a kammal lui Old English book Ancrene Riwle ah “haliday” cih kammal 1200 kum in a kizang a laih (replaced) hi bek hi.

Tua ma-in AD 950 kum in “haligdaeg” cih kammal Old English Lindisfarne Gospels ah na kizang hi. Hih "holiday" ahih kei leh "haliday" ahih kei leh "haligaeg" a cih kammalte pen Old English “halig” (holy a cihna) leh “daeg” (day a cihna) hi. A kammal kipatna (originally of the word) pen biakna pawi (religious festival) leh tawlngakna ahih kei leh gualnopna ni (a day of recreation), nasep silbawl panin khawlin suakta (free from labor and toil) a cihna hi.

English pau leh aw suah/kaih (language and pronunciations) ah tu-in khangthak (modern) hun ah “holiday” cih kammal zangin kua hiam khatpeuh "Happy Holiday" na cih ciangin "Happy Holy Day" ci-in ni khat liuliau bek biakna tawh kisai-ah a poimawhna genna dingin nopna ahih kei leh lungdamna ngah ta in (happiness for a singular day of religious significance), na cih nopna hi zaw hi. “Happy Holidays” ci-in deihsakna tawh na gen ciangin Christian calender sungah Advent hun sung teng 28 Nov, 2021 – 26 Dec, 2021 dong huam kha-in na deihsakna thu na genna kamkhum zatna hi.

Advent i cih pen Christian calendar sungah Christmas a pi ni 25th December hong tun ma - 28 November panin 24 December dong a kizang leh Feast of the Epiphany kici annek khawmna tawh tawh tawh a kibeisak genna hi a, Christmas hun tun ma Niini li teng genna hi. Tua ahih manin Chisristmas season hun in mi dangte in nakpi nakpi nuuamna leh lunggdamna a ngah theihna dingin na deihsakna thu na gennop ciangin “Happy Holidays” ci-in na deisakna thu na gen (wish) pen Advent nitak a kipat ni zan panin Christmas ni kihelin Feast of the Epiphany kici nekkhawm bawlna teng huam khin vekin na deihsakna thu na genna hi zaw hi.

Late Old English ah 1038 kum in "Christes Maesse" kizatna Jesuh Khrist hong suahna ni ci-in Cristes Maesse cih kammal a zatna kimu pan hi. Tua khit nungin “Christ Mass” a cih kammal pen English kammal ah na kizang pan a, tua khit nungin modern English ah "Christmas" cih kammal hong kizang pan hi zaw bek hi. “Merry Christmas” ahih kei leh “Christmas” ci-in mi dang khatpeuh deihsakna tawh a kammal na gen ciangin Jesuh hong pian' ni hi ding hi ci-in mi a tam zawte in a ciamteha leh kipsakna (recognized) ni 25th December ni-in tuucingte tungah a kizasak nuamna, lungdamna (joy) ngah ta in, ci-in ni khat adingin a special greeting na cih nopna hi zaw bek hi.

Hih bangin kumpi tung panin ciamtehna ngah in khawlna ni (holiday) a kingah hun pen biakna lamsang tawh kisai khakna nakpi takin nei hi cih Judaism leh Christianity biakna zuite adingin kilang pha diak hi. “Happy Holidays” cih kamkhum tawh mi dangte deihsakna thu (wish) na gen ciangin Advent hun sung teng huam kha loin "Mass of Christ" ci-in Lungdam Bawl ni-in nekkhawmna i bawl tawh kihelin mi dangte tungun, "Nopna na ngah ta un," cih genna kammal dingin a kilawm zaw na hi zawsop hi.

Biakna (religion) meetbawl nuamin zuau bulomtang tawh Christmas a do om hi ci-in hong khemte kibumhaisak nawn kei ni. Topa Jesuh hong suah lai-in a zin tun'na ding uh mu zo loin ganbuk (manger) sungah dai dide zan siangtho in hong suah bangin i lung sungah Jesuh i suah sak lai teng kuamah in Christmas ni a manphatna a dodo zongin beisak zo lo ding hi.

Tua ahih manin 25th December ni in na hih ka lai gelh a sim khempeuh tungah "Merry Christmas" zong ci loin Jesuh' hong suah a phawkna ni dingin a kizang Lungdam Bawl ni-in nakpi nuamna, nopna leh thupha na ngah un, ci-in Zokam sit tawh deihsakna ka hong gen hi.

Thang Khan Lian

NATIONAL REGISTER OF INDIA (NRC)

 

NATIONAL REGISTER OF INDIA (NRC)

Manipur ah assembly elections kik March 2022 ma-in Manipur ah National Register of Citizens of India (NRC) kikoih ding hi ci-in House leader leh Chief Minister Biren Singh in second day of December 2019 in winter session Assembly ah na gen khin zo a, tua dingin Central Government hong thukimpihna dingin state government in lai kikhak khinzo hi ci hi. Manipur ah inner line permit (ILP) implementation hangin Citizenship Amendment Act (CAA) hong kikoih loh hangin BJP in a lipkhaphuai zaw NRC koih ding sawm in assembly elections kik vote zon'na ding ngiatin zat sawm ta uh hi.

National Register of Citizens (NRC) i cih in gammi hihna lahna dingin thukhun Citizen Act, 1955 kum in thukhun kibawl tawh India gammi (citizens) khempeuh 1955 kum in min kikhumna ahih kei leh ciamtehna (register of all Indian citizens) kibawl 2003 kum in a puahphatna (amendment) kibawl kibawl zuih ding cih genna hi. NRC thukhun nuai-ah legal Indian citizens in lai poimawh (documents) a neih uh sittelsakna panin illegal immigrants kua teng hiam cih theihkhiat leh puakkik ding cih ngimna tawh a kibawl ahi hi (Its purpose is to document all the legal citizens of India so that the illegal immigrants can be identified and deported).

24 December 2019 in Union Cabinet in NRC updates bawlna dingin sum ₹3,941 crore (US$550 million) zat dingin thukimpihna na pia khin zo ta ahih manin NRC zuih leh zatna (implementation) a kipatna dingin kalsuanna masa pen suak hi. Assam state kihel kha loin April 2020 panin India gam bup sungah NRC implementation ding geelna a neih uh a lehdo leh lehnan'na dingin India gam bup sungah lungphona nasia takin a pian'na hang leh Covid-19 pandemic hangin a zekai leh kidiah den lai suak hi bek hi.

Assam state ah 2013-14 panin NRC na kizang pan ta a, Indian galkap leh Hindu tul tampi kihelin Muslims tampi takin Indian citizens ahihna uh a lahna dingun documents nei loin buaina lianpi - matna, detention facilities ah khumna tul tampi takin na thuak khin zo uh hi. Government of India (GoI) in NRC India gam bup sungah 2021 panin a thukhun zuih leh zat (implement) dingin geelna Modi makaih BJP government in ngimna nei hi.

NRC pen 1951 Census ah India gammi khempeuh min khumna ciamtehna sungah kihel khat leh a suan a tu leh tate uh India gammi hi, ci-in a ciamtehna hi. Supreme Court in 2013 in NRC process monitoring dingin a thupiakna bangin Assam in final updated NRC for Assam 31 August 2019 in a published khiatna ah Assam state milip 33 million (3.3 crore) lakah 31 million (3.1 crore) min bek om a, NRC applicants min 1.9 million kinialsakin kisan'sak lo ahih manin gammi hihna nei lo (stateless) - Myanmar gam-a Rohingya mite tawh a status uh kibang hi. Assam in NRC sungah registered khak lohte khumna ding detention centers 2008 kum pekin court thupiakna tawh na bawl ta a, guk om khinsa lakah 10 lam beh hi. Goalpara district, lower Assam ah exclusive detention center kilam pen mi 3,000 thawl zawhna dingin ₹46 crore (US$6.4 million) zat a sawm uh a golna 288,000 square feet (26,800 m2) square feet (football grounds sagih tawh kikim) dawl 15 nei ding geelna in lam uh a, December 2019 pekin na zawh sawm uh hi.

Assam sung bekah NRC sungah Indian citizens in cidamna ah min om kha lote illegal immigrants suaksak ziau in a khumcipna ding detention centers state tuamtuamte - Delhi Detention Centre kici mun thum ah Foreigners Regional Registration Office (FRRO) operations nuai-ah, May 2019 in a kihong Goa Detention Centre kici Mapusa ah, feet 10 in a bang a sang, sikdai kikai leh watch tower tawh kithuah 1 January 2020 panin a kizang Karnataka Detention Centre kici Bangalore panin 40 Kms gamla in a om Sondekoppa, Nelamangala ah, May 2020 in zawh ding a sawm uh Punjab Detention Centre kici Tarn Taran district sunga om Goindwal Sahib ah kilam, 1.2 hectare in a gol sunga kilam Maharashtra Detention Centre kici Navi, Mumbai sunga om Nerul ah kilam, Alwar ah Central Jail campus sunga kilam Rajasthan Detention Centre cih bangte ah Pakistani mi leh gamdang mite a kikhum tampi om khin zo hi, kici hi. December 2019 in reports in a genna ah NRC lehdo West Bengal leh Kerala states ah detention centers lam dingin geelna kikhawlsak hi, ci hi.

Biren in National Register for Citizenships of India (NRC) cut-off base year pen Centre government in NRC implement dingin thukimna hong piak khit ciangin a kician in kigen ding hi ci hi (hong sawm taktak ciangun lungphona a kuangkhiat pah ding panin kidopna hi). Hih thu pen opposition MLA Kh. Joykishan of the Congress in dotna a bawlna a dawn'na hi. Meiteite leh Manipur BJP in NRC cut-off base year pen 1961 ciangtan ding ngimna nei uh a, 1961 ma-in Indian citizen hihna evidence or proof (IDs) nei lo teng illegal immigrants suahsak ding ngimna nei uh hi phiangsan uh hi. Tua bek hi loin NRC implementation in om leh sum tampi a bei dingte Center government kiang panin laikhia thei ding uh ahih manun nekguk ding sum tampi om ding cih ngimna lianpi zong hi kha hi.

BJP pum gup a, vote piate zong NRC hong kizang leh i Lai Siangtho koihna, i voting IDs leh i inn pakka patta (registration) koihna mun nangawn thei loin a zong a buaite i hih lai manun BJP a gup man uh leh vote a piak hangun buaina tuah ding panin peng tuan lo ding uh hi. Documents kepbit ding don lo leh nei lo khamtung mi teng buai khawm ngeingai ding hi hang. Acche Din Agaya (Good Day Has Come) leh Bharat Mata Ki Jai, Hindurashtra (One state, One Religion - Hinduland) ci-in ot lala bek tawh buaina panin peng ziauziau theih ding hi nawn lo kha ding hi.

Talpakte in tualsuak mite leh peemta mite ci-in tuu leh keel bangin khen ding hong sawmin, BJP in Hinduva idealogies Hindurashtra suahsakna dingin anti-immigration laws tuamtuam hong vikvik lai takin ei amau saguh bawk lotte in hong bum haicip lai a, Kuki leh Zomi tawh buai lunglung in akta mangkuan kitu bang leh unau beelkang kituh bangin uino bangin khat leh khat kipetpet in i buai lingling lai ngap zen uh hi.

US gam-ah Trump makaihna tawh Republicans party in anti-immigrants laws khauh mahmah leh politics ah biakna a lim zat mahmah bangin India ah zong conservative Hindu ideologies bulphuh in Modi' makaihna nuai-ah lim zat mahmah hi. 1951 Census ah Indian citizens min a kikhum lai takin i pu i pate min a kikhum khak leh Modi government leh BJP in illegal immigrants hong suahsak sawm banah India gam panin hong puakkhiat (deport) ding ngimna hong nei den hi, cih phawk le'ng BJP party thapia in pum gup leh vote piakpiak ngamhuai het lo hi. Bu-al khuang ta, khanlawh hun lua ta hi.

My Take: Superficial nationalism leh superficial Christianity or religious dogma thuahkhawmin politics kimawl politiciante zahin a kihtakhuai zaw dang mi om nawn lo hi.
Reference -ifp and Wikipedia

@ Thang Khan Lian #ZUNs reports

NA GAM LEH MINAM ITNA KOI DAN LEH KOI LEVEL CIANG?

 

NA GAM LEH MINAM ITNA KOI DAN LEH KOI LEVEL CIANG?

Gam leh minam itna i cih pen i minam hihna i sih dong i sisan a luan' lai teng i paai ciat ahih manin va-ak utong kineih lelna tawh a kipai leh laih thei ziau ding leh si sisan khempeuh leh i lungtang laih i hih buang kei leh paihkhiat theih ding hi ngei lo hi.

Tua nangawn a tel zo nai lo pawl khatte in a minam hihna kam beembeem bekin a otpih baba pongin, laan (flag) tawi leh khai velvelna peuh gam leh minam itna hi diak se bangin a ngaihsutna a nei kitam mahmah lai hi. Tua bangin kineihkhemna tawh lahkhiatna kisam a sa nawn sese lote leh ngaihsutna tuam zaw (critical ideas) suakta takin a genkhiate kampau zadah pah in heh in kitom in ha gawi pah, gal bawl suk pah leh thah ding nangawn in a mipihte vau ngamna leh minam langpang hi, cih ngawhna pen minam leh gam itna nam khat ahih tei sam hangin extremist ahih kei leh radical nationalism kici a, Taliban leh ISIS fundamentalists mite ideology hi a, ngongtatna hi.

Minam leh gam itna leh veina thu thuman bulphuh in ngaihsutna suakta takin genkhiatna leh veina tawh mipihte gilkial dangtakin a om ding phal lohna leh zuau thu haipih henhan in a mipihte lampial mang gawp lohna lohna ding lunghimawhna, minam siatna leh supna ding awlmawhna leh lunghimawhna tawh thuman dinpih ngamna pen minam itna taktak hi zaw hi.

Tua bangin thuman thutang din'pihna pen minam supna leh kiam tuamna ding beek lah hilo a, a basic fundamental rights uh "freedom of speech and expression" zangin a ngaihsutna uh suakta takin a genkhiat theih lohna dingun vauna a tuakte thuahpih in gup ngamna leh lampialte lampi man lahna leh lamsam a thanem a bah mite huh in kuamah a mangthat khak lohna dinga hanciamna pen minam itna taktak lahkhiatna hi zaw hi.

Na gam leh minam laan a kilehkhai na muh manin hehna dinga kiphinna bangin ngaihsutna pen gam leh minam itna kici lo hi. Nek ding leh silh ding nei lo mi khat lam kiangah puuksi dingin a tu na muh ciangin hehna dinga kiphinna bangin ngaihsun in, na nek taang ding na piak ngamna pen gam leh minam itna taktak itna zaw hi. Thuman lo haipih henhan in lampialte na tai ngamna zong minam itna lianpi khat mah hi.

Thang Khan Lian

HONG LANGPANGTE LEH I GAL TAKTAK KUA HIAM CIH TEL SIAM MASAK KISAM HI

 

HONG LANGPANGTE LEH I GAL TAKTAK KUA HIAM CIH TEL SIAM MASAK KISAM HI

Tribe/ethnic kici leh tribe/ethnic kipawlnate in Zomi a langpanna leh a mindaisak ding i bawlbawl zawk man ahi zaw tam maw? India gam ah tribe min a kinak zat mahmah bangin Kawlgam ah zong Tedim (Zomi) Association makai U Kapno in bel Tedim cih nak zat mahmah hi. Myanmar gam-ah Burmese government hun lai pekin "extremely ethnically diverse nation with 135 distinct ethnic groups officially recognised" in a ciamtehna sung panin "Officially recognized ethnic groups" ci-in CHIN ethnic category nuai-a om "53 different ethnic groups" lakah government in official in ciamtehna tawh a kipsak khitsa leh a omsa Tedim cih a zang hi bek hi. Tel hi le'ng zakdah luatna ding om kiuhkeuh lo hi. Ethnic groups sunga kihel min zang hi lel hi.

I LST bu nangawn ah "in Tedim Chin dialect" cih tuang lai a, i labu ah "Tedim Labu" cih tuang lai hi. I lai bel ni dangin Tedim kam mah zat dingin khua hausa ten common literature khat i neihkhawm ding a lunggulhna bangun Zolai bawlna dingin Cope topa in a sapkhawm lai-in na kikumkhawm uh a, Tedim pau i common literature a zat dingin na thukim uh hi. I Zolai hong bawlsak JH Cope' hun in Mikangte hong ukcip khum lai-in zong ukpite hat hun ahih manin a hatpen Sukte ukpipa Kam Hau' dialect na ci ngei lai hi. Tua hi napi-in namke tribe tuamtuam in amau pau in LST leh Labu leh lai a neih uh pen Zomi langpang hi uh teh, ci-in va ngawh mawk le'ng Zomi Movement ah kipumkhatna sangin kikhenna piang zawin thanemsak zawsop thei ding ahih manin minam langpang hi ci-in kipawlna dang phuante ngawh theihna ding om lo a, kipawlna neu khat tawh pahtawina a piakte uh zong Zomi langpan'na hi, ci-in ngawh theihna ding om tuan lo hi.

Tedim cih Myanmar a ethnic groups 135 official recognition om khin leh kip khinsa ahih manin a zat mah ahih manin zakdah luatna ding om lo hi. Zomi i cih in Zosuan khempeuh huam a, common language leh common literature i neihna ding mualmong et bang lai ahih manin a om nai lopi gengen in, i deih mah bangin a om khinsa gengen a, a zangzangte zatna zong va pum zakdah sak pah a, va pum muhdahna pen lungsim kawcik vai lua hi.

Tribe/ethnic leh nation leh tribe leh nation min tawh a om kipawlnate a kibat lohna i tel ding kisam a, hih kammal kibang lote kibangsa in buaipih lo zaw in common language leh common literature i neih theihna ding, kitelkhialhna ding sangin kitelsiam zawkna ding, kikikhenna ding sangin kipumkhatna ding, kiatniamna ding sangin khantohna ding, nungkikna ding sangin mainawt theihna ngaihsun zaw in, lungsim kawcik sangin lungsim taanzau sak zawk ding pen minam itte lungsim puak zia hi zaw hi. A tribe a it lo mipa in a minam it thei ngei lo ding ahih manin kitelsiamna dingin "safety valve" i bawl kei leh a sat luat ciangin pressure cooker bangin puakkhawm thei hi.

TA pen Zomi min leh Zomi bup kipawlna hi loin kipawlna neu zaw dang hi. Tribe a hat leh nation hat ding hi. Inn khuampi tampi kiphutte kip masa lopi-in innpi kip thei ngei lo hi. Tribe leh nation kisam lopi-in kigalneihsak sawm kei zaw le'ng i nation movement damdam in hong hatzaw ding hi. Tribe leh nation kigal ngei lo hi. Na kigalbawl sak sawm hangin dahpa lokho na bang lel ding hi. A tuamna bangin a zatna tuam zong na tuam tuak hi.

I hat pai nop luat ciangin tuk ding baihlam zaw hi. Nation cih pen zai lua ahih manin a tribe/ethnic sunga nautangte hatna tawh kituakin i paipih kei leh a tuk ding hong baihlam zaw kha thei a, a thahat ding i deih luat manin a thanemna dingin gakcip kha zawsop sak thei hi hang. Gam khempeuh in upadi nei ahih manin a khial i cihte constitution articles tua zahna palsat in khial a, tua penal code mun palsat hi teh ci-in FIR bawl khum theihna ding i neih a, a khialhna i gen theih mateng kuamah in khial ing hong ci ngei peuhmah lo ding a, right to assemble leh right to form organisation palsat loin kipawlna tuamtuam upadi palsat leh minam langpang ci-in kingawh zo ngei lo hi. Mihingte pen a khial sangin a kidiksak vive ihi hi.

Gam khat a upadi (law) sangpen Constitution i thupina i gen ciangin law a gen ihi bek a, LST thu tawh na khempeuh gawm pahpah in mek khop den keei pen democratic secular gam a tam zaw hi napi tua sang thei mahmah lo fundamentalist leh conservative leh theologian lam sinna nei politics uk khengval lua pawl khatte ngeina hi zaw hi a, Talibanisation or Islamisation of politics kici hi. Kingdom of Heaven leh Kingdom of Man a kibatlohna beek zong biakna leh naingyanzi (politics) UK leh thei kisa i hih leh a kibatlohna theih kisam hi. Thuciam Lui leh Thak pen constitution tawh kibang loin kibang ngei lo ding a, khat Pasian' thupiak leh a hu a mop kammal hi a, khat pen gam mite leh biakna tuamtuamte kuamah khentuam nei loin kituahna ding leh gam bitna ding, 'law and order' om theihna ding, thuman thutang in kivaihawmna leh ki-ukna a om theihna dingin upadi kibawl pen constitution kici hi.

Topa Jesuh in, "“Moses Thukham leh kamsangte’ thuhilhnate a phiat dingin hong pai hi, ci-in hong ngaihsun kei un. Tuate a phiat dingin a hong pai hi loin, amaute’ hilhna a kicingsak dingin a hong pai ka hi zaw hi. Hoih takin na phawk ding uh thu panin: Van leh lei a bei mateng, hih thukhamte a neupen khat nangawn’ deihna tangtung lopi-in mawkmai lo ding hi. Tua ahih manin hih thukhamte lak pan a neupente khat bek nangawn zui kha loin, mi dangte in zong a zuih lohna dingin a gen mite pen vantung ki-ukna sungah mi neupen hi ding uh hi. Ahi zongin hih thukhamte zui-in, mi dangte in zong a zuihna dingin a hilh mite pen vantung ki-ukna sungah milian hi ding uh hi, ci-in Matt. 5:17-19 ah na ci hi.

Jesuh lehhek in golhguk sum pia in a thatsak i cihte LST bek mah (Thuciam Lui bu sung) bek a bullet teta fundamentalist leh conservatives Judahte hi mah hi. Tua hun in Thuciam Thak om lo ahih manin amau thubullet Thuciam Lui bek a len teta Judahte leh democratic secular gam-ah om napi constitution (taang lai hileh Messiah ci pak ni gentehna dingin tel nopna dingin) om napi constitution thusim loin LST bek bullette pen kilamdang lua lo a, ethnics/tribe tampi teenkhawmna democracy ah a thubullet tetate uh 100% kizang thei den lo hi cih zong theih huai hi. Constitution pen kuamah biakna tawh kikalh lo hi zaw hi.

Innkuan khatin a teng khawm sisan khat a piang, zing leh nitak ankuang sawk khawm dente nangawnin kitot hun, kitelkhialh hun leh kihehsak hun a tuak ngei lo om lo hi. I minam kipumkhatna ding, kigawmna ding, thahatna ding, mainawtna ding, khantohna ding i deih takpi leh innkuan sunga a phengphi leh a lampialte i pampaih theih loh manin i it veve a, lampi man lakin itna leh deihsakna tawh thuhilh in i tai hilh mah bangin i minam sungah lampial leh gamta khial a om ciangin zong thah ding leh muhdahna ding vive bek online ah khahkhah zaw loin zol bawl a, huai bawl masa a, lampi man i lah a, i thuhilh ngekngek ding pen minam picingte leh i Khristian ngeina hi zaw hi.

Khat khialhna a khialh kik loh ding i deihsak takpi leh mipi muhna ah selpho leh tawlem pah lo zaw in, thah ding, tuamkoih ding, muhdahna ding bekin online ah khahkhia pah lo zaw in mimal in va kimuhpih a, a khialhna uh a phawkkik theihna dingun va tutpihin, a lampial lam uh va hilhcian theih ding pen minam khangto leh Khristian ngeina hi. Tua hileh amau mah in mipi zak dingin maisakna hong ngetna dingin aana tawh va sawlsawl kul se lo ding hi. A kithatthat, a kituamkoih leh a kimuh dingin kitawm lua lai mahmah a, i kimudah nuam zongin i kimuhdahna ding sangin i ki-it zawk ding pen ei adingin meet huai leh bit huai zaw hi.

I deihna leh i lunggulhna a kibang mah ahih manin tuam paipai lo ding, ngaihsutna kibang lote kikumkhawm in a hoihpen zuih dingin consensus lak pahpah kisam hi. Ngaihsutna kibat lohna hang, i paina a tuam zawk deuh manin minam langpang cihna hi pah sam lo hi. I launa dingin hong vaute, hong nengniam den nuam mite, thah dingin hong ngim in, hong buksim leh hong delhte pen i gal leh i minam langpang hi zaw bek hi. I gal kua hiam cih cih zong i theihtel ding kisam hi. I thuzawh zo a, a nak i pheh zo a, ei ngaihsutna dan lian neite bek ei tawh kipawl i sak lai teng kuamah tawh i kituak ngei kei ding a, kisam lopi-in gal ding a zongzong i hi lel a, i gal ding i hau semsem zaw ding hi.

Professor George Santanaya in, "A history uh-ah a hih khialhna panin sinna nei thei lote pen hih khialhna mah pal kik dinga hamsiatna ngahte hi," a cih mah bangin i hih khialhna panin i sin theih kei leh a vaisah zaw kipal to ngekngek lai ding a, hong ngak gige den hi. I gam leh minam it vangin dogal kisuah kei ni.

Thang Khan Lian

BIAKNA LEH GAM VAI TAWH KISAI KHENSIAM NI (SECULARISM)

 

BIAKNA LEH GAM VAI TAWH KISAI KHENSIAM NI (SECULARISM) 

Secular i cih ciangin Latin kammal "saeculum" panin a kilasawn hi a, biakna leh naingyanzi (politics), tangpi tangta leh ki-ukna vaite (civic affairs and state affairs) kikkhenin kituamkoih a cihna hi a, biakna tawh kisu kha lo ding cihna hi peuhmah lo hi. Gentehna ding Kawlgam vai gentehna dingin zang pak le'ng: 1948 in Burmese Constitution nuai-ah Kawlgam pen secular state hi a, tua khit dam damin government policies pen socialists Marxist ideology in gam ki-uk zia zo mahmah hi. August 1961 in Burma gam Buddhist religious state suahsak ding na hanciam uh a, Ministry of Religious Affairs in Department for the Promotion and Propagation of Sasana (Buddhist teaching) nangawn na pan uh a, 1962 dong a khauhpai mahmah authoritarian military regimes (military junta) nuai-ah na omcip hi.

1974 kum in Burma gam-ah Socialist Constitution kiphiatin a kikhawlsak (suspended) ciangin upadi (constitution) in biakna suahtakna hamphatna (religious freedom rights) om mel nawn loin toi mahmah hi. Burmese government in huhna (compensation) pia loin sum sihsakna (withdrawal of currency notes without compensation), a economic mismanagement hang, Burmese socialism a lawhsapna hang, police hiamgamna leh ngongtatna khengval (police brutality), nekguk takgukna (corruption) leh galkapte in amau deihna bangin gam ukin a vaihawh (military dictatorship) cimtakhuaisakna leh deih lohna hangin 12 March 1988 – 21 September 1988 kikal sung 8888 Uprising or the People Power Uprising kici gambup ah lungphona hong piang hi.

Kawlgam gambup ah a kizeel 8888 Uprising hun in sisan naisan tampi luang a, mi 350–10,000 kikal in liamna leh sihna tuak (casualties) a, Thailand ah mi tampi a gal tai banah sangnaupangte tampi mah thau tawi in government a leh kipawlnate (insurgent groups) ah ban lut uh a, galkapte in galkap thahatna zangin 8888 Uprising a betdaih khit nungin freedom of religion kiseekneu beh semsem hi.

Ahih hangin Myanmar gam thuneite (authorities) in general in religious groups tuamtuamte amau biakna suakta takin a biak theihna ding uh phalna pia napi-in biakna pawl khatte in a biakna uh-ah hih ding leh hih loh cih gakna (religious restrictions) a koih khum banah right to freedom of religion palsatsak hi cih ngawhna tampi om hi. Burmese military government nuai-ah State Peace and Development Council (SPDC) in a uk hun sungin constitution or legislature om loin 1988 dong gam na ukcip uh hi. October 2006 Minister of Religious Affairs Brigadier General Thura Myint Maung in Kawlgam-a main religious groups lite - Buddhist, Muslim, Christian leh Hindu makaite samkhawmin hopih a, freedom of religion i gam ah om a, Muslim biakinn leh Christian biakinnte (mosques leh churches) ah suakta takin biakna pia-in a kikhop ding uh phalna kipia hi, ci-in na gen hi.

Myanmar gam milip 54 million (2009 in a kituatna) pha lakah 90% ten Theravada Buddhism (48 million kiim), 4% Christianity (1.65 million Baptists leh 550,000 Roman Catholics), 4% Islam (2.2 million), 1% Hinduism (550,000), leh 1% Mahayana Buddhism, Vajrayana Buddhism leh Animism biakna zui uh hi ci-in kiciamteh a, 2014 Census ah Myanmar Population and Housing Census in Buddhist 89.8 percent, Christian 6.3 percent, Muslim 2.3 percent, Hindu 0.5, Animism 0.8 percent, "other" 0.2 percent leh biakna a nei lo 0.1 percent om hi ci-in ciamteh hi. Myanmar gam pen a upadi sungah secular state hi khin hi. Religious state dan pianin a om hangin religious minority ten suahtakna a ngah veve pen i hamphatna lianpi hi.

Gambeel in gamdang ah tampi i taina leh tun' theihna dingin i paulap leh deih loh banah i langpan' pen securalism deihna hang, dictatorship, nekguk takgukna leh galkapte ngongtatna deih lohna hang hi pen napi-in gam nih gam thumna i va tun' khit ciangin extremist Christian ideologies kibumhaisakin secularism langpangin theocracy leh presidential dictatorship, police ngongtatna (police brutality) leh gam makai nekguk takgukna ah ngawhna tuakte Khristian makai muanhuai hi, ci-in a pum deih leh pum gupna thu vive kam beembeem in a awng religious bigots (biakna dangte leh ngaihsutna tuam neite biakna leh ngaihsutna thuakzawhna a nei vet lo) kitam mahmah leuleu laplap zawsop mawk hi. Ei tung bek ah nitaang ding, mi dangte tungah guahzu den ding cih a deih mi gilo kimlai mihoih a kineihkhem kitam mahmah hi.

Biakna leh politics gawmkhop pen cidamhuai het loin lauhuai mahmah a, nuclear galvan bangin a kihtakhuai mahmah leh a bei thei ngei lo gal (unending war) a piangsak galvan hi zawsop hi. Biakna leh politics gawmkhop manin zong Central Europe gamte ah Religious War ahih kei leh Thirty Years War kici 1618 panin 1648 kikal kum 30 sung Khristian leh Khristian - Roman Catholic biakna zuite leh Protestant biakna zuite kidona hangin million 8 kiim sihna na piangin na kigo lum zen uh hi.

Biakna leh politics a kigawmkhopna hangin a bei thei gal tu dong a pian'na dingin Jerusalem khuapi kituhna hangin zong Crusaders Wars a kici kidona lian giat vei tak Muslimte leh Christiante 1096 panin 1291 kikalin kum 195 sung piikpeek na kido uh hi. Judahte zong na peng tuan loin a nautang leh galkap kigawm 1.7 million kiim in sihna tuak uh a, crusaders 20 bek Jerusalem ah lut zo hi, ci-in historians ten ciamteh uh hi. Crusaders ten Jerusalem tawlkhat sung bek a lak zah hangun a kituhna mun uh-ah ah tu dong Muslimte biakna ah a siangtho pen thumna al-Aqsa Mosque, Dome of the Rome bek ding lai a, tu dong buai lailai hi.

I teen'na leitung pen Kingdom of Heaven hi nai loin Kingdom of Man hi a, gam upadi in biakna suahtakna dingin hamphatna (freedom of religion) hong piak peuh leh suakta takin i biak nop peuh kibia thei den lua hi. Tua ahih manin secular democratic gam-a teng i hih leh biakna leh politics a kikhenna pen ei bek hi loin biakna dangte leh minam dangte adingin a cidamhuai zaw leh a kilemhuai pen hi zaw hi. I biakna peuh hahkat lua kineih in i religious bigotry ideologies zatkhialh khak ding lauhuai mahmah hi. A dam thei lo natna bang thei ahih manin gam tam zaw in secular democratic government zang ta hi.

Spanish professor George Santanaya in, "History ah hihkhialhna panin sinna nei thei lote pen hihkhialhna mah pal kik dinga hamsiatna ngahte hi," a cih mah bangin eima biakna bek ultungsakna hangin Thirty Years War ah Roman Catholic church leh Protestant church kidona hangin 8 millions kithahna bang i pian'sak kik lohna dingin biakna leh minam tuamtuamte tawh i teen' khawmna ah biakna leh politics khemsiamin mi dangte tawh i kilem theihna ding i hanciam zawk ding pen Lai Siangtho' deihna hi zaw hi cih i phawk kisam hi.

Mi dangte’ gitlohnate thukkik kei un la, mi khempeuh in hoih hi, ci-in a ngaihsut ding bangin gamta un. Ahih theih lai teng mi khempeuh tawh na kilemna dingun hanciam un. (Rom 12:17-18)

 Thang Khan Lian