FOOTBALL LEGEND KUM 60 MI DIEGO DIEGO MARADONA IN HONG SIHSAN TA

 

FOOTBALL LEGEND KUM 60 MI DIEGO DIEGO MARADONA IN HONG SIHSAN TA

Nov. 25: Bawllung/tukpeng tangthu sungah a tangthu a kigen sawnsawn (football legend) Diego Maradona in heart attack a thuak khit nungin hong sihsan ta hi, ci-in Maradona' spokesman in a sihna thu pulak hi. Local media report in a genna ah, kum 60 mi Diego Maradona in Nilaini in Tigre khuapi-ah leitung hong nusiatsan hi, ci-in gen hi.

Argentine President Alberto Fernandez in Maradona' sihna thu a kipulakkhiat khit nungin amah dahpihna dingin gambup sung dahna (national mourning) ni thum sung kinei ding hi ci-in tangko hi.

Argentine professional footballer leh football manager Diego Armando Maradona Franco pen 30 October 1960 in Lanús, Buenos Aires ah na piang a, 25 November 2020 in Tigre, Buenos Aires ah si hi. Ama tun a san'na (height) 1.65 m (5 feet 5 inches) bek pha bilbel a, attacking midfielder or second striker mun ah kimawl hi. Ahih hangin ama ngalhat leh vanglai hunin defenders ten a siamna hangin a thuaklah mahmah khat uh hi a, bawllung tangthu sungah a min mang ngei lo ding hi.

Maradona in a football career ah classic number 10 position ah advanced playmaker in pang a, football history ah word record transfer fee nih vei a piangsakpa hi. Amasa penna dingin Barcelona club ah a transferred fee tua hun in world record £5 million na tung a, a nihna dingin record fee dang £6.9 million tawh Napoli ah transferred hi. Maradona in a football career hun sungin Argentinos Juniors, Boca Juniors, Barcelona, Napoli, Sevilla leh Newell's Old Boys clubs cihte ah na kimawl a, ahih hangin Napoli leh Barcelona club-te ah a kimawl sungin a kimawlpihte lakah a siam tungtuanna hangin minphatna leh pahtawina (accolades) tampi na ngah hi.

Maradona in Argentina gam adingin international career ah 91 vei a kimawl hun sungin 34 goals na thun/khum zo hi. Mexico gam-ah 1986 World Cup ah Argentina football team captainship armband khih in makaih a, final ah West Germany gam normal time in 3-2 goals in zawhpih in trophy na dompih hi. Tua ma-in quarter final ah England team 2-1 in a zawhpihna ah goal nihte a khum kum tawh sim khawmin FIFA World Cups ah na kimawl hi. 1986 World Cup ah Maradona "best player" in kiciamteh ahih manin Golden Ball award na ngah hi. Ahi zongin 1986 World Cup quarter final ah England 2-1 tawh a zawhna uh-ah goal nih a khumte lakah a khum masak pen a bawllung in khut kha hi napi-in foul ci-in dan kipia lo ahih manin "Hand of God" a cih manin tu dong England football fans a lungkim thei nai lo lai mahmah uh hi. A goal nihna pen England players nga tak paikanin 60 mere (66 yard) in a gamla sungah khem zom zialzialin hawlsuakin goal khum ahih manin 2002 FIFA.com voters ten "Goal of the Century" ci-in voted uh hi.

Maradona in November 2008 in Argentina' national football team coach or manager na len a, 2010 in South Africa gam-a World Cup ah Argentine national football team na makaih napi-in Argentina team a lawhsapihna hangin a tournament bei ma-in a panmun panin a kitawpna thu pulak hi. Tua khit nung 2011-12 season in UAE Pro-League ah Dubai-based club Al Wasi ah coach na len hi. 2017 in Fujairah club coach in na pang kik napi-in a season bei ma-in nusiatsan kik hi. May 2018 in Belarusian club Dynamo Brest in a chairman thak dingun Maradona na guang uh a, Brest khuapi a tun' July kha panin a panmun let kipan hi. September 2018 panin June 2019 kikal sung Maradona in Mexican club Dorados coach na len hi. 2019 panin a sih dong Argentine Primera División club Gimnasia de La Plata coach na len hi.

1986 World Cup ah Argentina team trophy a dompih Maradona in cidamlohna hangin buaina tangthu (history of health problems) tampi na nei hi. Tu kha bul-in a khuak sungah sisan khal (blood clot) om ahih manin Buenos Aires khuapi sunga specialist private clinic ah a khuak ki-at (brain surgery) a, a surgery or operation na lawhcing hi.

‘EITE IN ZONG DAHPIH IN I THUAKPIH HI'

Retired Brazilian soccer star Pele in Argentine icon Maradona sihna vai a thuakna leh dahpihna thu pulak hi. "Hih bangin lawm khat suplawh pen thusia hi. Pasian in a innkuante in a thuakzawhna dingun thakhauhna guan ta hen. Ni khat ni ciangin vantung gam-ah baawllung i sui khawm kik takpi ding hi," ci-in a a brief statement bawlna Pele' representatives ten Reuters news kiangah pia uh hi.

2001 kum in FIFA in footbal tangthu sungah a thupi pen hi ci-in Pele leh Maradona min pulakkhia-in na ciamteh hi. "Ei zong Marodona hong nusiatna hangin i dah uh hi. Boxer khat a kitum tuk tawh kibangin i ngaihsun uh hi. Hong sihsanna thu i zak ciangin lamdang i sa hi," ci-in FIFA spokesman Nicola Lombardo in gen hi.

1984-1991 kikal sung teng Italian club Napoli ah Maradona na kimawl a, Napoli club Serie A league title masa pen na ngahpih hi.

Sources: Al Jazeera and News Agency; Reuters; Wikipedia

@ Thang Khan Lian #ZUNs reports