AHIH HANG KA UP PA KA THEI HI, AMAH MUANHUAI HI; KE'N KA THEI ZO HI
US presidential elections vote ma leh November 3 Elections Day vote khiat khit nungin Trump cingkik (veve) ding hi, a ci Khristian evangelists kici leh thusuak ngah kamsang a kici tam mahmah a, Biden cing ding hi a ci a om kiaukiau hangin tam het lo hi. Elijah hun in Elijah leh Israel Kumpipa Abab leh Kumpinu Jezebel' Baal kamsang 450te a Pasian uh kua man zaw hiam ci-in Karmel Mual ah a Kidemna uh (1 Kumpite 18:20-49) thupiang bang hong phawksak liang hi.
Kamsang taktak leh kamsang taktak lo, mi cimawhte itna nei lo leh mihing khempeuh nisim in a mawh den ciatciat amau mawhna tawh a kibang lo mawhna bawlte bek dawi gilo bangin a mudah, hehpihna a nei lo Khristian kineih leh mawhna neite zong Jesuh'n a it bangin it leh cimawhte itna a nei Khristian kidona - Khristian nam nih kidona nasia mahmah hi. Kua a gualzo zaw hiam cih na enen hithiat bek ing. Ke'n bel kamsang manlo leh Khristian a kineihkhem kuate hiam cih tel khin lua ee. Ka gal et bekin zong tel ziau lel ee.
Ka pian'na leh ka khankhiatna pen Hindu biakna zui mi a tam penna India gam (World population review 2020 in a tuatna ah Hinduism 80%, Islam 13%, Christians 2.3%, Sikhs 1.9%, Buddhists 0.8%, Jains 0.4%) hi a, Indian Prime Minister leh President a len Khristian ahih lam ka thei ngei mai hi. Ahi zongin Indian Constitution in biakna suahtakna hamphatna (right freedom of religion) hong pia ahih manin makai or party a kuakua a cing zongin cikmah in keima up leh deih leh san' thu tawh ka teel Khristian ka hihna patauhna ding leh lunghimawhna ding om in ngaihsutin ka nei ngei kei hi. Political party or leader pen biakna party leh ka upna hong humbitsak dingin ngaihsun in ka nei ngei kei hi.
China gam zong Communist Party of China (CPC) in khauh takin a ukna gam hi napi-in leitung bup-ah Khristian a khang hatna pen gam hi. A Khristian hihna uh party leh gam makai khat humbit ding a kilamen leh muan' leh suan in a neite pen Khristian patau baih leh lauthawng dente hi uh a, thankik bangin a gial uh a khek kawikawite hi bek hi.
Topa a muang mite pen ling het loin a om tawntung Zion Mual tawh kibang hi. Jerusalem kimkotah mualte a om mah bangin ama mite’ kimkotah tua kipan a tawntungin Topa om ding hi. Thuman mite a khialh khak lohna dingun amau a kipia leitang tungah migilote in amaute uk paisuak lo ding hi. (Late 125:1-3)
Keimah in mualtung lam ka ento hi. Keimah huhna koi lai pan hong pai ding ahi hiam? Van le lei a bawl Topa’ kiang panin keimah huhna hong pai hi. Amah in ka khe taalsak lo ding a, kei hong kem pa lusu lo ding hi. Topa in nang hong cing ding a, nangmah a hong hu dingin na kiangah hong om hi. Sunin ni in nang hong gimsak lo ding a, zanin kha in zong nang hong sukha lo ding hi. Topa in siatna khempeuh panin nang hong hu ding a, amah in a muanhuai-in nang hong kem ding hi. Topa in tua kipan a tawntungin na vaksuk na vaktohna-ah nang hong kem ding hi. (Late 121:1-3, 5-8)
Hun bei dongin note a hong ompih tawntung ding ka hihna thu phawk ta un,” a ci hi. (Matthai 28:20b). Ahi zongin ka up pa ka thei a, ama tungah ka apte tua Ni dong hong kepsak zo ding hi, ci-in thei ka hih manin ka maizum het kei hi. (2 Timoti 1:12b)
Mi i muan sangin Topa belh ding hoih zaw hi. Uliante i muan sangin Topa belh ding hoih zaw hi. (Late 118:8-9)
Thang Khan Lian #ZUNs reports
No comments:
Post a Comment