TU HUN ADINGIN INNKUAN NUAMSA

TU HUN ADINGIN INNKUAN NUAMSA

A dahhuai mahmah a bat hangin a lehlam panin a hoih mahmah lah a bang thu in, technology khantohna hangin smartphone leh social media om ahi hi. A zangkhial tampi a om hangin a phattuampih leh hamphatpih kitam mahmah hi.

Biakinn kikhopna ah, ni dangin kikhop hun leh thugen hun sung sawt sa lua-in lusu ngaungau in tutna tung panin a kiasuk liang, naksia damdam leh a kikhop kipat cil panin a tawp dong a pau daidai den, a kisawk zakzak den teng smartphone a om khit nung a lususu, a naksia damdam, a pau dai lo leh a kisawk zakzak ding mi kimu tam nawn lo hi.

Smartphone a om khit zawh nu leh pate, tate leh tute in amau phone ciat mah len tangtang uh a, ni dang lai bangin pakan leeng, um leh beel kitaihtuah a kilai puak gamgam leh kitot kiseelna, kitai in kisalh gaga cihte kiza tam mel nawn lo hi.

"Lamdang lua lamdang lua sa'ng,

Liangvai kei adingin,

Dahna khitui hong nul siang ta,

Nuih fefa tawh kidim ta,

En ven hia lai khangno leh nu leh pa ten,

Smartphone mah len tangtang ta,

I innkuan kim in phone tawi zo ciat le'ng,

Nuihna leh nuamna vive tawh dim ta,

Kitot kiseel om nawn loin

Nuamna leh nuihna vive tawh dim ta!"

Tua bang hi napi-in smartphone hangin innkuan sungah kitot kiseelna tawm semsem in, kitot kiseelna hun ding i hauh nawn loh hangin innkuan kikhopna, ni dang hun bangin innkuan in tu khawm liiliai in holim khawm dialdial cihte tawm semsem a, ki-itna leh kitheihsiamna leh kilainatna tawm semsem ta ahih manin a dahhuai mahmah thu ahi hi.

✍️ Thang Khan Lian #ZUNs