THEI LE'NG VAL LO, ZUI LE'NG KISIK LUATNA DING OM LO ZAW LAI
*Mi' dailen khit phet in dailen buk sung va lut pah kei in. A ek hu teng uh na sung puak liangin na dik kha ding hi. Mi' dailen khit minute 10 kihal beek in dailen buk lut leng a kheng nam heha teng na dai tuam zaw deuh ahih manin an ne lopi gilvah sa-in daileng buk panin pusuah se kul lo hi.
*Nipi khua lum hun (summer) lai-in mi' kisil khit phetin kisilna buk sungah va lut pah kei in. A kisilna tuihu (vapour) uh theng nai lo ahih manin kisilna buk sung na lum hehu ding hi. Tawm vei ngak in la, a kisilna tuihu teng uh a theng ciangin lut lecin kisilna buk a ngei na bangin na vot zaw hi.
*Na kisil khit ciangin kinulna puan (towel) tawh na taw vang kiim teng na nulna mun lim takin ciamteh in. Kinulna puan na zat kik ciangin na taw kiim teng na nulna mun teng peuh na mai nulna dingin na zat khak ding baihlam mahmah hi.
*Mi' an nek lai peuh in na khaksuah leh nap nakpipi in gingsak damdam kei in. An nete a pau loh hangun hong kih mahmah ding uh hi. Mi' an nekna kim peuh ah na khaksuah va sia ging duahduah kei in la, na nap peuh va nit nuanua kha kei in.
*Khua lak na vak ciangin zun suak ta ci-in na utna peuh leh lam kiang peuh a tu suk pah buatin na zun na tuahna peuh ah peek suk pah seusau kei in. Zun tha kimlai peuh dak doldol kawikawi in, paupau luakluak in pai kawm peuh in lawi zun tha kineih sese kei hi. Hong mute in, "Tawta lai si e, hai si e," hong cihsan lel ding uh a, "Ganhing' suan tawh kilamdang kei si e," hong cihsan lel ding uh hi.
*Mipi lakah na om ciangin suak ta ci-in na veih deih takin na ut bangbangin va peek kei in. Ip zawh ding ahih kei leh a ging lo-a san kisin in. Veih neih lo a om loh hangin ui bangin na tuahna teng peuh ah va veih sang ging dupdup kei in. Ui bangin hong kingaihsun ding hi.
*Khua lak leh mi lakah na nap na nit ciangin tat theih ta ci-in na tuahna teng, kawm tung, zawl tung leh baang na mai khakna teng peuh ah na nap siak gawpgawp kei in. Tawta na hihna a pholakkhiakhia na suak ding hi.
*Mi' lakah na om ciangin kam vang ta ci-in mi' thugen ngai masa lopi-in na ut teng gen khum in, thukikupna ah va hai paupau luakluak pah kei in. Mihai bangin hong kingaihsut khak ding baihlam mahmah hi. Gennop, kupnop na neih leh mi' kikupkhawm thu tawh kituak va kuppih theih ding kisin leteh mipil bangin hong kingaihsun pah ding a, a pil veva na hih loh hangin a pil bangin hong kituat lel ding hi.
*Social media group tengah minam it pen bang keek in kuku in nang ngaihsutna tawh kituak lo ngaihsutna nei teng minam langpang in ngawh thapai den in, a comments peuh uh screenshot zaih in privacy rights palsat in cyber crime gamtang in group teng ah ban khahkhah kei in. Haina nam khat mah ahi hi.
Minam it a piangthak cil na hih lam a tangkoko na hi lel a, minam it ten cihtakna leh thuman lahkhiatna tawh mikim in minam a itna uh lakkhia thei uh hi cih phawk lopi-in na kutkut leh uipi saguh bawk zong a vak leh Penglam galkap hi hong kicihsan lel ding hi. Nang leh nang a kitawlem thapai den na hi lel hi.
🖋️Thang Khan Lian
No comments:
Post a Comment