PILNA SIAMNA LEH THU THEIHNA MANPHA HI

PILNA SIAMNA LEH THU THEIHNA MANPHA HI

Pilna, siamna, thu theihna (education) sin ding pen a kisam pha mahmah leh a poimawh mahmah thu ahi hi. Kum zalom 21 pen Technology Age or Computer Age hi ta, Stone Age hun lai hi nawn lo ahih manin khualak a thuleng thu kiphuaktawm teng, cimphawngna dingin upmawh thu leh ngaihsutna kikup mawkmawkna ah na zak thu teng peuh thuman bangin ngaihsun in mittaw sialkhau len bang teta pahpah kei in. Thuman leh zuau thu ahih kei leh phuahtawm thu hiam cih kantel masa hi. Tua dingin Internet connection omna peuh ah na khut sunga na tawi ciuciau smartphone zangin Google ah leitung gam tangthu, thupiang khinsate, thuman leh thuzuau tampi kipheklek ziauziau thei ta hi. Smartphone pen Facebook, Viber, WhatApps, Instagram, phone call leh man kizaihna leh kipostna ding bek-a kibawl leh kimang thei hilo hi. Nute' mo man sangin a tam zaw na smartphone tawi kawikawi a zatna manpha in zat beek kisinhuai mahmah hi.

Thuman leh phuahtawm ahih kei leh thu zuau pen khentel theihna dinga ngaihsutna khuak hong pia, pilna kipatna bulpi pen Pasian zahtakna hi. Pasian pen haina hong kipatna bulpi hilo hi. Pilna kipatna bulpi Pasian sangin thuneihna (power) ngah theihna ding bekin ut teng a mutmut a siakhia a phitkhia ziahziah politiciante thugen khempeuh thuman in ngaihsun pah in haipih liangin mittaw sialkhau let teta pong pen kum zalom 21 hun in pilna leh thutheihna in kingaihsun nawn lo hi.

Soviet Union gam makai Nikita Khrushchev in, "Mun khempeuh ah politiciante kibang khin hi. Lui (leh guam) om lohna mun nangawn ah lei (bridge) kong bawlsak ding hi ci-in hong ciam uh hi," (election ah vote ngahna ding leh a supporters ngahna dingun) a cih phawkhuai mahmah hi.

"Ama pumpi ki-uk zo lo ahih manin amah in sihlawh a, ama hailuatna in hankhuk sung a tun hi." (Paunak 5:23) Mihaite pil hopih kei un; amaute in a manphatna phawk thei lo uh hi. (Paunak 23:9) A pil lo kimlai a pil a kisapa sangin mihaite adingin lametna om zaw lai hi. (Paunak 26:12)

Mihaite thuhilh kei in; hong mudah ding uh hi. Mipilte thuhilh in; hong it ding uh hi. Mipilte thuhilh lecin pil semsemna-in nei ding a, thuman mite thuhilh lecin a thutheihna uh khang semsem ding hi. Pilna in na khang hong khan ding a, na nuntakna hong sausak ding hi. Pil lecin nangma phattuamna ding hi a, pilna don kei lecin nangma supna ding ahi hi. Haina pen a kamtam, zumna mel a thei lo numei tawh kibang hi. (Paunak 9:8-9, 11-13)

Sia leh pha, thuman leh thutang leh zuau thu na khentel theihna dingin Pasian' hong piak ngaihsutna khuak zat ding zia leh pilna siamna sinna ding na hahkat kei leh a nuai-a guta kiman ATM gu dinga kithawi kimlai passbook printing gute' tuah bang na tuah khak ding thubaih hi.

Hih thu lim takin ciamteh, kidawm!!! ✊👊

✍️ Thang Khan Lian #ZUNs